“Ni Yaco na Rarawa,” Me iSakisaki ni iTabagone, Maji 2024.
Kaukauwa ena Gauna ni Rarawa
Ni Yaco na Rarawa
Ni sa biuti iko sobu na bula, sa rawa ni laveti iko o Jisu Karisito ena inuinui.
Droini mai vei Dean MacAdam
E rawa ni o toso vakayawa sara ena bula oqo ena cakacaka kaukauwa kei na gugumatua. E rawa ni o lai moce totolo, yadra vakamataka lailai (raica na Vunau kei na Veiyalayalati 88:124), ka vakasinaita na veisiga yadua ena itovo dodonu kei na bula vakaivakarau.
Ia, eso na siga era na dredre cake mai vei ira tale eso.
Ka so tale na siga … io, era na rui dredre sara o na rairai tekivu vakasamataka ni ra sa yali yani na siga vinaka me tawamudu.
Na cava o na cakava ena veisiga vaka oya? Na cava o na cakava ni nomu sasaga vinaka duadua, oka kina na nomu sasaga vinaka duadua mo bulataka e dua na bula savasava (masu, lolo, vuli ivolanikalou, lotu kei na curu ki na valetabu, kei na so tale), e vaka me sega ni veirauti? Ni ko biliga ka biliraka yani na yalolailai, ia e vaka me bili lesu mai vakaukauwa cake sara?
O na gole vei Jisu Karisito, vakaidina. Na inuinui e sa isolisoli vakayalo (raica na Moronai 8:26). Kei na veisolisoli vakayalo kece e lako mai vei Jisu Karisito (raica na Moronai 10:17).
Ni sa bikai iko sobu na dredre ni bula me vaka e dua na ulunivanua e lutu mai lomalagi, na isolisoli vakayalo ni inuinui e rawa ni nomu ni o vakanamata vakalevu cake vei Jisu Karisito.
“Sa Vakamamadataka na Turaga na Noqu iColacola”
A sa veibolei rawa tu na bula vei ira e vuqa na kai Venezuela ni bera ni qai yaco na matedewa na COVID-19 ena 2020, ia sa dredre sara mada ga na sasaga bula. Vei Sebastian yabaki 11 kei na nona matavuvale, na kaukauwa mai vei Jisu Karisito a gadrevi me ratou tudei ka marau tu ga ena gauna ni rarawa. “Au dau yalo ca ni keitou sega ni volia rawa na veika bibi me vaka na kakana, isulu, kei na wainimate,” e kaya o Sebastian. “Ia au vakabauta ni na vakalougatataki keitou tikoga na Turaga. Au vakila niu kalougata ni rawa niu ciqoma na noqu veivakalougatataki vakapeteriaki. E tukuna vei au na veika a yalataki vei au ni bera niu lako mai ki vuravura.”
Na vakanamata vei Jisu Karisito me tiki ni itoko levu ni itabagone ena yabaki sa oti (“Au sa rawata na ka kecega ena vukui Karisito” [Filipai 4:13]) a dua dina na veivuke levu. “Ena vuku ni veika dredre e sotava tiko na noqu vanua, na itoko ni itabagone mai na yabaki sa oti a vakananuma vei au ni na vukei au na Karisito meu uabaleta ka cakava na ka kecega ena Vukuna,” e kaya o Sebastian.
Sa dua na ilakolako balavu, ia eratou sa raica na veivakalougatataki kei na inuinui o Sebastian kei na nona matavuvale ena nodratou ilakolako. “Sa vakamamadataka na Turaga na noqu icolacola,” e kaya o koya. “Niu dau yalorarawa, au dau masu, vulica na ivolanikalou, ka wilika na noqu veivakalougatataki vakapeteriaki. Na vakavinavinaka levu Vua, ni neitou bisinisi ni iyaya ni volavola vakamatavuvale ka tekivu ena tolu na yabaki sa oti sa mai rawa-ka vakalevu sara ena yabaki oqo. Au vinakata meu tukuna vei ira na itabagone tale eso ni dodonu me ra dau tuvakarau tu ga me ra vakararavi vei Jisu Karisito. Niu dau cakava oqori, sa rawa niu vorata na noqu bolebole eso.”
Kaukauwa ena Vakanamata Vinaka Cake
Na parofita o Nifai, ka a vosota na dredre levu ena nona bula taucoko, a vakatavulica na dina totoka oqo:
“Mo dou toso ki liu ka tudei vei Karisito, ena taucoko ni nomudou vakanuinui, ka mo dou lomana na Kalou kei ira na tamata kecega. O koya, kevaka dou sa toso ki liu, ka kana magiti ena vosa i Karisito, ka vosota me yacova na ivakataotioti, raica, sa kaya vakaoqo na Tamada: Dou na rawata kina na bula tawamudu” (2 Nifai 31:20).
Na inuinui, e dua na ivurevure tudei ni kaukauwa mai na rarawa, e dau yaco mai ni da vakanamata vei Jisu Karisito. E sa gauna beka li me tosoi cake kina na nomu vakanamata Vua?