« ’Ua fa’ateiteihia i ni’a i te sātauro—Fa’ahitira’a parau, » Nō te pūai o te feiā ’āpī, Novema 2022.
’Ua fa’ateiteihia i ni’a i te sātauro
Fa’ahitira’a parau
Te hō’ē tumu ’aita mātou e tūra’i nei i te parau nō te sātauro, tei ni’a pa’i tō mātou a’a i te Bibilia. Nō te mea e fa’autu’a pohe umunaro rahi roa te fa’asātaurora’a nō te hau ’ēmēpera Roma ra, e rave rahi feiā ’āpe’e mātāmua o Iesu tei mā’iti ’eiaha e fa’arahi i te parau nō terā mauha’a ha’amamae ri’ari’a mau. Pāpū ē, e parau rahi mau te pohe o te Mesia nō tō rātou fa’aro’o, terā rā 300 ti’ahapa matahiti te maoro, ’ua ’imi rātou i te fa’a’ite i tō rātou hīro’a ’evanelia nā roto i te tahi atu rāve’a […]
Te tahi fa’ahou tumu tātou e ’ore e fa’a’ohipa nei i te tāpa’o nō te sātauro, ’o tā tātou tūra’ira’a ïa i te parau nō te temeio hope o te misiōni a te Mesia—tōna ti’afa’ahoura’a hanahana mai tōna mamae fa’atusia ’e tōna ho’i pohe […]
I te mau fenua ato’a ’e te mau tau, tē parau mai nei ’oia ia tātou pā’āto’a : « ’O te ta’ata [’e te vahine] i hina’aro i te pe’e mai iā’u, e fa’aru’e ’oia ’iāna iho, ’a rave ai i tāna sātauro, ’a pe’e mai ai iā’u » [Mataio 16:24].
E parau teie nō te mau sātauro tā tātou e amo, ’eiaha rā terā e ’ō’omo. E ta’ata ’āpe’e ia Iesu Mesia ra, tītau-roa-hia iāna ’ia amo i te hō’ē hōpoi’a—tā ’outou iho ’aore rā tā te tahi ’ē atu—’e ’ia haere i te vāhi e tītauhia te fa’atusiara’a, ’e ’aita e ’apera’a mamae. E’ita te hō’ē keresetiano mau e nehenehe e pe’e i te ’Orometua i roto noa i te mau ’ohipa tāna e au maita’i. ’Aita. E pe’e tātou iāna i te mau vāhi ato’a, ’e mai te mea e tītauhia, i ni’a ato’a i te mau māhora ’ua ’ī i te roimata ’e te pe’ape’a, ’e i te tahi taime, ’o tātou ana’e paha tē ti’a atu […]
’Ia noa’a taua mauha’amaita’ira’a ra, ’ia pe’e ïa tātou iāna—ma te pāpū, ma te ’ore roa e ha’apohepohe ’e e horo ’ē, ma te ’ore roa e ’ōtohe i mua i te ’ohipa, ’a teimaha ai tā tātou sātauro ’e ’a ha’apōiri ai te ’ē’a nō te hō’ē taime.