« Tē marū nei tāna zugo ’e tē māmā nei tāna hōpoi’a—Fa’ahitira’a parau », Nō te pūai o te feiā ’āpī, Novema 2022.
Tē marū nei tāna zugo ’e tē māmā nei tāna hōpoi’a
Fa’ahitira’a parau
E rave rahi a’ora’a tei hōro’ahia mai e tō tātou mau ti’a fa’atere o te ’Ēkālesia nō ni’a i te aroha, te hō’ēra’a, te here, te hāmani maita’i, te aumihi, te fa’a’orera’a hapa ’e te tahiti’a. Tē ti’aturi nei au ē, tē ani mai nei te Fa’aora ia tātou ’ia ora i te hō’ē huru teitei a’e, te mo’a a’e—tōna huru here i reira ho’i te mau ta’ata ato’a e ’ite ai ē, nōna mau ho’i rātou, ’e e mea hina’arohia rātou.
’Ua fa’auehia tātou ’ia here ia vetahi ’ē, ’eiaha e ha’avā ia rātou. E vaiiho ana’e i teie hōpoi’a teimaha ; e ’ere nā tātou e amo. ’Āhiri i te reira, e nehenehe tā tātou e rave mai i te zugo o te here ’e te aumihi o te Fa’aora […]
Te feiā tāna i tāpe’a ’ua fāri’i rātou i tōna here, e ’ua fa’aora ’e ’ua taui taua here ra ia rātou. ’Ua fa’auru tōna here ia rātou ’ia hina’aro e taui i tō rātou orara’a. Te orara’a mai iāna te huru, e hōpoi mai te reira i te ’oa’oa ’e te hau, ’e ’ua ani ’oia ia vetahi ’ē i taua huru orara’a ra ma te marū, te maita’i ’e te here […]
’A ha’api’i noa ai tātou ’ia rave i te mau mea tāna e ani mai ia tātou—’eiaha nō te mea e hōpoi’a ’aore rā nō te mau ha’amaita’ira’a ’o tā tātou e nehenehe e fāri’i, nō tō tātou noa rā here iāna ’e i tō tātou Metua i te ao ra—e tahe mai tōna here nā roto ia tātou, ’e e’ita te reira e fa’atupu noa i te mau mea ato’a tāna i ani mai, e fa’a’ōhie a’e rā ’e e ha’amāmā a’e ’e e fa’a’oa’oa a’e, mai tei ’ore i mana’ohia e tātou […]
E hina’aro te ta’ata tāta’itahi ’ia ’ite ē, nō te tino mau nei rātou ’e e hina’arohia rātou i roto i te tino o te Mesia. Te hina’aro rahi o Sātane ’o tē fa’a’amahamahara’a ïa i te mau tamari’i a te Atua, ’e ’ua manuia roa ’oia, terā rā, tē vai ra te mana rahi i roto i te tāhō’ēra’a. ’E e ti’a roa ia tātou ’ia haere ma te tāpe’a i te rima te tahi ’e te tahi i roto i teie tere fifi o te tāhuti nei !