“Simpol mo Fulap long Paoa blong Helpem Ol Narafala Man Oli Kam long Kraes,” Blong Ol Yut Oli Kam Strong, Maj 2024.
Simpol mo Fulap long Paoa blong Helpem Ol Narafala Man Oli Kam long Kraes
Yu gat plante wei blong soem lav, serem ol bilif blong yu, mo invaetem ol narafala man blong kam long Jisas Kraes.
Wan dei, long taem we mi stap long yia elefen blong mi, fren blong mi Nedra i askem long mi se “?Russ, from wanem nao yu no stap go long seminari?”
Long taem ia, papa mo mama blong mi oli no go long jos. Mi go long jos samtaem wetem ol fren blong mi, mo mi no patisipet long seminari. Long nekis dei, mi go long seminari long 6:30 long moning. Afta long hemia, mi bin go evri dei—iven taem blong kolkol, taem sno i ful daon long ol moning.
Ol samting we mi bin lanem long seminari i bin tajem hat blong mi. Testemoni blong mi i bin gro taem mi lanem moa abaot Jisas Kraes mo gospel blong Hem we i kambak. Hemia i mekem mi rere blong go givim seves long misin blong mi long Inglan mo blong gohed long wan laeftaem blong seves long Lod mo Jos blong Hem.
Invitesen blong Nedra long mi blong go long seminari i helpem mi blong luk, long wan lukluk we i blong miwan, se i gat plante janis blong yu blong helpem ol nara man oli kam long Lod Jisas Kraes. Be long ol simpol wei we oli fulap long paoa, yu save soem lav blong yu, serem ol bilif blong yu, mo invaetem olgeta we oli stap raon long yu blong eksperiensem glad mo pis we Sevya mo gospel blong Hem i givim.
Kam blong Save Sevya
Blong helpem gud ol narafala man oli kam long Kraes, faswan yu nidim blong andastanem huia Hem. Jisas Kraes Hem i Pikinini blong God mo Hem wan ia nomo we i save kam Sevya mo Ridima blong wol.
Hem nomo, laef blong Hem i stret gud evriwan, Hem i aton from ol sin blong yu, i harem nogud long “ol soa blong bodi mo fulap hadtaem mo temtesen” (Alma 7:11), mo afta i givim laef blong Hem mo tekem bak bakegen. From Jisas Kraes, evri pikinini blong God bae oli girap bakegen mo save kasem ol tabu mo naesfala blesing blong Hem.
Taem yu andastanem huia i Sevya—mo wanem kaen laef bae yu save gat afta long laef ia from Hem i mekem—yu bae wantem laef long wan wei we i mekem Hem i glad. Mo bae Hem i glad tumas taem yu talemaot gospel blong Hem, long toktok mo long aksen, long olgeta we yu toktok wetem olgeta evri dei.
Givim Help wetem Lav
Taem yu kam blong save mo lavem Sevya, yu bae wantem tumas blong folem Hem mo ol tijing blong Hem moa, hem i ingkludum komanmen blong Hem blong “lavlavem yufala” (Jon 13:34).
Taem Amon i go long Ol Man blong Leman blong prijim gospel, hem i givim hemwan olsem wokman blong King Lamonae. Amon i soem bigfala lav mo efot we i fulwan blong givim seves taem hem i protektem ol sipsip blong king. Aksen blong Amon i mekem hat blong King Lamonae i sofsof. Taem Amon i tijim gospel ia, Spirit i winim King Lamonae, mo hem i jenisim laef (luk long Alma 17–19).
Blong stap wan tru disaepol blong Jisas Kraes, i minim blong lavem ol neba blong yu olsem we yu lavem yuwan. (Luk long Matiu 22:36–40). Sapos olgeta oli filim se yu lavem mo kea long olgeta, bae oli glad moa blong gat yu blong serem long olgeta ol samting we yu save se oli tru.
