“Jisas Kraes I Paoa blong Ol Yut—Samfala Pat,” Blong Ol Yut Oli Kam Strong, Nov 2022.
Satedei Moning Sesen
Jisas Kraes I Paoa blong Yut
Samfala Pat
Sapos yia blong yu i stap bitwin 11 mo 18 yia, mi gat wan mesej speseli blong yu we i kam long Sevya blong yu Jisas Kraes.
Mesej blong Sevya long yufala
Ol dia yang fren blong mi, sapos Sevya i stap long ples ia naoia, bae Hem i talem wanem long yufala?
Mi biliv bae Hem i stat wetem, talemaot bigfala lav blong Hem we Hem i gat long yufala. …
Mo yet, from se yumi evriwan i no strong mo no stret evriwan, sam wari bae i kam insaed long maen blong yu. Maet bae yufala tingbaot ol mistek we yufala i bin mekem, taem yufala i bin foldaon long temtesen, ol samting we yufala i filim se sapos yu no bin mekem nomo—o ol samting we yufala i filim se sapos yufala i bin mekem gud moa. …
Mi biliv se Sevya Jisas Kraes bae i wantem yufala blong luk, filim, mo save se Hem i paoa blong yufala. Se wetem help blong Hem, i no gat limit long wanem we yu wantem blong mekem i kam tru. …
Sevya bae i talemaot, stret se yufala i ol gel mo ol boe blong God we I Gat Olgeta Paoa. Papa blong yufala long Heven i gat olgeta paoa mo glori long ful wol, i fulap wetem lav, glad, klin fasin, tabu fasin, laet, gladhat, mo trutok. Mo wan dei Hem i wantem blong yu gat evri samting ia we Hem i gat. …
Blong mekem hemia i posibol, Hem i sendem Jisas Kraes blong stap olsem Sevya blong yufala. …
Hemia nao wanem bae i hapen long yufala. Hemia nao i fiuja blong yufala. !Hemia nao i joes blong yufala!
Trutok mo Ol Joes
Samting we i moa impoten long plan blong God blong stap mekem yufala i glad hem i paoa blong yufala blong jusum samting. …
Taem yufala i gat ol impoten joes blong mekem, Jisas Kraes mo gospel blong Hem we i kambak i nambawan joes. Taem yufala i gat ol kwestin, Jisas Kraes mo gospel blong Hem we i kambak oli ol nambawan ansa. Taem yufala i filim se yufala no strong, Jisas Kraes i paoa blong yufala. …
Blong Ol Yut Oli Kam Strong
Blong helpem yufala i faenem Wei mo blong helpem yufala i mekem doktrin blong Kraes i stap olsem samting we i stap lidim laef blong yufala, Jos Ia blong Jisas Kraes blong Ol Lata-dei Sent i rere long wan niu risos, wan vesen we oli riviu bakegen long hem, blong Blong Ol Yut Oli Kam Strong. …
Blong mekem i moa klia, nambawan gaed we yufala i save gat blong mekem ol joes hem i Jisas Kraes. Jisas Kraes i paoa blong yut.
So Stamba tingting blong Blong Ol Yut Oli Kam Strong i blong helpem yufala go long Hem. …
I impoten tu blong yufala i save wanem Blong Ol Yut Oli Kam Strong i no mekem. I no mekem ol desisen blong yufala. I no givim long yufala wan “yes” o “no” abaot evri joes we yufala i stap fesem. Blong Ol Yut Oli Kam Strong i lukluk moa long fandesen blong ol joes blong yufala. I lukluk moa long ol valiu, ol prinsipol, mo ol doktrin be i no evri wanwan fasin.
?Hem i rong blong gat ol rul? Yes, i no rong. Yumi evriwan i nidim olgeta evri dei. Be hem i rong blong stap lukluk nomo long ol rul be no lukluk nomo long Sevya. …
Wan Standet We I Moa Hae
Jisas Kraes i gat ol standet we i hae tumas blong olgeta we oli stap folem Hem. !Mo invitesen ia blong lukaotem wil blong Hem mo laef folem ol trutok blong Hem, hemia nao hem i ol standet we i moa hae!
Ol joes ia we oli impoten long saed blong bodi mo long spirit man i no mekem olgeta folem tingting blong hem nomo, o folem wanem hem i ting se i wok moa gud mo i popula. Lod i no talem se, “Mekem wanem yu wantem.”
Hem i stap talem, “Letem God i win.”
Hem i stap talem, “Kam Folem Mi.”
Hem i stap talem, “Laef folem wan laef we i moa tabu, we i moa hae, wan wei we i moa rere.”
Hem i stap talem, ‘Obei ol komanmen blong mi.’”
Jisas Kraes i stret eksampol blong yumi, mo yumi traehad wetem evri paoa blong sol blong yumi blong folem Hem
Ol dia fren blong mi letem mi ripitim, sapos Sevya i stap long ples ia tudei, bae Hem i talemaot lav blong Hem we i no gat en long yufala, ful tras blong Hem long yufala. Bae Hem i talem long yufala se yufala i save mekem hemia. Yufala i save bildim wan laef we i gat glad mo hapi from se Jisas Kraes i paoa blong yufala. Yufala i save faenem tras, pis, sefti, hapines, mo pat long laef ia mo laef we i no save finis, from bae yufala i fanem evri samting ia long Jisas Kraes, insaed long gospel blong Hem, mo long Jos blong Hem.