“Blong Ol Yut Oli Kam Strong: Mesej blong Sevya i kam long Yu,” Blong Ol Yut Oli Kam Strong, Maj 2024.

Wan Gaed i go long Paoa blong Hem

Blong Ol Yut Oli Kam Strong: Mesej blong Sevya i kam long Yu

I Kam long Elda Dieter F. Uchtdorf

Blong Kworom blong Olgeta Twelef Aposol

Gaed ia i helpem yu blong konektem ol joes blong yu long Jisas Kraes mo doktrin blong Hem.

Pikjarem long maen se yu stap blong olfala Galili, 2,000 yia bifo. Yu mo ol fren blong yu i bin kasem invitesen blong go long wan yut devosen long lokol saenagog, we i gat wan spesel ges spika we hem i: Jisas blong Nasaret. Mo i kam long sam poen blong mesej blong Hem, Jisas i invaetem ol yut we oli stap blong askem Hem ol kwestin.

?Ol wanem kaen kwestin nao yu ting se bae yu harem?

Mi ting se sam long ol kwestin bae i lukluk bak long kalja mo ol situesen blong taem ia. Be mi biliv se plante long olgeta bae oli semmak kwestin nomo we yumi gat tedei.

Eksampol, long Niu Testeman, ol pipol oli askem Sevya ol kwestin olsem hemia:

?Wanem nao mi nid blong mekem blong kasem laef we i no save finis?¹
?Hem i akseptem mi? ?Mi tu mi pat?²
?Sapos brata blong mi i sin agensem mi, hamas taem nao mi sud fogivim hem?³
?Wanem nao bae hapen long wol ia long fiuja? ?Bae mi mi sef?⁴
?Yu save hilim olgeta we mi lavem?⁵
?Wanem i tru tok?⁶
?Olsem wanem nao bae mi save se mi stap go long wan stret wei?⁷

?I no yumi evriwan i tingting long sem samting kolosap evri taem? Ova long plante handred yia i pas, ol kwestin oli no bin jenis tumas. Mo tu, lav mo sore blong Sevya long olgeta we oli askem ol kwestin ia. Hem i save olsem wanem laef i save fulap long trabol mo konfius. Hem i save olsem wanem i isi blong lusum rod blong yumi. Hem i save se yumi wari samtaem abaot fiuja. Mo hem i talem long yu mo mi, semmak olsem we hem i talem long ol man we oli biaen long Hem plante yia i pas:

“Hat blong yufala i no mas trabol.”⁸
“Mi nao rod ya, mo mi mi stamba blong trutok.”⁹
“Folem mi.”¹⁰

Taem yufala i gat ol impoten joes blong mekem, Jisas Kraes mo gospel blong Hem we i kambak i nambawan joes. Taem yufala i gat ol kwestin, Jisas Kraes mo gospel blong Hem we i kambak oli ol nambawan ansa.

Hemia from wanem mi lavem Blong Ol Yut Oli Kam Strong: Wan Gaed Buk blong Stap Mekem Ol Joes. Hem i poenem yumi i go long Jisas Kraes blong yumi save kasem paoa blong Hem. Mi kipim wan kopi long poket blong mi oltaem. Taem mi mitim ol pipol raon long wol we oli wantem save from wanem yumi, olsem ol memba blong Jos Ia blong Jisas Kraes, yumi mekem wanem we yumi mekem, mi serem gaed ia wetem olgeta.

Blong Ol Yut Oli Kam Strong i tijim ol tabu trutok abaot Sevya mo Wei blong Hem. Hem i invaetem yu blong mekem ol joes we oli folem ol trutok ia. Mo mi i serem ol promes blesing we Hem i givim long olgeta we oli folem Hem. !Plis ridim, tingting hevi, mo serem gaed ia!

Invaetem Hem i Kam Insaed

Jisas Kraes i wantem blong pat long laef blong yu—wan we i stap oltaem, evri dei, long ol gud taem mo nogud taem. Hem i no stap stanap nomo long en blong rod, be i stap wet long yu blong kasem Hem. Hem bae i wokbaot wetem yu long evri step. Hem i Rod ia!