Faenem Strong Paoa long Tingting blong Serem
Tru long Profet Josef Smit, Sevya i putumbak prishud long wol ia wetem evri odinens mo ol kavenan we oli impoten blong yumi save kasem laef we i no save finis. Taem naesfala mesej ia blong Restoresen i tajem hat blong yu, yu sut wantem blong serem! Yu sut wari blong faenem wei blong serem naesfala save blong gospel we i kambak wetem evriwan. !Mi laekem blong mekem hemia!
Sam bae oli wari se ol narafala man bae oli no intres o bae oli no akseptem wanem we bae olgeta oli serem. Yes, hemia i save hapen. Afta we Abis i ron from wan haos i go long narawan blong talem long ol pipol se paoa blong God i bin fulumap King Lamonae mo evriwan long haos blong hem, sam oli bin biliv, be plante narafala man oli jusum blong no biliv (luk long Alma 19:17–31).
Nomata se olgeta oli akseptem o nogat, bigfala presen we yu save givim long wan fren o famli memba—o iven wan enemi—hem i gospel blong Jisas Kraes. Prea blong gat strong tingting, mo afta, taem i stret, serem wanem yu save we i tru.
Givim Invitesen wetem wan Tru Hat
Taem mi stap givim seves olsem presiden blong Kanada Toronto Misin, mi helpem sam misinari blong mi blong tijim wan impoten bisnis man. Afta long lesen blong mifala, mi invaetem hem blong prea mo askem Papa long Heven sapos mesej blong mifala i tru.
“Mi no save olsem wanem blong prea,” hem i talem.
Mi talem long hem se wanem we hem i nidim blong mekem hem i blong i nildaon mo askem Papa long Heven blong konfemem trutok ia long hem.
“Yu save mekem hemia!” Mi leftemap tingting blong hem.
Mifala i nildaon tugeta mo man ia i statem prea blong hem. Taem hem i finis, hem i askem se, ?“Wanem i hapen? Mi neva bin filim wan samting olsem ia bifo.”
“Wei ia nao Papa long Heven i ansarem ol prea,” mi talem. “Yu bin askem, mo hem i bin ansa.”
Mi oltaem tijim ol misinari mo ol memba raon long wol se fasin blong jenisim laef i stat wetem wanem pipol oli filim. Taem yu invaetem ol narafala man blong harem gospel, invaetem olgeta tu blong prea mo askem blong filim ol trutok insaed long hat blong olgeta. Sapos olgeta oli askem long God (luk long Jemes 1:5), wetem wan tru hat, wetem tru tingting mo fet long Kraes, olgeta oli save kasem wan konfemesen blong trutok tru long paoa blong Tabu Spirit (luk long Moronae 10:4–5). Hem i wan glad mo hapines blong helpem ol narafala man oli kam blong faenemaot trutok blong olgeta wan.
Tingbaot Se Evri Sol Oli Impoten
Yu neva save wanem bae hapen taem yu helpem ol narafala man blong kam long Kraes tru long fasin blong lavem, serem, mo invaetem. Eksampol, Ol Man blong Leman, oli ol man we yumi luk olsem se oli ol pipol we bae oli had blong akseptem gospel, be oli bin kam blong jenisim laef mekem se oli “neva ful daon i go lus” (Alma 23:6–7).
Yu no sud gat tingting ia evri taem yu serem gospel. Be long simpol mo wetem bigfala paoa, yu save testifae abaot trutok mo help blong introdiusum moa long ol pikinini blong Papa long Heven gospel ia we i kambak.
Taem yu luksave hamas evriwan long ol pikinini blong Papa long Heven oli impoten long Hem, yu bae wantem mekem evri samting we yu save mekem blong helpem ol nara man blong kam long Kraes mo kam insaed long laet blong gospel blong Hem, mo wokbaot long rod ia blong bodi we i no save roten mo laef we i no save finis.
?Wanem impoten eksperiens nao yu save gat long laef?