“Taem Harem Nogud i Kam,” Blong Ol Yut Oli Kam Strong, Maj 2024.
Paoa long Taem blong Harem Nogud
Taem Harem Nogud i Kam
Taem laef i mekem yu harem nogud, Jisas Kraes i save leftemap yu wetem hop.
Pikja droing i kam long Dean MacAdam
Yu save kasem plante samting long laef tru long had wok mo strong tingting blong mekem samting. Yu save go long bed eli, girap eli (luk long Doktrin mo Ol Kavenan 88:124), mo fulumap evri dei wetem stret mo gud fasin mo gat kontrol long yuwan.
Be yet, sam dei bae oli had bitim ol narafala dei.
Mo afta sam narafala dei … yes, oli had tumas we yu stat blong tingting se ol gudfala dei oli nomo gat.
?Wanem nao yu stap mekem long ol dei olsem? ?Wanem nao yu yu mekem taem ol gudfala efot blong yu, hemia i tekem tu ol bes efot blong laef long wan stret mo gud laef (prea, lego kakae, skripja stadi, go long jos mo tempol, mo plante moa), i olsem se i no naf? ?Taem yu pusum mo pusumaot harem nogud, be i luk olsem se i kambak be i moa bigwan?
Yes, yu lukluk long Jisas Kraes. Hop i wan presen long saed blong spirit (luk long Moronae 8:26). Mo evri presen long saed blong spirit oli kam long Jisas Kraes (luk long Moronae 10:17).
Taem laef i had tumas long yu olsem wan maonten we i stap foldaon long skae, hop, we i wan presen long saed blong spirit i save blong yu taem yu lukluk moa long Jisas Kraes.
“Lod i Mekem Yok blong Mi i No Hevi”
Laef i fulap long jalenj finis blong plante long ol man Venezuela bifo COVID-19 wol sik i kam long 2020, i mekem se laef blong evri dei i kam moa had. Blong Sebastian we i gat 11 yia mo famli blong hem, paoa blong Jisas Kraes nao oli nidim blong mekem oli glad mo hapi long ol taem blong harem nogud. “Mi filim nogud taem mifala i no save pem ol impoten prodak olsem kakae, klos, mo meresin,” Sebastian i talem. “Be mi gat fet se Lod bae gohed blong blesem mifala. Mi glad se mi bin save kasem petriakel blesing blong mi. I talem long mi ol samting we oli bin promesem long mi bifo mi kam long wol ia.”
Stap lukluk long Jisas Kraes we i pat blong yut stamba toktok blong las yia (“Mi save mekem evri samting, long paoa blong Kraes” [Filipae 4:13]) i bin pruvum tru se i bin wan bigfala help. “From ol hadtaem we i stap long kantri blong mi, stamba toktok blong yut blong las yia i rimaenem mi se Kraes bae i helpem mi blong win mo save mekem evri samting tru long Hem,” Sebastian i talem.
Hem i wan longfala rod, be Sebastian mo famli blong hem oli bin luk ol blesing mo hop long rod ia. “Lod i mekem Yok blong mi i No Hevi,” hem i talem. “Taem mi harem nogud, mi prea, stadi ol skripja, mo ridim petriakel blesing blong mi. Tangkyu long Hem, famli steseneri bisnis we mifala i statem tri yia i pas i bin gat plante sakses long yia ia. Mi wantem talem long ol narafala yangfala pipol se olgeta oli sud oltaem rere blong dipen long Jisas Kraes. Taem mi mekem hemia, mi save winim ol jalenj blong mi.”
Paoa tru long Moa Gud Lukluk
Profet Nifae, i go tru long bigfala hadtaem blong ful laef blong hem, i tijim naesfala trutok ia:
“Yufala i mas wokbaot fored wetem strong bilif long Kraes, wetem wan stret mo klin hop mo wan lav blong God mo blong evri man. From samting ia, sapos yufala i gohed strong, mo stap kakae gud long toktok blong Kraes, mo stap strong kasem en, luk, olsem ia nao Papa i talem: Bae yufala i kasem laef we i no save finis” (2 Nifae 31:20
Hop, i wan stamba sos blong kasem paoa agens, harem nogud, i kam taem yumi lukluk nomo long Jisas Kraes. ?Naoia, i taem blong tanem lukluk blong yu i go moa long Hem?