“From Wanem Mi Nidim Jisas Kraes,” Blong Ol Yut Oli Kam Strong, Maj 2024.
Paoa long Rilesensip blong Yu wetem Hem
From Wanem Mi Nidim Jisas Kraes
Andastanem rilesensip blong yumi wetem Sevya hem i impoten.
Han blong Masta, i kam long Kelsy mo Jesse Lightweave
“From wanem mi nidim Jisas Kraes?” Hem i wan impoten kwestin blong askem long yuwan—i no blong “evriwan” o famli blong “yumi.” Be, “Mi.” ?Wanem nao ansa blong mi long kwestin ia?
Ansa we mi faenem blong miwan i kam tru long wok blong fet blong miwan; evri dei mi wok had blong laef folem kavenan blong mi, we i gat kavenan blong baptaes; mo stap lanem blong lisin long voes blong Lod tru long Spirit blong Hem. Mo moa impoten, from hem i mekem mi gat rilesensip ia wetem Sevya blong mi.
Wan Rilesensip wetem Sevya
Mi no fraet blong givim ol lis blong risen from wanem mi nidim papa mo mama blong mi o ol gudfala fren blong mi. Mi bin fidim ol rilesensip ia oltaem. Valiu blong olgeta long laef blong mi i ril mo strong taem ol efot we mi putum blong stap kolosap long olgeta tru long simpol samting olsem storian oltaem, kam blong save gud olgeta, mo letem ol waes tingting we oli stret mo gud oli jenisim laef blong mi.
Rilesensip blong yumi wetem Jisas Kraes i save folem wan semak paten olsem. Prea evri dei long Papa long Heven long nem blong Jisas Kraes hem i impoten. Mo blong stap kam blong save Sevya tru long stadi long ol skripja, stap ridim ol toktok blong ol profet mo ol aposol, mo stap lisin long Spirit. Mi mekem rilesensip blong mi i strong taem mi letem evri samting we mi lanem i jenisim laef blong mi mo fasin blong mi.
Mo tu, tingting long plan ia blong fasin blong sevem man. Taetel ia, “plan blong fasin blong sevem man,” i talem se yu mo mi—evri pipol—yumi nidim blong sevem yumi, mo plan blong sevem man i bin pat blong disaen blong laef ia. Yumi nidim help mo yumi no save sevem yumiwan.
Be God i sendem yumi i kam long wol wetem wan promes we i no gat en se Hem bae givim wan Sevya, Jisas Kraes, we bae i winim ol hadtaem we oli seperetem yumi long presen blong God.1 Mo taem yumi mekem wan kavenan wetem God, Hem i promes blong mekem evri samting we Hem i save mekem, be bae i no tekemaot paoa ia blong jus long yumi, blong helpem yumi blong kipim ol tabu promes blong yumi long Hem.2
Foto we Tracy Y. Browning i glad blong givim
Mi Nidim blong Save se Hem i Andastanem
Mi bin kasem baptaes taem mi gat 16 yia mo mi stap long Niu Yok Siti. Long stat mi filim olsem mi stap spendem tumas taem blong faenem wei bitwin niufala fet blong mi, wetem kavenan rilesensip ia wetem God, mo ol rilesensip blong mi wetem ol fren.
Mi bin wari se mi no gat ol fren long skul we mi save konek wetem. Be ol fren blong mi oli stap mekem ol samting we mi kam blong luksave se oli nogud long spirit blong mi mo oli no sapotem mi blong tekem long miwan nem blong Jisas Kraes. Mi save se Jisas Kraes i wantem mi blong mekem ol gudfala joes.
Wanem mi no bin save i we, Sevya i andastanem hamas mi fasfas long tingting. Evri dei i kam moa had taem oli invaetem mi blong mekem olgeta samting we mi save se oli no stret. Samtaem mi traem blong talem se i gud nomo, be mi save se mi stap go agensem ol samting we mi no mas mekem.
