“?Mi Save Givim Seves Sapos Mi Sem blong Toktok long Man?,” Blong Ol Yut Oli Kam Strong, Maj 2024.
Paoa blong Givim Seves
?Mi Save Givim Seves Sapos Mi Sem blong Toktok long Man?
Sevya i save givim paoa long yumi iven sapos yumi gat had taem blong kasem ol pipol.
Taem mi bin stap long hae skul, mi ting se mi no gat valiu olsem wan disaepol blong Jisas Kraes from mi fesem hadtaem blong stap toktok wetem pipol. Mi no sem nomo be—mi bin sem bitim mak! Mi bin sem tumas mekem mi gat hadtaem blong stap mekem fren mo soem huia mi stret long ol fren long klas blong mi long skul mo long jos.
From samting ia, mi blokem mi long ol koling insaed long Yang Woman mo mi filim olsem se mi no save strong long saed blong spirit olsem ol fren blong mi we oli toktok moa mo mekem plante fren bitim mi.
!Taem mi graduet long hae skul mo disaed blong go long misin, mi bin fraet bigwan!
Mi filim olsem God i wantem mi blong go long misin, be fas tingting long maen blong mi se, “From wanem God i wantem wan man olsem mi blong givim seves? !Mi no save toktok long ol pipol!”
Nomata we mi fraet tumas, mi bin disaed blong trastem God mo go givim seves long wan misin.
Stap Dipen long Paoa blong Kraes
Taem mi givim seves, ol samting oli had long stat, be taem mi stap gohed blong traem, (mo letem mi blong foldaon) mi faenem se Lod i givim mi paoa blong mekem wok we Hem i askem mi blong mekem.
Long Buk blong Momon Lod i talem se: “Mo sapos ol man oli kam long Mi bae Mi soem long olgeta, wiknes blong olgeta. Mi givim wiknes long ol man blong mekem se oli save putum tingting blong olgeta i stap daon; mo gladhat blong mi, i naf blong evri man we i putum tingting blong olgeta i stap daon long fored blong mi; from sapos oli putum tingting blong olgeta i stap daon long fored blong mi, mo gat fet long mi, nao ol samting ia we oli no strong long olgeta, bae mi mekem olgeta oli winim mo kam strong long olgeta.” (Ita 12:27
Long misin blong mi, mi kam blong luksave se Jisas Kraes i save mekem plante gudgudfala samting wetem mi, i no from paoa blong mi be from paoa blong Hem. Mo mi luksave tu se paoa blong Hem i no kam long mi from we mi wan misinari, be i wan samting tu we mi save dipen long hem long hae skul.
Naesfala samting abaot Jisas Kraes hem i we yumi no nidim ol digri o longfala stori blong yumiwan blong givim seves long kingdom blong Hem mo stap ol strong disaepol! Sapos yumi gat tingting i stap daon mo strong tingting blong givim seves, Jisas Kraes bae tekem yumi olsem we yumi stap, weaples yumi stap, mo givim long yumi wanem Hem i nid blong givim blong helpem mo givim yumi paoa blong givim seves long Hem.