“Yu mo Sevya fesem Wol ia,” Blong Yut Oli Kam Paoa, Maj 2024.
Paoa blong Winim Wol ia
Yu mo Sevya fesem Wol ia
Ol samting blong spolem man, ol temtesen, fasin blong givim hadtaem long man—Jisas Kraes i bin winim ol samting blong wol ia mo i save givim paoa long yu blong winim olgeta tu.
Pikja droing i kam long Alex Nabaum
Jisas Kraes i winim wol ia, mo Hem i invaetem yumi blong mekem i semmak. ?Be wanem ia “wol,” mo wanem nao i minim long yumi blong winim wol?
Presiden Russell M. Nelson i putum olsem ia: “[Stap Winim wol ia] i minim blong stap winim ol temtesen blong kea moa abaot ol samting blong wol ia bitim ol samting blong God.”1
“Ol samting blong wol ia” i ingkludum ol samting we yu gat, fasin blong kam popula, paoa, fasin blong putum yu antap, samting we i givim hapines, o eni samting bakegen we man blong wol ia i laekem olsem pat blong bodi blong mit mo bun. Iven sapos sam long olgeta samting ia oli no nogud, taem lukluk blong yumi i no lukluk blong yumi long God from yumi stap kea moa abaot ol samting blong wol ia, yumi stap wokbaot long trabol we bae i stap blong longtaem.
Jisas Kraes i tijim se bae yumi fesem fasin blong go agens mo fasin blong givim hadtaem taem yumi stap winim wol ia (luk long Jon 15:18–21). Be yet, yumi save faenem pis mo “yufala i no fraet” from Hem i winim paoa blong olgeta samting blong wol ia finis (Jon 16:33).
Ol yut ia oli faenem paoa long Jisas Kraes blong winim ol samting blong wol ia, mo yu tu yu save mekem!
Ol samting blong Wol we oli Pulum Tingting
Mi spendem ol aoa blong stap plei long kompiuta gem evri dei blong plante yia. Mi faenem ol fren, mo mi filim se i impoten. Be afta we mi plei, bae mi filim emti, olsem wan samting i lus. Mi no hapi fulwan.
Mi wantem blong lukluk nomo long ol samting we bae i mekem mi hapi mo helpem mi blong kam antap. Mi stat blong stap prea oltaem. Taem mi talemaot wanem i stap long hat blong mi long Papa long Heven mi filim wan strong filing blong lav.
Mi wantem blong mekem ol samting we bae i mekem mi kam kolosap long Kraes, mekem se mi lukluk nomo long ol simpol samting olsem stadi long skripja evri dei mo prea, spenem taem wetem ol pipol we oli gat spirit, mo stap traem blong no foldaon long ol samting we bae i mekem Tabu Spirit i aot long mi. Laef blong mi i jenis. I givim moa glad long mi
Taem mi kam kolosap long Kraes, mi save se i gat plante moa impoten samting bitim ol kompiuta gem sapos mi wantem blong stap hapi tru. I gat ol samting we oli no save finis.
Alina U., 18, Lithuania
Ol Hadtaem long Wol ia
Long skul, ol fren blong mi oli stap spolem mi mo tok jikim mi from ol bilif blong mi. From hemia mo ol narafala jalenj, mi filim olsem se wol ia i mekem laef blong mi evri dei i had. Be mama blong mi i leftemap tingting blong mi blong dipen long Atonmen blong Jisas Kraes from Hem i andastanem ol harem nogud ia mo i save givim mi pis mo kamfot (luk long Doktrin mo Ol Kavenan 19:23).
Mi disaed blong promesem Papa long Heven se bae mi lego kakae evri dei. Mi askem Hem blong helpem mi wetem ol wiknes mo hadtaem blong mi, mo Hem i bin mekem stat long taem ia kasem tedei.
Lego kakae i bin tekem mi i kam kolosap long papa long Heven mo Jisas Kraes. Mi save se Tufala i stap oltaem long saed blong mi, stap givim mi paoa blong winim ol jalenj mo faenem tru hapines. Jisas Kraes i hilim ol soa blong mi mo i stap helpem mi blong gobak long Papa blong mi long Heven.
Vera R., 17, Brasília, Brazil