“Stap Kam Moa Kolosap long Sevya—Samfala Pat,” Blong Ol Yut Oli Kam Strong, Novemba 2022.
Kam Moa Kolosap long Sevya
Samfala Pat
Yumi luksave se taem rabis fasin i stap kam antap long wol, yumi we yumi stap traehad blong laef long saed blong spirit, mo olgeta we oli traehad tu blong laef long saed blong spirit we yumi lavem, bae i nid blong yumi lukaotem gud olgeta, givim paoa long olgeta, mo mekem ol rus blong fet blong yumi long Jisas Kraes i kam strong moa. …
Olsem we yumi save gud se blong stap wan tru disaepol blong Jisas Kraes mo blong gat fet long Hem, i moa bitim wan desisen we yu mekem wantaem—moa bitim wan wantaem program. Hem i wan tabu proses we i gohed nomo mo i stap gro mo go bigwan truaot ol defren taem long laef blong yumi, mo bae i gohed olsem kasem taem we yumi nildaon long leg blong Hem.
Wetem ol gudfala gras we i stap gro long medel blong ol rabis gras long wol, ?hao nao bae yumi dipen mo komitim yumi strong moa long Sevya long ol taem we i stap kam?
Hemia tri tingting:
Faswan, yumi save draonem yumiwan moa long laef blong Jisas fulwan, ol tijing blong Hem, Hem we i hae, paoa blong Hem, sakrifaes mo atonmen blong Hem. …
Nambatu, Taem yumi stap save moa gud mo lavem Sevya, yumi wantem moa blong promesem Hem komitmen mo tras blong yumi long Hem. Yumi mekem ol kavenan wetem Hem. …
Blong stap mekem mo kipim ol kavenan i letem lav blong Sevya i go moa dip insaed long hat blong yumi. …
Mo laswan, nambatri tingting blong mi, insaed long tabu responsabiliti ia, yumi tritim gud, protektem, difendem mo lukaotem gud presen ia we i Tabu Spirit. …
… Taem yu letem lav blong yu long Sevya mo lav blong Hem long yu i draon gud insaed long hat blong yu, mi promesem yu moa tras, pis, mo glad taem yu stap fesem ol jalenj long laef blong yu.