« I roto i te ’āpitira’a ’e te Fatu—fa’ahitira’a parau », Nō te pūai o te feiā ’āpī, Novema 2022.
I roto i te ’āpitira’a ’e te Fatu
Fa’ahitira’a parau
Tē ha’api’i nei te ’evanelia a Iesu Mesia tei fa’aho’i-fa’ahou-hia mai i te parau tumu o te ’āpitira’a hope roa i rotopū i te vahine ’e te tāne, i roto i te orara’a tāhuti ’e i te orara’a a muri a’e. Noa atu ē, e nātura ta’a ’ē tō te ta’ata tāta’itahi ’e e mau hōpoi’a hanahana tei fa’ata’ahia, e rave te vahine ’e te tāne i te mau ti’ara’a e tano a’e ’e te faufa’a i roto i te fa’anahora’a nō te ’oa’oa a te Atua nō tāna mau tamari’i […]
’Ia au i te ha’api’ira’a tumu o te ’evanelia, ’aita te ta’a-’ē-ra’a i rotopū i te vahine ’e te tāne e nā ni’a a’e i te mau parau fafau mure ’ore a te Atua nō tāna mau tamaiti ’e tāna mau tamāhine. ’Aita tō te tahi e ti’ara’a hau atu a’e i roto i te hanahana tīretiēra i tō te tahi i roto i te ora mure ’ore. Tē ani mai nei te Fa’aora iho ia tātou pā’āto’a, te mau tamari’i a te Atua, « ’ia haere mai iāna ra, ’ia rave i tōna maita’i ; ’e ’aita ’oia e pāto’i i te hō’ē noa a’e o rātou e haere mai iāna ra » [2 Nephi 26:33]. Nō reira, i roto i taua huru ra, ’ua fa’arirohia tātou pā’āto’a ’ei mea ’aifāito i mua iāna.
’Ia hāro’aro’a ana’e ’e ’ia fa’aō ana’e nā ta’ata fa’aipoipo i teie parau tumu, ’aita rāua e ti’a ra ’ei peresideni ’aore rā ’ei mono peresideni nō tō rāua ’utuāfare. ’Aita e ti’ara’a teitei a’e ’aore rā e ti’ara’a ha’eha’a a’e i roto i tō rāua tā’atira’a o te fa’aipoipora’a, ’aita ato’a e haere i mua ’aore rā i muri i te tahi. E haere rāua te tahi i pīha’i iho i te tahi, ’ei nā ’aifāito, nā tamari’i fānau hanahana a te Atua. E riro mai rāua ’ei hō’ē i roto i te mana’o, te hina’aro ’e te ’ōpuara’a ’e tō tātou Metua i te ao ra ’e ’o Iesu Mesia, i te fa’aterera’a ’e te arata’i-’āmui-ra’a i te fa’anahora’a ’utuāfare.