“Na Cakamana Eda Gadreva e Veisiga,” Me iSakisaki ni iTabagone, Maji 2024.
Kaukauwa me Vorata na iValavala Ca
Na Cakamana Eda Gadreva e Veisiga
Kevaka e lomani keda na Kalou, na cava e kerei keda kina o Koya meda veisau ka veivutuni? Oqo eso na dina me baleta na ivalavala ca kei na isoro ni veivakaduavatataki i Jisu Karisito.
Droini mai vei Adam Howling
Vakacava kevaka o rawa ni vakadinadinataka na cakamana a vakayacora o Jisu Karisito ena Nona bula e vuravura? Vakaraici Koya ni vakabulai ira na tauvimate ka vakaturi ira cake na mate? E dina ga ni da sega ni rawa ni lesuva tale na gauna meda raica na cakamana oqori, e tiko e dua vei ira na cakamana i Jisu Karisito eda rawa ni raica e veisiga. Ka sa dua vei ira na kena e bibi duadua: a ulabaleta o Koya na ivalavala ca.
Na Dina me baleta na iValavala Ca
Eso era na vakataroga beka se cava sa rui ka levu kina oqori. Me vaka, kevaka mada ga eda cakava e dua na cala vagauna, e se lomani keda tikoga na Kalou, donu? Io, na Tamada Vakalomalagi kei Jisu Karisito e rau lomani keda vakatitobu. Ia baleta ni Rau lomani keda sara vakalevu, e levu cake sara na kena italanoa.
Ena Nona sikovi ira na Nifaiti, a vakavulica vei keda na iVakabula na vuna sa rui bibi kina na vakamalumalumutaki ni ivalavala ca: “Sa sega na ka tawasavasava sa curu rawa ki na matanitu [ni Kalou]” (3 Nifai 27:19).
A sega ni kaya o koya “sa sega ni dua na ka tawasavasava vakavo ga e vica na cala lalai.” E vakatavulica o koya ni ivalavala ca cava ga (talaidredre ki na ivakaro ni Kalou) ena tarova noda lai bula vata tale kei Koya.
Oqori e dua na leqa. Eda se sega ni rawa ni muria vakavinaka sara na ivunau ni Kalou. Oqo e dina me baleta na tamata kecega—na parofita yalododonu duadua, na tamata ivalavala ca duadua, kei ira kece ena kedrau maliwa. Me vaka ni da sega ni rawa ni bokoca vakataki keda na noda caka cala, ena tarova noda curuma na matanitu ni Kalou na ivalavala ca.
Na Cakamana ni Veisorovaki i Karisito
Ena vakavinavinaka, erau kila tu na Tamada Vakalomalagi kei Jisu Karisito ni da gadreva na veivuke. Ena Were o Kecisemani kei na kauveilatai, a colata kina vakai Koya o Jisu Karisito na noda mosi, tauvimate, veivakararawataki, malumalumu, kei na ivalavala ca (raica na Alama 7:11–13). Baleta ni o Koya ruarua na Luvena uasivi sara na Kalou kei na luvei Meri vakayago, sa rawa kina Vua me sauma na isau ni ivalavala ca ka sega tale ni dua me sauma rawa.
Oqori na vuna e rawa ni kaya kina o Koya vei ira na Nifaiti, “Okoya sa sega kina e dua sa curu rawa ki na ivakavakacegu [ni Kalou], ko ira ga sa savai na nodra isulu e na noqu dra, ni ra sa vakabauta, ka veivutunitaka na nodra ivalavala ca ka vosota me yacova na ivakataotioti” (3 Nifai 27:19).
Sa dua dina na cakamana ni baleti Jisu Karisito, sa rawa ni da vakasavasavataki mai na noda ivalavala ca! Ena gauna eda sa kila kina ni sa yaga sara vei keda na solibula veisorovaki ni iVakabula, sa rawa ni da vakararavi ki na Nona kaukauwa ni da vakabauti Koya, veivutunitaka noda ivalavala ca, ka muri Koya tikoga ena yalodina me yacova na ivakataotioti. E sa dua na cakamana e rawa ni yaco e veisiga ni o nuitaka na Nona kaukauwa ka cakacaka ena vakabauta!