Be bae Hem i no fosem rod blong Hem i kam long laef blong yu. Yu invaetem Hem i kam insaed, tru long ol joes blong yu. Hemia i from wanem wan gaed blong mekem ol joes, olsem Blong Ol Yut Oli Kam Strong, hem i impotem tumas. Evri taem yu mekem wan stret mo gud joes we i stanap long ol trutok we i no save finis, yu soem se yu wantem Hem i kam insaed blong laef blong yu. Ol joes ia oli openem ol get blong heven we oli lok, mo paoa blong Hem i kapsaed i kamdaon long laef blong yu.¹¹

Mekem wan Strong Koneksen

Yu maet tingbaot se Sevya i komperem olgeta we oli harem mo mekem folem ol toktok blong Hem long waes man we i “bildimap haos blong hem antap long strong ston.” Hem i eksplenem:

“Mo ren i foldaon, mo ol wota oli ron bigwan, mo ol win oli blo, mo oli kilim haos ia; mo i no foldaon, from i stanap antap long wan strong ston.”¹²

Wan haos i no stanap strong agensem wan strong win from haos ia i strong. Hem i no stanap strong agensem tu from se ston ia i strong. Haos ia i stanap strong agensem strong win from hem i fasgud long strong ston ia. Hem i paoa blong koneksen long ston ia we hem i impoten.

I semmak, taem yumi bildim laef blong yumi, hem i impoten blong mekem ol gudfala joes. Mo hem i impoten blong andastanem tabu trutok blong Sevya. Be paoa we bae yumi nidim blong stanap agensem ol strong win blong laef oli kam taem yumi konektem ol joes blong yumi wetem Jisas Kraes mo doktrin blong Hem. Hemia wanem we Blong Ol Yut Oli Kam Strong i helpem yumi blong mekem.

Eksampol, ol fren blong yu maet oli save se yu traem blong no yusum nogud toktok o lanwis we i blong spolem man. Bae oli luk yu helpem wan pikinini long skul we plante pipol oli no wantem hem o spolem hem. ?Be olgeta oli save se yu mekem olgeta joes ia from Jisas Kraes i tijim se “evri man mo woman oli ol brata mo sista blong yu—mo yes i tekem tu … ol man we oli defren long yu”?¹³

Ol fren blong yu maet oli save se yu go long jos evri Sandei. Oli maet luksave taem yu ofem wan singsing o no akseptem wan invitesen blong wajem wan spesel muvi. Be oli save se yu mekem ol joes ia from yu gat “wan kavenan rilesensip wetem Papa long Heven mo Jisas Kraes,” mo olsem pat blong komitmen ia blong folem Sevya, yu talem tangkyu “blong oltaem gat kampani blong tabu Spirit”?¹⁴

Ol pipol oli maet save se yu no dring o smok o yusum ol narafala drag. ?Be oli save se yu mekem ol joes ia from Jisas Kraes i bin tijim se “bodi blong yu hem i tabu,” “wan naes presen we i kam long Papa long Heven,” we Hem i mekem olsem Hem?¹⁵

Ol fren blong yu maet oli save se yu no stap giaman mo se yu tekem edukesen olsem wan impoten samting. ?Be oli save se hemia i from we Jisas Kraes i tijim se “trutok ia bae i mekem yufala i fri man”?¹⁶

Moa long evriwan, ?ol fren blong yu oli save se samtaem yu mekem ol joes we i no popula blong stap tru long ol standet blong Kraes from yu save se “Jisas Kraes i paoa blong yu.”?¹⁷

Hem I Paoa Blong Yu

Mi givim yu tru witnes blong mi se Jisas Kraes hem i Wei ia blong wan naes mo gudfala fiuja—fiuja blong yu. Mo Hem i Wei ia tu long wan naes mo presen ia we i gat glori. Wokbaot long wei blong Hem, mo Hem bae i wokbaot wetem yu. !Yu save mekem hemia!

Ol dia yang fren blong mi, Jisas Kraes Hem i paoa blong yu. Gohed blong wokbaot wetem Hem, mo Hem bae i helpem yu blong girap “wetem wing olsem bigfala pijin ia igel”¹⁸ i go from glad we i no save finis, we Hem i bin rere long hem i stap blong yu.