Kaukauwa ni Vakavakarau ka Yacova

Rawata vata kei na iVakabula

Mai vei David A. Edwards

Mekasini ni Lotu

Sa vukei iko tiko na iVakabula mo vakayacora na nomu gagadre dodonu me baleta na nomu veisiga ni mataka.

Jisu Karisito ni mokota na goneyalewa lailai

“Vakavakarau ki na nomu veisiga ni mataka.” E vaka oya na itukutuku e tiko ena nona bula e dua na itabagone—e koronivuli, ena lotu, ena cakacaka, e vale. O na rairai vakasamataka beka, “Io, io. Au sa taura rawa.” E dina sara o kila ni sa na yaco tiko mai na veisiga ni mataka ka dodonu mo vakavakarau kina. Ka titobu sara, o vinakata mo cakava me cecere na nomu veisiga ni mataka.

O sa kila tiko mai na yalomu vakai iko. O sa vulica tiko na veika o vinakata dina. O via cakava na veika vinaka ka vakaibalebale ena nomu bula—mo ivakaraitaki ki vuravura kei na nodra bula na tamata tale eso, mo qarava na Kalou kei ira na nomu itokani vakatamata. O sa mai kila tiko ni sa dodonu oqo ka na vakamarautaki iko vakaidina.

Ia, oqo eso tale na ka bibi mo kila tiko ni ko tubu ka vakavakarau ki na veisiga ni mataka:

• Sa kila talega na Turaga na yalomu (raica na Vunau kei na Veiyalayalati 6:16). Baleta ni sa vinaka ka dodonu na nomu gagadre titobu ka dina ena nomu bula, sa tiko kina vata kei iko o Jisu Karisito me vaqaqacotaki iko ni ko vakavakarau voli.

• O sega walega ni vakavakarau tiko mo cakava na veika oqori; o sa yaco tiko mo vakataka na ka erau kila na Tamada Vakalomalagi kei na iVakabula ni rawa ni o yacova.

• E rawa ni o marautaka na gauna oqo ni o vakavakarau tale tikoga ki na veisiga ni mataka. Na gauna oqo ena nomu bula e duatani, kei na digidigi vinaka o cakava sa vakarautaki iko tiko ki na veisiga vinaka ni mataka.

Ni o vakasamataka na veika o vakavakarau tiko kina, vakasamataka talega na sala e vakaukauwataki iko tiko kina na iVakabula ena nomu ilakolako. Ka vakasamataka na veika sa vukei iko tiko kina o Koya mo yacova.

Na Cava O Vakavakarau Tiko Kina?

Oqo e vica ga na kena ivakaraitaki:

• Levu cake na vuli

• Veiyalayalati ni Valetabu

• Kaulotu

• Vakamau

• Cakacaka

• Matavuvale kei na bula vakaitubutubu

• Bula vakatisaipeli ni bula taucoko

Erau Vaqaqacotaki Iko vakacava na Tamada Vakalomalagi kei Jisu Karisito ni o Vakavakarau?

Oqo e vica ga na kena ivakaraitaki:

1. Erau tala mai vei iko na Yalo Tabu, ka rawa ni:

   1. Vakacegui iko.

   2. Tuberi iko.

   3. Vakauqeti iko.

   4. Vakananuma vei iko na veika o sa vulica oti.

   5. Solia vei iko na yalodei.

   6. Kauta mai vei iko na vakacegu.

   7. Vakaseavutaka na nomu ririko.

2. Erau vakauqeti ira na parofita me ra vakavulici iko ena:

   1. Koniferedi raraba.

   2. Mekasini ni Lotu.

   3. Kakaburaki digitaki eso.

   4. Mataveilawa ni Lotu kei na vakauitukutuku raraba.

   5. Me iSakisaki ni iTabagone: E Dua na iDusidusi ni Digidigi.

3. Erau vakauqeti ira na tani me ra vukei iko ka tokoni iko, oka kina na:

   1. iTubutubu.

