“Wetaem Nao Bae Mi Stopem Filing ia se Mi Rong mo Sem?,” Blong Ol Yut Oli Kam Strong, Maj 2024.
Paoa blong Winim Sin
?Wetaem Nao Bae Mi Stopem Filing ia se Mi Rong mo Sem?
Samtaem i isi blong filim se yu no gat hop long yuwan bitim blong filim lav blong Sevya we i gat long yu—be olsem we Nifae i save, i no mas olsem ia.
Taem yu mekem wan samting i rong, maet yu save gat ol tingting bae i kam long yu se yu nomo save win. Se yu mas save gud samting ia. Se yu no nidim lav blong narafala man.
Dip daon, yu save se i no gat wan long ol samting ia i tru. Yu bin lanem se yu yu impoten olsem wan pikinini boe o pikinini gel blong God, mo yu save se fasin blong sakem sin hem i ril mo i posibol. Be afta, taem yu sin o mekem wan mistek, yu kasem temtesen blong panisim yuwan moa bitim we eniwan we bae i mekem, wetem ol tingting se yu yu rong mo sem.
Iven sam long ol fevret man blong yumi insaed long skripja oli bin filim olsem ia samtaem.
?Iven Nifae?
Afta we hem i raet abaot ded blong papa blong hem, Nifae i raet, “Be, i nomata long bigfala gud fasin blong Lod, we hem i soem long mi ol bigfala mo gudfala wok blong hem, hat blong mi i singaot se: “!O, mi mi wan man we mi no hapi tumas! Yes, hat blong mi i sore from bodi blong mit mo bun blong mi; sol blong mi i harem nogud from ol rabis fasin blong mi. Ol temtesen oli raonem mi, tugeta wetem ol sin we oli givim isi trabol long mi. Mo taem we mi bin wantem stap hapi, hat blong mi i mekem noes olsem we i harem i soa tumas from ol sin blong mi” (2 Nifae 4:17–19).
Hemia Nifae ia we yumi stap tokbaot—semmak man we i winim plet blong bras aot long Leban, i mekem wan bonara long wanem we hem i faenem long drae ples, mo bildim wan sip we hem i neva bildim wan bifo. Hem i gat wan testemoni abaot wanem we God i mekem i gud tumas long hem; semtaem hem i filim se hem i no inaf from ol sin mo wiknes blong hem.
?Wanem nao bae yumi mekem? ?Sapos Buk blong Momon hiro blong yumi i traehad wetem ol filing blong rong mo se hem i no inaf, wanem nao yumi save mekem taem yumi filim semmak olsem?
Ki Hem i Blong Lukluk Nomo long Jisas Kraes
Stori blong Nifae i no finis long ples ia. Ki blong Nifae i blong muvum lukluk blong hemwan i go long Jisas Kraes.
Taem Nifae i stap harem nogud, hem i talem “Be mi save huia mi bin trastem. God blong mi i sapot blong mi” (2 Nifae 4:19–20).
Afta we hem i jenisim tingting blong hem, skripja hiro blong yumi i nomo lukluk long harem nogud we hem i filim from ol mistek blong hem. Be, hem i glad long Sevya blong hem! Nifae i se, “Stap hapi, O hat blong mi, mo krae long Lod, mo talem se: “O Lod, bae mi presem yu blong oltaem.” Yes, sol blong mi bae i hapi long yu, God blong mi, mo strong ston we bae i sevem mi” (2 Nifae 4:30).
Olsem Nifae, yu save faenem sore, fogivnes mo pis tru long Jisas Kraes. Bae yu save filim olsem se yu no save givim gladhat long yuwan, be i gat Wan we bae i givim. Elda Jeffery R. Holland blong Kworom blong Olgeta Twelef Aposol i se “Olsem ia nao gladhat blong Kraes i sevem yumi long fasin blong tok nogud abaot yumiwan bakegen.”1
Taem yu filim daon tumas we i mekem se yu no save luk wan wei blong winim ol sin mo mistek blong yu, tingbaot se Papa long Heven mo Jisas Kraes oli neva stop blong lavem yu. Lukluk long Sevya, mo Hem i save helpem yu winim ol sin mo filing ia se yu rong.