“Kunea Nomu Kaukauwa vei Jisu Karisito,” Me iSakisaki ni iTabagone, Maj. 2024.
Kunea Nona Kaukauwa
Kunea Nomu Kaukauwa vei Jisu Karisito
Sa nodra kaukauwa na itabagone o Jisu Karisito—o ira kece na itabagone e vuravura—ka okati talega kina o iko!
Rogoci Koya, mai vei Haley Miller
Au marau meu vakamacalataka na ilavelave digitaki oqo ni Me iSakisaki ni iTabagone . Na itukutuku, itaviqaravi, kei na italanoa mai vei ira na itabagone e veiyasai vuravura ena vukea na kena vaqaqacotaki na nomu ivakadinadina ni dua na dina bibi ka tawamudu eratou a tukuna na Mataveiliutaki Taumada. Ena vukui Jisu Karisito eratou a tukuna vakamatata, “O Koya na nodra ‘kaukauwa na itabagone.’”1 Oqo sa kena ibalebale ni o Jisu Karisito e nomu kaukauwa. Sa noqu masu ni ko na ciqoma na dina oqo ena reki ena gauna bibi oqo ni nomuni bula, ena gauna oqo ka tawamudu.
Na Tamata Kecega e Gadreva na Kaukauwa vei Karisito
O sega ni tiko eke ena veimadigi eso se cala. O ni digitaka mo ni lako mai ki vuravura mo ni vuli, tubu, cakava na veika e veivakurabuitaki, ka yaco mo ni vakataka cake na Tamamuni Vakalomalagi. Ena ilakolako oqo, o na sotava kina na gauna ni dredre, veivakatovolei, yalolailai, kei na lomaleqa e rawa ni vei ulabaleti. E rairai o vakila beka ni o tao tu ena dua na gauna saraga oqo.
Ena veigauna vakaoqori, yalovinaka nanuma ni lomani iko na Tamamu Vakalomalagi. Sa dau cakava oti oKoya, ka na dau cakava tikoga oKoya. Ena vuku ni Nona loloma tawayalani ka vinaka sara, a tala mai kina na Luvena, o Jisu Karisito, me vaqaqacotaki iko ka vukei iko mo toso ki liu. Ka sa lako mai o Jisu baleta ni lomani iko talega vakatitobu.
E ka ni rarawa, ni so na tamata era sega ni kila na nodra gadreva e dua na iVakabula. Era sega ni kila ni o ira, me vakataki ira na tamata kecega, era na caka cala ka sega ni vakavinakataka rawa, era na vakayalia na veika era na sega ni rawata tale, ka sotava na dredre kei na leqa era na sega ni rawa ni vosota vakataki ira. E sega talega ni rawa mera ulabaleta vakai ira na ivalavala ca kei na mate. Sa kena ibalebale oqo ni o ira —kei ira na tamata kecega—era gadreva na Veisorovaki i Jisu Karisito, kei na kaukauwa e rawa ni kauta mai.
“E sa totoka oqori, Elder Holland,” o na vakasamataka tiko beka, “ia meu cakava vakacava me noqu kaukauwa o Jisu Karisito?” Me vukea na saumi ni taro oqo, yalovinaka vakatara meu wasea e vica na sala tawa wili rawa e dau vaqaqacotaki iko kina e veisiga o Jisu Karisito.
Sa Voleka na Veisereki, mai vei David McClellan
E Tu Vua na Kaukauwa me Vaqaqacotaki Iko
Ena iotioti ni Nona bogi ena bula oqo, a curu ki na Were o Kecisemani o Jisu Karisito. E kea, a tekiduru o Koya ena maliwa ni veivunikau ni olive ka tekivu me taura vakai Koya na ivalavala ca ni vuravura. Na vakararawataki levu ka tawayalani oqo “sa vakavuna vei [koya], … ko koya sa kaukauwa sara, me sautaninini ena vuku ni mosi, sa tiri kina na dra mai na qara kecega ni yago[na]” (Vunau kei na Veiyalayalati 19:18).
A qai kau o Jisu ki Kalivari ka vakoti ki na kauveilatai. E kea a vakacavara kina na Nona isoro ni veivakaduavatataki. A solia na Nona bula ena lomasoli, ka qai lamata cake ena qaqa mai na mate. Ena Siganimate oqo, au reki ena noqu tukuna ni bula tiko o Jisu Karisito! Au vakaraitaka talega ni sega walega ni laveta cake o Koya na icolacola ni ivalavala ca ia a “vakila na mosi kei na veivakararawataki kei na veivakatovolei kecega” ena nona vakayacora vakakina (Alama 7:11; vakaikuritaki).
