Fa’atumu i ni’a i te hiero
Fa’ahitira’a parau
E te mau taea’e e te mau tuahine here, i roto i teie nā tuha’a nehenehe e pae o te ’āmuira’a rahi, ’ua fāri’i fa’ahou ā tātou i te ’itera’a ē, ’ua matara te mau ra’i ! Tē pure nei au ē, ’ua tāpa’o ’outou i tō ’outou mau mana’o ’e e fa’a’ohipa ’outou i te reira. ’Ua ineine tō tātou Metua i te ao ra ’e tāna tamaiti here, ’o Iesu Mesia, ’ia tauturu ia ’outou. Tē fa’aitoito atu nei au ia ’outou ’ia fa’arahi atu i tā ’outou mau tūtavarara’a nō te ’imi i tā rāua tauturu.
’Aita i maoro a’e nei, ’ua māta’ita’i māua te tuahine Nelson, nō te taime mātāmua, i te tau ’āpī 4 o te mau ’āpapara’a videos o te Buka a Moromona. ’Ua fa’auru te reira ia māua ! […]
E mea faufa’a rahi i te mea ē, ’ua mā’iti te Fa’aora ’ia fā mai i mua i te nuna’a i te hiero. Nōna teie fare. ’Ua ’ī te reira i tōna mana. ’Eiaha ’ia mo’ehia ia tātou te ’ohipa tā te Fatu e rave nei nō tatou i teienei. Tē fa’ariro nei ’oia i tōna mau hiero ’ei mau vāhi ’ōhie ’ia haere. Tē fa’a’oi’oi nei ’oia i te terera’a o te patura’a i te mau hiero. Tē fa’ananea nei ’oia i tō tātou ’aravihi ’ia tauturu i te ha’aputuputura’a ia ’Īserā’ela. Tē fa’a’ōhie ato’a nei ’oia i te tāmāra’a pae vārua nō tātou tāta’itahi. Tē fafau atu nei au ē, e ha’amaita’i te taime i fa’ata’ahia nō te haere i roto i te hiero i tō ’outou orara’a i te fāito ’aore roa e mea ’ē atu e nehenehe ’ia nā reira.
E au mau taea’e ’e mau tuahine here, e mata na ’outou i te fa’atumu i ni’a i te hiero nā roto i te ravera’a ’aita ā ’outou i rave a’e nei. Tē ha’amaita’i nei au ia ’outou ’ia ha’afātata atu ā i te Atua ’e ia Iesu Mesia i te mau mahana ato’a. ’Ua here au ia ’outou. ’Ia vai mai te Atua i pīha’i iho ia ’outou ē tae atu i te taime e fārerei fa’ahou ai tātou, ’o tā’u ïa pure nā roto i te i’oa o Iesu Mesia, ’āmene.