Faenem Paoa blong Yu long Jisas Kraes

I Kam long Elda Jeffrey R. Holland

Blong Kworom blong Olgeta Twelef Aposol

Jisas Kraes i paoa blong ol yut—evri yut long wol—mo hemia i ingkludum yu!

Mi mi glad blong givim fas toktok long spesel namba ia blong Ol Yut Oli Kam Strong magasin. Ol atikol, aktiviti, mo ol stori we oli kam long ol yut raon long wol bae i help blong mekem testemoni blong yu i kam strong long wan impoten trutok we i no save finis, we i kam long Fas Presidensi. Blong Jisas Kraes, olgeta oli talemaot, “Hem i ‘strong paoa blong ol yut.’”¹ Hemia i minim se Jisas Kraes hem i paoa blong yu. Mi prea se bae yu holem taet trutok ia wetem glad long taem tedei we laef i had tumas, naoia mo oltaem.

Evriwan i Nidim Paoa blong Kraes

Yu no stap ia from wan janis we yu kasem o mistek. Yu jusum blong kam long wol ia blong lan, gro, mekem plante samting, mo kam moa olsem Papa long Heven. Long laef ia, bae yu fesem ol had taem, jalenj blong yuwan, gat filing ia blong tingting daon long yuwan, mo harem nogud we i save kam bigwan tumas. Ating yu filim se yu nomo save muv i go fored long wan taem olsem naoia.

Long ol taem olsem, plis tingbaot se Papa long Heven i lavem yu. Hem i bin stap, mo bae Hem i bae stap oltaem. From lav blong Hem we i no gat en mo i stret mo klin, Hem i sendem Pikinini Boe blong Hem, Jisas Kraes, blong givim yu paoa mo helpem yu muv i go fored. Mo Jisas i kam from Hem i lavem yu tumas tu.

Be sore, sam pipol oli no luksave nid blong olgeta from wan Sevya. Oli no andastanem se olgeta, olsem evri pipol, bae oli mekem mistek we oli no save fiksim, oli eksperiensem ded blong wan we oli nomo save tekem bak, mo fesem ol trabol mo nogud aksiden we oli no save go tru olgetawan. Mo oli no save winim sin mo ded olgetawan. Hemia i minim se olgeta—mo evri pipol—oli nidim Atonmen blong Jisas Kraes, wetem paoa we i kam wetem.

“Hemia i gud tumas, Elda Holan,” yu stap tingting olsem, “be ?olsem wanem nao mi save mekem Jisas Kraes i kam paoa blong mi?” Blong help ansarem kwestin ia, plis letem mi serem sam wei aot long plante we Jisas Kraes i save mekem yu kam strong evri dei.

Hem i Gat Paoa blong Mekem Yu Kam Strong

Las naet blong Hem long wol ia, Jisas Kraes i go long Garen blong Getsemane. Long we, Hem i nildaon long medel blong ol olif tri mo Hem i statem blong tekem long Hemwan ol sin blong wol. Tabu sakrifaes ia we i blong taem we i no save finis “ i mekem [Hem], … we i hae long evriwan, i seksek from soa long bodi, mo blad i ronaot long evri hol long skin blong Hem” (Doktrin mo Ol Kavenan 19:18).

Oli bin tekem Jisas i go long Kalvari mo krusifaem Hem. Long we, Hem i finisim sakrifaes blong Hem we i atonmen. Hem i givim laef blong Hem wetem gladhat, mo wetem bigfala glad Hem i girap bakegen afta long ded. Long Ista sisen ia, mi glad blong talemaot se Jisas Kraes i laef! Mi wantem talem tu se Hem i no tekem long Hemwan ol hevi sin nomo, be tu, Hem, “i bin harem nogud long ol soa blong bodi mo fulap hadtaem mo temtesen blong evri kaen” taem Hem i mekem olsem (Alma 7:11; oli bin ademap).

Sevya i filim evri harem nogud long saed blong filing mo sore, mo go tru long hem long wan wei we Hemwan nomo i save, evri sore mo safaring eksperiens blong yu, mi, mo evri sol we oli bin laef o bae oli laef yet. Wanem we Hem i bin go tru long hem long saed blong bodi, tingting, mo long saed blong spirit blong yu, Hem i save olsem wanem blong mekem yu kam strong.

Bae i had long yu blong bilivim se Jisas hem i intres blong helpem yu olsem wan nomo aot long milian we i gat semak yia. Sapos yu stap tingting se Hem i gat plante gudfala samting i stap blong mekem bitim blong givim yu paoa long ol taem blong nid, tingbaot Hem long garen ia, tingbaot Hem long kros ia. “Hem i safa, blad blong Hem i ron mo Hem i ded”² from yu, from Hem i save hemia i impoten long yu. Hem i save se hemia i tru. Hem i intres tumas, glad blong mekem, mo save mekem blong helpem yu—naoia mo oltaem. Hem i givim laef blong Hem blong mekem se Hem i save givim paoa long yu taem yu akseptem invitesen blong Hem we bae i jenisim laef blong yu: “Yufala i kam long mi” (Matiu 11:28).

Jusum blong Wokbaot wetem Hem

Hem i joes blong yu blong folem Jisas Kraes mo mekem Hem i kam paoa blong yu. Hem i “makem rod ia mo lidim rod”³ i gobak long Papa long Heven. I tru se, Hem i “rod ya, mo i stamba blong trutok, mo stamba blong laef.” (Jon 14:6).

Yu faenem rod ia taem yu holemtaet gospel blong Jisas Kraes mo taem yu eksasaesem fet long Hem mo sakem ol sin blong yu. Yu mekem rilesensip blong yu wetem Hem i kam strong taem yu jusum blong baptaes long nem blong Hem mo kasem presen we i Tabu Spirit. Afta yu gohed long gospel rod blong Hem taem yu stap kipim ol komanmen, kasem ol odinens, onarem ol kavenan, mo stap laef olsem disaepol blong Hem.

Ol aksen ia oli givim wan strong koneksen—wan kavenan koneksen— we i fasem gud yu long Kraes—mo Hem long yu. Taem yu wokbaot wetem Hem, Hem mo Papa oli kam ol stamba risos blong daereksen long saed blong spirit mo paoa. Yu save go fored we yu sef mo wetem glad evri dei, kam moa olsem Tufala, mo wan dei gobak blong stap wetem Tufala mo gat kaen laef we Tufala i laef long hem.

woman i stap lukluk i go long Jisas Kraes

Muv I Go Fored long Paoa blong Hem

Wetem ful hat blong mi, mi testifae se Jisas hem i Kraes. Taem yu tekem ol step i go long Hem mo invaetem Hem blong i kam paoa blong yu, bae Hem i kam long yu mo bae yu faenem Hem.⁴ I no gat wan joes we yu ting se bae yu mekem we bae tekem yu i go longwe long Hem. Mi biliv wetem ful hat blong mi long wanem we mi bin talem bifo: “I no posibol blong yu [o eniwan] i save draon i go daon olgeta bitim bigfala laet blong Atonmen blong Kraes”⁵

Sapos yu kam long Kraes, faswan mo oltaem kipim ol komanmen blong Hem “wetem evri tingting blong hat” (3 Nifae 18:32), Hem bae wokbaot long rod blong laef ia wetem yu. Hem bae tekem han blong yu mo stap olsem hop blong yu. Hem bae i paoa blong yu. Mo Hem bae i givim hapines we i no save finis, tru pis, mo glad long yu.

Olsem wan spesel witnes blong Hem, mi testifae mo promes se hemia hem i tru.