“O Iko kei na iVakabula kei na Vuravura,” Me iSakisaki ni iTabagone, Maji 2024.
Kaukauwa mo Vorata na Vuravura
O Iko kei na iVakabula kei na Vuravura
Na veivagolei tani, na veitemaki, na veivakacacani—sa vorata rawa ko Jisu Karisito na veika ni vuravura oqo ka rawa ni vaqaqacotaki iko mo vorata rawa talega.
Droini mai vei Alex Nabaum
A vakadrukai vuravura o Jisu Karisito, ka sureti keda o Koya meda cakava vakakina. Ia na cava “na vuravura,” kei na cava na kena ibalebale vei keda meda vorata rawa?
E kaya kina vakaoqo o Peresitedi Russell M. Nelson: “[Na vakadrukai vuravura] e kena ibalebale me da vorata na veitemaki me da kauwaitaka vakalevu cake na veika ni vuravura oqo mai na veika ni Kalou.”1
“Na veika ni vuravura oqo” e rawa ni oka kina na iyau, kilai, kaukauwa, vakacaucautaki, marau, se dua tale na ka e dau taleitaka na tamata vakayago me tiki ni bula oqo. Kevaka sara mada ga e sega ni dau ca tu ga eso na veika oqo, ni da vakayalia na noda vakanamata vua na Kalou baleta ni da kauwaitaka vakalevu cake na veika vakavuravura, eda sa vakaleqai ena dua na gauna balavu.
A vakavuvulitaka o Jisu Karisito ni da na sotava na veisaqasaqa kei na veivakacacani ni da vorata na vuravura (raica na Joni 15:18–21). Ia eda rawa tikoga ni kunea na vakacegu ka “[me da] vakacegu” baleta ni a vakamalumalumutaki vuravura taumada o Koya (Joni 16:33).
O ira na itabagone oqo era kunea na kaukauwa vei Jisu Karisito me ra vorata rawa na veivakataotaki vakavuravura, ka sa vakakina o iko!
Veivagolei tani Vakavuravura
Au a dau qitotaka na qito ena kompiuta ena veisiga ena vica vata na yabaki. Au a kunea eso na itokani, ka’u a dokadokai au. Ia ni’u qito oti, au dau vakila ni’u lala tu, me vaka e yali tiko e dua na ka. Au a sega ni marau vakataucoko sara.
Au a vinakata meu vakanamata ki na veika ena vakamarautaki au ka vukei au meu vinaka cake. Au a tekivu masu vakawasoma. Ni’u vakaraitaka na veika e tu e yaloqu vua na Tamada Vakalomalagi, au a vakila e dua na yalo kaukauwa ni loloma.
Au a vinakata meu cakava na veika ena uqeti au meu toro voleka yani vei Karisito, ka’u vakanamata ena veika rawarawa me vaka na vuli ivolanikalou kei na masumasu e veisiga, vakayagataki gauna vata kei ira na tamata e tu vei ira na Yalotabu, ka tovolea me ra kakua ni veivagolei tani na veika ena vakavuna me biubiu na Yalo Tabu. Sa veisau sara na noqu bula. E sa ka rekitaki cake sara vei au.
Ni’u toro voleka yani vei Karisito, au kila ni levu cake na ka e bibi cake mai na qito ena kompiuta kevaka au vinakata meu marau vakaidina sara. Era tu na veika e tawamudu.
Alina U., 18, Lithuania
iTuvaki Vakavuravura
E koronivuli, au a vakasaurarataki ka vakalialiai me baleta na noqu vakabauta. Ena vuku ni ka oqori kei na veibolebole tale eso, au a vakila ni sa kasura sobu tiko vei au na vuravura. Ia a vakayaloqaqataki au o tinaqu meu vakararavi ki na Veisorovaki i Jisu Karisito baleta ni kila o Koya na noqu mosi ka rawa ni kauta mai vei au na vakacegu (raica na Vunau kei na Veiyalayalati 19:23).
Au sa qai yalataka vua na Tamada Vakalomalagi meu na lolo vakawasoma. Au a kerei Koya me vukei au ena noqu malumalumu kei na sasaga, ka sa cakava tiko mai o Koya me tekivu mai na gauna oya.
Na lolo e sa kauti au vakavoleka vua na Tamada Vakalomalagi kei Jisu Karisito. Au kila ni Rau dau tu ga e yasaqu, ka solia tiko vei au na kaukauwa meu ulabaleta na noqu bolebole ka kunea na marau dina. Sa vakabula tiko o Jisu Karisito na noqu mavoa ka vukei au meu lesu tale vei Tamaqu Vakalomalagi.
Vera R., 17, Brasília, Brazil