Paoa blong Rere mo Stap Kam

Win wetem Sevya

I Kam long David A. Edwards

Ol Magasin blong Jos

Sevya i stap helpem yu blong kasem ol stret mo gud samting we yu wantem blong fiuja blong yu.

Jisas Kraes i haggem wan gel

“Rere from fiuja blong yu.” I luk olsem hemia i mesej biaen long plante samting insaed long laef blong wan yut—long skul, long jos, long wok, long hom. Bae yu stat blong tingting se, “Yes, yes. Mi kasem.” I tru se yu save se fiuja blong yu i stap kam mo yu sud rere from. Mo dip daon, yu wantem mekem fiuja blong yu i gud.

Yu stat blong save hat blong yuwan. Yu stap lanem wanem yu rili wantem. Yu wantem blong mekem gud samting mo i gat mining wetem laef blong yu—blong mekem mak blong yu long wol ia mo long laef blong ol narafala pipol, blong givim seves long God mo evri narafala man. Yu kam blong save se hemia i stret mo bae i mekem yu yu hapi tru.

Hemia sam impoten samting blong save taem yu stap gro mo rere from fiuja.

• Lod i save hat blong yu (luk long Doktrin mo Ol Kavenan 6:16). From dip mo tru filing ia blong wantem tumas blong laef blong yu i gud mo i stret mo gud, Jisas Kraes i stap ia wetem yu blong mekem yu strong taem yu stap rere.

• Yu no stap rere nomo blong mekem ol samting; yu stap kam olsem we Papa long Heven mo Sevya oli save yu blong save kam olsem.

• Yu save stap glad long taem ia naoia taem yu stap rere tu from fiuja. Taem ia naoia long laef blong yu i spesel, mo ol gudfala joes we yu mekem i stap mekem yu rere from wan gudfala fiuja.

Taem yu stap tingting long wanem yu stap rere from, tingting tu abaot olsem wanem Sevya i save givim paoa long yu long rod blong yu. Mo tingting long wanem nao Hem i stap helpem yu blong kam antap gud long hem .

?Wanem Nao Yu Stap Rere From?

Hemia sam eksampol:

• Moa edukesen

• Ol tempol kavenan

• Misin

• Mared

• Wok mo wok We Yu Mekem Naoia

• Famli mo wok blong papa mo mama

• Fasin blong stap olsem wan disaepol blong ful laef blong yu

?Olsem Wanem Nao Papa long Heven mo Jisas Kraes Oli Save Givim Paoa long Yu Taem Yu Stap Rere?

Hemia sam eksampol:

1. Tufala i sendem Tabu Spirit, we i save:

   1. Kamfotem yu.

   2. Gaedem yu.

   3. Givim insperesen long yu.

   4. Rimaenem yu long ol samting we yu bin lanem.

   5. Givim yu strong paoa long tingting.

   6. Givim yu pis.

   7. Mekem ol fraet blong yu i lus.

2. Tufala i givim insperesen long ol profet blong tijim yu tru long:

   1. Jeneral konfrens.

   2. Ol Jos Magasin.

   3. Ol Spesel brodkas.

   4. Ol Jos websaet mo sosol Midia.

   5. Blong Ol Yut Oli Kam Strong: Wan Gaed blong Stap Mekem Ol Joes.

3. Tufala i givim insperesen long ol nara man blong helpem mo sapotem yu, hemia i ingkludum:

   1. Ol papa mo mama.

   2. Ol fren.

   3. Ol lida.

   4. Ol tija.

?Jisas Kraes i stap helpem yu blong Yu Kam Wanem Kaen Man?

Jisas Kraes i stap helpem yu blong kam moa olsem Hem—moa olsem Papa long Heven.

Tufala i glad long evri smol step we yu tekem—evri skripja we yu ridim, evri Jos asaenem we yu mekem i hapen, evri skul asaenmen we yu wok had long hem, evri tes we yu stadi from, evri praktis we yu go long hem, evri kaen toktok we yu talem, evri wok blong seves we yu givim, mo plante moa.

Wetem paoa blong Sevya, bae yu rere gud from fiuja blong yu bitim we sapos yu no stap wetem Hem. Mo bae yu kam wan samting we i moa bigwan.

Fasin blong stap rere i pat blong stamba tingting ia Blong Ol Yut Oli Kam Strong: Wan Gaed Buk blong Stap Mekem Ol Joes. Rid i save “helpem yu blong rere blong mekem ol tabu kavenan insaed long tempol, rere blong givim seves long wan misin, mo faenem glad taem yu stap folem Jisas Kraes truaot long laef blong yu.” Afta yu save “gat paoa we i kam long Hem blong mekem i hapen ol stamba tingting blong Hem long yu” ([2022], 2).

Gospel blong Jisas Kraes: Wan Plan blong Stap Kam

“Ol komanmen, ol odinens, mo ol kavenan blong gospel oli no wan lis blong ol samting we i nid blong mekem blong dipositim long wan akaon we oli mekem i stap long heven. Gospel blong Jisas Kraes i wan plan we i soem yumi olsem wanem blong kam ol pikinini olsem we Papa long Heven i wantem tumas yumi blong kam olsem.”

Presiden Dallin H. Oaks, Fas Kaonsela insaed long Fas Presidensi, Oktoba 2000 jeneral konfrens (Ensign, Novemba 2000, 32).

Gohed blong Rere

“Fiuja bae i gat glori long olgeta we oli rere mo oli gohed blong rere blong stap olsem ol tul long ol han blong Lod.”

Presiden Russell M. Nelson, “Akseptem mo Fesem Fiuja Wetem Fet,” Oktoba 2020 jeneral konfrens (Liahona, Novemba 2020, 75–76).

yang woman

“Mi no bin tekem Ol Yang Woman i impoten long mi blong sam taem olsem wan yangfala. Be wan dei mi luk mama blong mi (we i bin wan Yang Woman lida) i stap wok long ol projek blong yut program. Mi tingbaot we hem i givim insperesen long mi tru long eksampol blong hem blong gro long saed blong spirit, mekem se mi traem blong jenisim fasin blong mi.

“Mi series blong stat blong lanem wanem nao gospel blong Jisas Kraes i minim long laef blong mi. Plante yia i pas, mi bin filim wan witnes se gospel blong Jisas Kraes i tru. Iven we laef i had taem mi stap traem blong lukluk long laef blong mi long yangfala taem blong mi, taem mi gohed blong stap holem taet ol samting ia we mi save se oli tru olsem wan yangfala woman, mi gat plante eksperiens long saed blong spirit we i mekem testemoni blong mi i wanem we i stap tedei”

Sundae I., Misamis Oriental, Philippines