Երբ այլ մարդկանց ընտրությունները ցավ են պատճառում ձեզ

Գաբրիել Շիոզավա

Եկեղեցու ամսագրեր

Ահա մի քանի բաներ, որոնք պետք է հիշել, երբ այլ մարդիկ իրենց ազատ կամքն օգտագործում են ձեզ ցավ պատճառելու համար։

Նկարների հեղինակ՝ Շանա Քիգան

Դուք ամեն օր բազմաթիվ ընտրություններ եք կատարում՝ ինչ հագնել, ինչ ուտել նախաճաշին, որ ընկերների հետ ժամանակ անցկացնել: Ազատ կամքը կամ ընտրության և գործելու ազատությունը Աստծո կողմից մեզ տրված ամենամեծ պարգևներից մեկն է:

Մեր ընտրությունները նույնպես ունեն հետևանքներ, և երբեմն այլ մարդկանց ընտրությունները կարող են ցավ պատճառել մեզ: Եթե ձեզ երբևէ պատժել են ձեր եղբոր արարքի պատճառով, ապա դուք տեղյակ եք, թե որքան դժվար կարող է լինել, երբ այլ մարդիկ օգտագործում են իրենց ազատ կամքն այնպես, որ ձեզ դուր չի գալիս:

Բայց երբեմն կան նույնիսկ ավելի վատ բաներ, որոնց համար մարդիկ կարող են օգտագործել իրենց ազատ կամքը: Դպրոցում երեխաները կարող են ծաղրել ձեզ, կամ գուցե ընտանիքի անդամներից մեկը որոշի լքել Եկեղեցին: Շատ դեպքեր կան, երբ կյանքը կարող է անարդար թվալ: Ի վերջո, դուք փորձում եք օգտագործել ձեր ազատ կամքը՝ ճիշտ ընտրություն կատարելու համար, ուրեմն ինչո՞ւ այդպես չանեք:

Իհարկե, դուք չեք կարող վերահսկել ուրիշներին: Բայց լավ նորությունն այն է, որ դուք կարող եք փոխել ինքներդ ձեզ: Ռազմավարությունն այն է, որ փոխեք այն, ինչի վրա կենտրոնանում եք, և լավ ընտրություն կատարեք, նույնիսկ, երբ ուրիշները չեն անում:

Ահա մի քանի բաներ, որոնք պետք է հիշել հավատով առաջ շարժվելիս, երբ նույնիսկ այլ մարդիկ իրենց ազատ կամքն օգտագործում են ձեզ ցավ պատճառելու համար։

1. Սատանան փորձեց կործանել ազատ կամքը (տես Մովսես 4.3): Թեև դժվար է հետևել, թե ինչպես են ուրիշները վատ ընտրություններ կատարում, դուք նաև ազատ եք լավ ընտրություններ կատարելիս, որպեսզի հետևեք Հիսուս Քրիստոսին և ավելի շատ նմանվեք Նրան:

2. Ձեր արարքները ազդեցություն են թողնում։ Հիշեք. «Մենք ազատ ենք ընտրելիս, բայց չենք կարող ընտրել հետևանքները»:¹ Տեսնելով, թե ուրիշների ընտրությունները ինչպես են ազդում ձեզ վրա, կարող է լավ հիշեցում լինել ձեզ համար, որպեսզի այնպիսի ընտրություններ կատարեք, որոնք չեն վնասում ձեզ կամ ուրիշներին:

3. Յուրաքանչյուր մարդ պատասխանատու է իր ընտրության համար (տես Վարդապետություն և Ուխտեր 101.78): Դուք չպետք է ծանրաբեռնեք ձեզ՝ այլ մարդկանց կամ նրանց ընտրությունը փոխելու համար պատասխանատու զգալով: Փոխարենը, դուք կարող եք կենտրոնանալ դրական որոշումներ կայացնելու և Հիսուս Քրիստոսին հետևելու վրա:

4. Դուք կարող եք ձեր ընտրությամբ բարի լինել: Ինչ-որ մեկը կարող է վատ վերաբերվել ձեզ, բայց դուք դեռ կարող եք բարի լինել նրա հանդեպ: Մարդկանց հետ բարի լինելու և նրանց ներելու համար քաջություն է պահանջվում, երբ նրանք անբարյացակամ են ձեր հանդեպ, բայց դա հենց այն է, ինչ կաներ Հիսուսը (տես Ղուկաս 23.34):

5. Դուք պետք է կենտրոնանաք այն ամենի վրա, ինչը կարող եք վերահսկել։ Օրինակ՝ դուք չեք կարող ձեր ծնողներին հետ պահել ամուսնալուծությունից, բայց կարող եք կենտրոնանալ ուխտի ուղու վրա մնալու, ձեր քույր-եղբայրներին օգնելու, առողջ հարաբերությունների մասին սովորելու և ձեր ապագա ընտանիքի համար նպատակներ դնելու վրա: Ընտրություն կատարեք նրա վրա, որ ձեր մարտահրավերները դարձնեք աճելու և սովորելու հնարավորություններ:

6. Դուք ունեք աստվածային ինքնություն և նպատակ: Երբ հիշում եք Աստծո զավակ լինելու ձեր ինքնությունը և նորից կենտրոնանում եք ձեր կյանքի նպատակների վրա, կարող եք խնդիրը տեսնել բոլոր կողմերից: Կենտրոնանալով ձեր նպատակի վրա և տեսնելով, որ այդ մարտահրավերները ձեր կյանքի պատմության միայն մի փոքր մասն են կազմում, կօգնեք ձեզ հավատքով առաջ շարժվել:

7. Հիսուս Քրիստոսի հանդեպ հավատքի միջոցով դուք կարող եք անձնական խաղաղություն գտնել, նույնիսկ, երբ ձեր շուրջը խաղաղ չէ: Նախագահ Ռասսել Մ. Նելսոնն ասել է․ «Մենք կարող ենք զգալ հարատև խաղաղություն և ուրախություն, նույնիսկ տագնապալի ժամանակներում»:² Կյանքը փոթորկված ծով է, և մենք կցանկնայինք, որ Աստված հանդարտեցնի այդ փոթորիկները մեզ համար: Բայց երբեմն ծովը հանդարտեցնելու փոխարեն Նա հանդարտեցնում է մեզ՝ նավաստիներիս։ Ձեր խնդիրներով դիմեք Նրան, և Նա կօգնի ձեզ:

Աստված ձեզ ազատ կամք է տվել, որպեսզի կարողանաք ընտրություն կատարել և հետևել Նրան՝ դրանով նմանվելով Նրան: Երբ դուք դա անեք, դուք բնականաբար կսովորեք ձեր սեփական ընտրություններից և սխալներից և ուրիշների ընտրություններից: Թեև դժվար է հետևել, թե ինչպես են մարդիկ ձեզ ցավ պատճառող ընտրություններ կատարում, դուք կարող եք սովորել այդ փորձառություններից և առաջ շարժվել նպատակաուղղված, հավատքով և ուրախությամբ:

Թեև ուրիշներն ունեն ազատ կամք, դուք չպետք է զոհ գնաք բռնությանը։ Եթե դուք տառապում եք որևէ տեսակի բռնությունից, խոսեք որևէ վստահելի չափահասի հետ:

Հղումներ

1. Դեյլ Գ․ Ռենլանդ, ապրիլ 2022 գերագույն համաժողով (Լիահոնա, մայիս 2022, 75)։

2. Ռասսել Մ. Նելսոն, «Բացման ուղերձ», 2020 թ․ ապրիլի գերագույն համաժողով (Ensign կամ Լիահոնա, մայիս 2020, 6)։