   2. iTokani.

   3. iLiuliu.

   4. Qasenivuli.

O Cei e Vukei Iko tiko kina o Jisu Karisito mo Yaco mo Vakataka?

Sa vukei iko tiko o Jisu Karisito mo vakataka vakalevu cake na mataqali bula e tiko kina o Koya—mo vakataka vakalevu cake na Tamamu Vakalomalagi.

Erau reki ena veikalawa lalai yadua o taura—na ivolanikalou kece o wilika, na ilesilesi yadua ni Lotu o qarava, na ilesilesi yadua e koronivuli o cakacakataka vakaukauwa, na veitarogi yadua o vulilesoni kina, na vakatovotovo kece o tiko kina, na vosa yalovinaka kece o cavuta, na veicakacaka kece ni veiqaravi o solia, kei na vuqa tale.

Ena kaukauwa ni iVakabula, o na vakavakarau vakavinaka cake ki na nomu veisiga ni mataka mai na kena o rawa ni rawata ni sega kina o Koya. Ka na yaco mo dua na ka cecere cake sara.

Na vakavakarau e tiki ni inaki ni Me iSakisaki ni iTabagone: E Dua na iDusidusi ni Digidigi. Ni o wilika e na “vukei iko mo vakavakarau mo vakayacora na veiyalayalati tabu e na valetabu, vakavakarau mo na lako i kaulotu, ka kune reki e na nomu muri Jisu Karisito e na nomu bula taucoko.” Sa na qai rawa mo “rawata na kaukauwa mai Vua mo vakayacora kina na Nona inaki vei iko” ([2022], 2).

Na Kosipeli i Jisu Karisito: E Dua na iTuvatuva ni Noda Rawa ni Yacova

“Na vunau, cakacaka vakalotu, kei na veiyalayalati ni kosipeli e sega ni dua na lisi me vakacurumi ki na dua na akaude vakalomalagi. Na kosipeli i Jisu Karisito e dua na ituvatuva e vakaraitaka vei keda na sala me da yacova rawa kina na ituvaki e gadreva vei keda na Tamada Vakalomalagi.”

Peresitedi Dallin H. Oaks, iMatai ni Daunivakasala ena Mataveiliutaki Taumada, koniferedi raraba ni Oko. 2000 (Ensign, Nove. 2000, 32).

Tomana mo Vakavakarau

“Ena lagilagi na veisiga ni mataka vei ira era sa vakavakarau tu ka tomana tiko na vakavakarau me ra iyaragi ni cakacaka e na liga ni Turaga.”

Peresitedi Russell M. Nelson, “Karona na Veisiga ni Mataka ena Vakabauta,” koniferedi raraba ni Okot. 2020 (Liaona, Nove. 2020, 75–76).

goneyalewa

“Au a sega ni taura sara vakabibi na Goneyalewa ena dua na gauna niu se yabaki tinivakacaca. Ia ena dua na siga au raici tinaqu (o koya e dua na iliuliu ni Goneyalewa) ka tuvanaka tiko na parokaramu ni cakacaka eso me baleta na itabagone. Au nanuma lesu niu a vakauqeti ena nona ivakaraitaki me toso ki liu vakayalo, kau sa saga meu veisautaka na noqu ivakarau ni bula.

“Au sa tekivu vulica vakaidina sara na ibalebale ni kosipeli i Jisu Karisito ki na noqu bula. Ena veiyabaki e muri, au vakila e dua na ivakadinadina ni dina na kosipeli i Jisu Karisito. Ena gauna mada ga a dredre kina na bula niu vakananuma tiko na noqu bula ni oti na noqu yabaki tinivakacaca, niu kubeta toka na veika au kila ni dina vaka goneyalewa, au a sotava e vuqa sara na veika vakayalo ka sa vakavuna na noqu ivakadinadina me yaco me vaka na kena ituvaki nikua.”

Sundae I., Misamis Oriental, Philippines