“12 na iVolanikalou ni Gauna O Vakila …,” Me iSakisaki ni iTabagone, Maji 2024, tabana–tabana.
Kaukauwa mai na iVolanikalou
12 na iVolanikalou ni Gauna O Vakila …
E sinai tu ena veivakauqeti na ivolanikalou, se vakacava tu na veika eda vakila tiko.
Droini mai vei Toby Newsome
Ena vica na yabaki sa oti, o Elisabeth A., 17, mai Arizona, Amerika, a tekivu lomaleqa voli, ka sa ca vakalevu sara mai. “Au dau vakila ena siga taucoko, ena veisiga,” a kaya o koya. “A dau dredre vei au meu lako curuma na veisiga.”
Me kune vakacegu, sa nanuma o Elisabeth me wilika na ivolanikalou ena veibogi. Ni toso na gauna, sa tekivu me marau cake mai.
“Au kila niu sega ni tiko duadua,” a kaya o koya. “Au kila ni lomani au na Kalou ka tala mai na Luvena, o Jisu Karisito, ka a vakila na noda mosi, mosi ni yalo, rarawa, kei na yaluma. Mai na ivolanikalou, sa kaukauwa kina na noqu veiwekani kei Karisito ka sa dua na rai vinaka ki na bula!”
A vulica o Elisabeth ni ivolanikalou era sinai tu ena veitikina kei na italanoa ni kena kunei na inuinui, vakacegu, kei na kaukauwa vei Jisu Karisito. E vuqa na noda qaqa taleitaki ena ivolanikalou era sotava na veibolei eso. Ena veigauna kece sara, era a kunea na inuinui, vakacegu, kei na kaukauwa ni ra vuki vei Jisu Karisito.
Na wiliki ni ivolanikalou ena sega beka ni walia na veika o sotava tiko, ia na dina eso e vakavulici ena ivolanikalou e rawa ni solia vei iko na kaukauwa kei na vakacegu. Oqo e vica na ivolanikalou e rawa ni o raica kevaka o gadreva e dua na vakasama veivakauqeti me baleti iko se dua na itokani. E rawa beka ni o kunea eso na nomu?
Ena gauna o vakila kina ni o …
Rarawa: Vunau kei na Veiyalayalati 68:6
O koya mo dou marau kina, ka kakua ni rere, ni’u sa tiko vata kei kemudou koi Au na Turaga, ka’u na tu e yasamudou.
Sega ni veiganiti: Luke 12:6–7
Ia sa wili kecega na drau ni ulumudou. O koya oqo mo dou kakua ni rere: dou sa uasivi cake vei ira na separo e vuqa.
Madua: Aisea 54:8
Ena lololoma sa sega ni mudu ka’u na lomani iko kina.
Yalolailai: Alama 26:27
Mo ni vosota vakadede na veika rarawa ena yaco vei kemuni, ka’u na qai solia vei kemuni na qaqa.
Vakanuinui matewale: Moronai 7:41
Dou na rawata na inuinui ena vuku ni veisorovaki i Karisito kei na kaukauwa ni nona tucake tale mai na mate.
Malumalumu: Ica 12:27
Ni kevaka era sa vakayalomalumalumutaki ira vei au, ka vakabauti au, au na qai vakayacora me vu ni nodra kaukauwa na veika malumalumu.
Taqaya: Vunau kei na Veiyalayalati 84:88
Au na tiko e yasamudou imatau ka tiko tale ga e yasamudou imawi, ia na Yaloqu ena tiko e lomamudou, era na vakavolivoliti kemudou na noqu agilosi me ra laveti kemudou cake.
Mosi: Same 30:2
I Jiova noqu Kalou, ka’u a tagi vei kemuni, ia ko ni sa vakabulai au.
Rere: Josua 1:9
Mo kaukauwa ka qaqa … ni sa tiko vata kei iko ko Jiova na nomu Kalou ena veiyasana kecega ko sa lako kina.
Tu duadua: Joni 14:18
Au na sega ni laivi kemudou mo dou luveniyali: au na lako mai vei kemudou.
Cudru: Moronai 7:48
Mo dou masuta na Tamada ena yalomudou taucoko me vakasinaiti kemudou ena loloma oqo.
Yalolekaleka: Vunau kei na Veiyalayalati 100:15
O koya, me vakacegu kina na lomamudrau; raica sa veivuke na ka kecega me ra vinaka kina ko ira era sa lako vakadodonu.