Paoa long Wiknes

Wok wetem Wiknes Hem i Spesel Wok blong Sevya

I kam long Tyler mo Kiplin Griffin

Jisas Kraes i save helpem yumi blong gro tru long ol traehad, i no blong go tru long olgeta traehad nomo.

ol pikja droing i kam long Uran Duo

Mason i no filim lav blong God olsem we hem i filim bifo. Hem i bin faet wetem wan helt kondisen long saed blong sik long tingting blong sam yia wetem smol sakses nomo, mo hem i wari se ol drim blong hem bae oli neva kam tru.

Anna i harem ol narafala yut oli stap tokbaot ol eksperiens wetem revelesen mo ol merikel. Nomata hem i traem, hem i filim olsem se hem i no kasem ol ansa o gat eksperiens ia long saed blong spirit olsem evri narafala wan.

Ethan i no save sapos hem bae i save kam klin o stap klin inaf bakegen. Hem i bin foldaon long ol temtesen plante taem mekem se hem i filim se hem i lusum kontrol mo tingting sapos hem i lusum fogud ol promes blesing blong hem. Hem i wari sapos hem i save kasem fogivnes mo gohed blong filing gilti long jos.

Madison i gat ol hadtaem wetem wan helt kondisen long saed blong kakai. Olivia i gat disabiliti long saed blong lan. Conner i traehad wetem helt kondisen long saed blong tingting (no save kontrol ol tingting blong sem). Abigail i fesem abius mo filim olsem se hem i no gat valiu. Papa mo mama blong Jake tufala i divos, mo hem i harem nogud mo i konfius. Jayden i go tru long fasin we man i spolem hem mo hem i filim se hem i no save fogiv.

Ol pipol oli gat plante hadtaem, be evriwan oli gat wan ansa nomo. Ansa ia i gat nem—Jisas Kraes Evri pipol ia oli wantem blong filim strong, klin, hapi mo kam oraet bakegen, be oli no save winim ol problem ia olgetawan. Be Jisas Kraes i oferem help. I tru, wok wetem wiknes Hem i spesel wok blong Hem. Help blong Hem i no kam stret olsem we o taem yumi wantem, be hem i kam.

Hemia samfala prinsipol blong helpem yumi akseptem invitesen blong Sevya blong wokbaot wetem Hem (luk long Moses 6:34), speseli taem yu stap faet wetem wiknes.

Laef I Sapos blong i wan Tes

God i lavem yu moa bitim we Hem i lavem kamfot mo help blong yu. ?Hamas long ol hiro blong yu oli eksperiensem kamfot mo sakses? Ol janis oli we, olgeta oli gogohed blong fesem ol bigbigfala wok blong agens mo hadtaem. Olsem pat blong tes blong yumi long laef, “Lod i luk se i stret blong stretem ol pipol blong hem; yes, hem i testem fasin blong olgeta blong save wet long taem mo fet blong olgeta” (Mosaea 23:21). Bae yumi no laekem, be plante taem ol had taem blong yumi oli givim yumi plante gudfala janis blong gro.

Wiknes I No wan Saen se God i No Glad

Plante pipol blong bifo oli biliv se sik long saed blong bodi mo long saed blong tingting oli wan saen blong panismen blong God (luk long Jon 9:2). Be wiknes i wan pat blong laef we i kam wetem taem blong Foldaon. Tingting i faet wetem ol jalenj hem i wan nomol mo impoten pat blong plan blong Papa long Heven, be blong fesem ol jalenj ia yuwan i no pat blong plan. Jisas Kraes i no kam blong jajem yumi; Hem i kam blong lavem mo help blong tekem bak olgeta we oli lus, no strong, o stap olgetawan—we hem i evriwan long yumi (luk long Jon 3:16–17; Luk 15).

Wik Samting Oli Kam Strong tru long Kraes

Hem i impoten blong lukluk yumiwan tru long kavenan koneksen blong yumi wetem Kraes mo dipen long Fasin blong Hem we i stret evriwan bitim blong lukluk yumi long ol samting we yumi no strong long hem. Jisas Kraes i neva tanem baksaed long olgeta we oli no strong we oli no stop blong lukaotem hem tru long fet. God i givim “wiknes long ol man blong mekem se oli save putum tingting blong olgeta i stap daon; mo gladhat blong [Hem] i inaf blong evri man we i putum tingting blong olgeta i stap daon long fored blong [Hem] ; gat fet long [Hem] , nao ol samting ia we oli no strong long olgeta, bae [Hem] i mekem olgeta oli winim mo kam strong long olgeta.” (Ita 12:27). Taem yumi tekem ol hadtaem blong yumi i go long Lod wetem wan hat we i fulap wetem sore mo wan spirit we i wantem blong sakem sin (luk long 3 Nifae 9:20), Hem bae i no tekemaot olgeta wantaem, be Hem bae i help blong givim yumi paoa.

Gat Fasin blong Save Wet Longtaem wetem Yuwan.

Kavenan rod i wan longfala rod, i no wan resis. Stap folem rod ia i helpem yumi go tru long ol rod we i fasfas mo tanem, i go antap i go daon, ol glad mo ol denja, sansaen mo ol hariken blong laef. Plante lesen yumi save lanem long evri step long rod ia. Gladhat blong Jisas Kraes i kam plante taem, i no long ol taem we yumi stap yumiwan nomo o long ol gudfala taem.

Konek wetem Kraes

Sapos yu filim wik o gat hadtaem, akseptem invitesen blong Sevya: “Kam long mi, nao mi bambae mi tekemaot ol hevi samting ya, mi mekem we yufala i spel gud” (Matiu 11:28). Faenem ol wei blong helpem yu konek wetem Hem. Taem yu go from Hem, bae yu faenem se Hem i stap kam from yu mo bae Hem i neva givap long yu! Laef bae i no stret gud evriwan, o bae i fri long wiknes, soa long bodi, mo hadtaem. Be bae i kam gud wetem Masta blong Hilim man long saed blong leftemap yu taem yu foldaon, fasem gud ol soa blong yu, mo gaedem yu long ol rod we i lid i go long glad we i no save finis.

Jisas Kraes i spesel man blong wok wetem wiknes. !Hem i spesel man ia blong stap wok wetem yu!