Mi nid blong save se Sevya i andastanem se mi no gat fren mo wari taem mi lukdaon long ol gospel standet, hemia blong mekem se mi save pat wetem ol fren blong mi. Mi filim olsem se mi stap draon. Mi nidim man blong sevem mi. Mi nidim Jisas Kraes.
Taem Rilesensip blong Mi wetem Hem i Strong Moa
Rilesensip blong mi wetem Jisas Kraes i strong moa taem mi wan mi faenem aot from wanem mi nidim Hem. Stat long taem ia mi stat blong muv aot long fasin ia blong save se mi sud laef folem gospel, i kam long andastaning ia se mi wantem laef folem gospel mo askem help blong mekem hem ia. Mi go daon long ol ni blong mi mo talemaot hat blong mi long God, wetem hop se Hem i kea long mi mo problem blong mi, se plan blong sevem man i disaen blong helpem mi, iven hapines blong mi hem i pat blong plan ia.
Presiden Russell M. Nelson i tijim se, “Taem yu mo mi i mekem wan kavenan wetem God, rilesensip blong yumitu wetem Hem i kam moa kolosap bitim taem we yumi no bin mekem kavenan yet wetem Hem bifo. … From kavenan blong yumi mekem wetem God, Hem bae i neva taed long ol efot blong Hem blong helpem yumi, mo bae yumi neva yusum finis ol sore mo longfala tingting blong Hem we hem i gat long yumi.”3
Mi toktok long Papa long Heven abaot filing ia blong sem we mi gat, olsem wanem nao mi no save wanem blong mekem blong kipim ol standet blong mi mo ol fren blong mi. Mi talem long Hem se mi no glad mo mi rili nidim help blong Hem.
Long ol ni blong mi we mi stat blong eksperiensem pis. Filing blong pis ia i helpem mi andastanem se Sevya i save olsem wanem mi filim mo se Hem i kea—tumas long mi.
Taem mi gro i kam bigwan mo kasem plante tingting, mi luksave se evri taem mi kam long God blong askem help o fogivnes, i olsem se mi stap go long Garen blong Getsemane, long ples we Sevya i seksek from bigfala soa mo stat blong safa long bodi mo spirit from ol mistek mo ol sin we oli seperetem yumi long God.4 Hemia i wan rimaenda se Hem i andastanem wanem mi mi stap go tru long hem—bitim eni narafala man.
Long Hat we i Stap Daon, Sevya blong Yumi, i kam long Jay Bryant Ward
I No Hemwan
Taem mi stanap afta we mi nildaon blong prea, Spirit i helpem mi blong luksave ol samting mo helpem mi blong mekem ol narafala samting. Faswan, mi tingbaot se wan long ol fren blong mi hem i Muslim mo mifala neva askem hem blong i agensem ol standet blong hem from mifala i respektem fet blong hem mo andastanem se i gat samsamting hem bae no save mekem. Mi kasem insperesen blong serem niufala fet blong mi wetem ol fren blong mi blong olgeta tu oli andastanem moa abaot mi mo from wanem ol niufala standet blong mi oli impoten long mi.
Mi stat smol. Mi talem long wan fren olsem wanem mi bin stap traehad. Fren ia i gud mo gat plante respek. Hem i helpem mi taem mi toktok wetem ol narafala fren blong mi. I no evriwan oli andastanem, be wanwan taem, mi luk se oli mekem ol plan we mi save tekpat long hem we i no go agensem ol promes blong mi long God.
Mi save se yumi evriwan i save yusum moa paoa blong stanap agensem paoa blong wol ia. Stap kipim ol kavenan i help wetem hemia, mo Jisas Kraes i impoten tumas long ol kavenan blong yumi ia.5 Hemia wanem we mi faenemaot blong miwan—from wanem mi nidim Jisas Kraes.
Blong gobak stap wetem God i no wan samting we mi save mekem mi wan nomo. Mo i gat plante smolsmol step mo evri dei eksperiens we mi—mo evriwan long yumi—bae i mekem long rod ia i go bak hom. Be yumi we yumi mekem kavenan mo kipim kavenan, God “bae i neva stop long ol efot blong Hem blong helpem yumi” kasem taem yumi kasem long we.