A vakila na iVakabula na mosi ni yalo kei na rarawa kei na vosota, ena sala ni tamata yadua, na yaluma kei na rarawa taucoko e sotava o iko, o au, kei na tamata yadua e sa bula oti, se ena qai mai bula. Ena vuku ni veika a lako curuma vakayago, vakasama, ka vakayalo vei iko, e kila o Koya na sala me vaqaqacotaki iko kina.
E rairai dredre vei iko mo vakabauta ni na kauwai o Jisu me vukei iko me vaka ni o dua ga vei ira na milioni o ni yabaki vata. Kevaka o nanuma ni tu Vua na veika vinaka cake me cakava mai na nomu vakaukauwataki ena nomu gauna ni leqa, vakasamataki Koya ena were o ya, vakasamataki Koya ena kauveilatai oya. O Koya a “mai rube, rarawa ka mate”2 ena vukumu baleta ni kila o Koya ni sa yaga vei iko. E se kila tikoga oqori o Koya. O Koya sa kauwaitaka sara, lomasoli, ka rawa ni vukei iko—ena gauna saraga oqo ka tawamudu. A solia na Nona bula me rawa ni vaqaqacotaki iko ena nomu ciqoma na Nona veisureti ni veisautaki-bula: “Dou lako mai vei au” (Maciu 11:28).
Digitaka mo Lako vata kei Koya
Sa nomu digidigi mo muri Jisu Karisito ka cakava me nomu kaukauwa o Koya. O Koya sa “mai dusimaka kivei au”3 na sala lesu vei Tamada Vakalomalagi. E dina sara, ni sai Koya “na sala, kei na vu-ni-dina, kei na vu-ni-bula” (Joni 14:6).
O na raica na sala ena nomu ciqoma na kosipeli i Jisu Karisito ena nomu vakabauti Koya ka veivutunitaka na nomu ivalavala ca. Ko na vakatitobutaka na kemu isema Vua ni ko digitaka mo papitaiso ena Yacana ka ciqoma na isolisoli ni Yalo Tabu. Mo qai tomana ena Nona salatu ni kosipeli ena nomu maroroya na ivakaro, ciqoma na cakacaka vakalotu, rokova na veiyalayalati, ka bula vaka Nona tisaipeli.
Na cakacaka oqo e bulia e dua na isema kaukauwa—e dua na isema ni veiyalayalati—ka vauci iko matua vei Karisito—kei Koya vei iko. Ni o lako vata kei Koya, sa yaco o Koya kei Na Tamada me nomu ivurevure cecere ni veidusimaki kei na kaukauwa vakayalo. Sa na qai rawa ni o toso ki liu ena bula taqomaki kei na marau ena veisiga, yaco mo vakataki Rau vakalevu cake, ka dua na siga mo lesu tale ka laki bula vata kei Rau ka rawata na mataqali bula e Rau bula kina.
Rai mai vei Au, mai vei Eva Koleva Timothy
Toso ki Liu ena Nona Kaukauwa
Au vakadinadinataka mai na vu ni yaloqu taucoko ni o Jisu na Karisito. Ni o kalawa yani Vua, dolele yani Vua, ka sureti Koya me nomu kaukauwa, ena lako mai vei iko o Koya ka o na kunei Koya.4 E sega ni dua na digidigi o na rawa ni cakava ena sega ni yacovi iko rawa yani kina o Koya. Au vakabauta taucoko na veika au a tukuna e liu: “ E sega ni rawa vei iko [se e dua ga] mo dromuci sobu mai na rarama tawayalani ni Veisorovaki i Karisito.”5
Kevaka o na lako mai vei Karisito, taumada ka dau muria na Nona ivakaro ena “loma[mu] taucoko” (3 Nifai 18:32), o Koya ena lakova vata kei iko na ilakolako ni bula oqo. Ena taura na ligamu o Koya ka nomu inuinui. Ena nomu kaukauwa o Koya. Ka na kauta mai vei iko o Koya na marau tawayalani, vakacegu dina, kei na reki cecere.
Me vaka ni‘u dua na Nona ivakadinadina digitaki, au vakadinadinataka ka yalataka ni dina na ka oqo.