“Werem Paoa blong Yu, O Saeon—Samfala Pat,” Blong Ol Yut Oli Kam Strong, Nov 2022.
Werem Paoa blong Yu, O Saeon
Samfala Pat
Mi prea strong se Tabu Spirit bae i soem long wanwan long yumi taem bae yumi tingting naoia long hamas parabol blong bigfala kaekae blong mared blong pikinini blong king i impoten. …
Taem we king i kam insaed long ples blong mared, hem i lukluk gud long evriwan mo kwiktaem hem i luksave se wan ges i no werem klos blong mared. Oli karem man ia i kam fored mo king i askem ‘Fren. ?Yu yu kam insaed olsem wanem we yu no putum klos blong lafet blong mared? Be man ya i no moa toktok.” [Matiu 22:12]. …
… Man we i no wantem werem klos blong mared, i soem klia se, man ia i no respektem tugeta king mo boe blong hem. I no from se hem i no gat klos blong werem long mared, be, hem i jusum blong no werem wan. … Aksen blong king i kwik blong stretem: “Yufala i fasem han mo leg blong hem, mo yufala i sakem hem i go aotsaed, long ples ya we i tudak, we ol man oli stap krae, mo oli stap harem nogud tumas, oli stap kakae tut blong olgeta from.” [Matiu 22:13].
Fasin blong hem blong no dresap gud i soem filing blong hem blong stap agensem king mo ol instraksen blong hem.
Parabol ia i en wetem skripja ia blong man i tingting hevi se: “God i save singaot plante man oli kam, be smol nomo hem i jusumaot.” [Matiu 22:14].
… God i nogat wan lis blong ol fevret wan we bae yumi mas hop se ol nem blong yumi oli ademap i go ia sam dei. Hem i nogat wan limit long “olgeta we hem i jusum” blong gat wan stret namba nomo. Be, hat blong yumi, filing blong hat blong yumi, fasin blong yumi blong givim ona long tabu kavenan blong gospel mo ol odinens, fasin blong yumi blong stap obei ol komanmen mo hemia we i moa impoten i gladhat mo sore blong Sevya we i save sevem yumi, bae i talem sapos oli kaontem yumi olsem wan we God i jusum o no. …
Taem yumi lukaotem long stret wei presen ia blong ae blong luk mo sora blong harem long saed blong spirit, mi promes se bae yumi kasem blesing blong paoa mo luksave olsem wanem blong mekem koneksen blong kavenan blong yumi i strong wetem Lod we i stap laef. Mo tu, bae yumi kasem paoa olsem blong god long laef blong yumi—mo long en, tugeta bae oli singaotem yu i go mo oli jusum yu long bigfala kaekae blong Lod.