« Te ’una’una o te mau rehu auahi : Te ’ē’a fa’aora o te fa’a’orera’a hara––Fa’ahitira’a parau », Nō te pūai o te feiā ’āpī, Novema 2022.
Te ’una’una o te mau rehu auahi : Te ’ē’a fa’aora o te fa’a’orera’a hara
Fa’ahitira’a parau
’E ’ua ’amu vau, nā Kristin Yee
’Aita tātou e vaiiho-’ōtahi-hia i mua i te fa’ahope’ara’a nō te mau ’ohipa a vetahi ’ē ; tātou ato’a e nehenehe tātou e ora mai ’e ’ia fana’o i te fa’aorahia i te teimaha o te ’ā’au hepohepo ’e i te mau ’ohipa ato’a e tupu mai i muri iho.
… Tē tītau nei te Fa’aora ia tātou ’ia fa’a’ore i te hara nō tō tātou iho maita’i. ’Aita rā ’oia e ani nei ia tātou ’ia nā reira ma te ’ore tāna tauturu, tōna here, tōna hāro’aro’ara’a. Maoti tā tātou mau fafaura’a ’e te Fatu, e fāri’i tātou tāta’itahi i te mana pūai, te arata’ira’a ’e te tauturu e hina’arohia e tātou nō te fa’a’ore i te hara ’e ’ia fa’a’orehia tā tātou hara […]
… ’Ua parau ’oia : « Tei ni’a iho iā’u te Vārua o te Fatu, ’oia i fa’atāhinu mai iā’u ’ei poro haere i te parau maita’i i te ta’ata ri’i, ’ua tono mai ’oia iā’u ’ei fa’aora i te feiā ’ā’au ’oto ’ei poro haere i te ora nō tei tītī ’e ’ia hi’o fa’ahou te matapō, ’e ’ei tu’u ho’i i te feiā i ha’aparuparuhia ra » [Luka 4:18 ; ha’apāpūra’a i ’āpitihia].
Tei ’oto te ’ā’au, tei roto i te tītīra’a, tei ha’aparuparuhia, i tei matapōhia nā roto i te pēpē ’aore rā i te hara, tē pūpū nei ’oia i te fa’aorara’a, i te fa’aho’i-fa’ahou-ra’a ’e i te ha’amatarara’a. Tē faʼaʼite pāpū nei au ē, te fa’aorara’a ’e te fa’aho’i-fa’ahou-ra’a tāna e pūpū nei, e mea mau te reira […]
’O Iesu Mesia tō ’outou iho Mesia, tō ’outou Tāra’ehara ’e Fa’aora here, tei ’ite i te mau tāparura’a o tō ’outou ’ā’au. Tē hina’aro nei ’oia i tō ’outou fa’aorara’a ’e te ’oa’oa. ’Ua here ’oia ia ’outou. Tē ta’i nei ’oia nā muri ia ’outou i roto i tō ’outou mau māuiui ’e tē ’oa’oa nei i te fa’ati’a hope ia ’outou. ’Ia rave tātou i te ’ā’au ’e ’ia rave i tōna rima here tei fa’atorohia ’a haere noa ai tātou nā te ’ē’a fa’aora o te fa’a’orera’a hapa.