“Me iSakisaki ni iTabagone: Na iTukutuku ni iVakabula vei Iko,” Me iSakisaki ni iTabagone, Maji 2024.

E Dua na iDusidusi ki na Nona Kaukauwa

Me iSakisaki ni iTabagone: Na iTukutuku ni iVakabula vei Iko

Mai vei Elder Dieter F. Uchtdorf

Ena Kuoramu ni iApositolo Le Tinikarua

Na idusidusi oqo ena vukei iko mo semata na nomu digidigi vei Jisu Karisito kei na Nona ivunau.

Raitayaloyalotaka mada ni o vakaitikotiko mai Kalili ena gauna e liu, ena 2,000 na yabaki sa oti. O ni sa sureti kei ira na nomuni itokani ki na dua na lotu ni itabagone ena nomuni valenilotu, ka matataki kina e dua na vulagi dokai: o Jisu mai Nasareci. Ena dua na gauna ena Nona itukutuku, a sureti ira na itabagone o Jisu vei ira na ivavakoso me ra taroga Vua na taro.

Na mataqali taro cava soti o nanuma o rawa ni rogoca?

Au nanuma ni so na taro ena vakaraitaka na itovo vakavanua kei na ituvaki ni gauna. Ia au vakabauta dina ni vuqa vei ira era na rogorogo vaka na taro e tu vei keda nikua.

Me vakataka, ena Veiyalayalati Vou, era a taroga na tamata na taro vakaoqo vua na iVakabula:

Na cava meu cakava meu rawata kina na bula tawamudu?¹
Au sa ciqomi beka? Au sa lewena beka?²
Kevaka e ivalavala ca vei au na taciqu, meu na vosoti koya vakavica?³
Na cava ena yaco ki na vuravura oqo ena veisiga ni mataka? Au na taqomaki beka?⁴
E rawa beka ni Ko vakabula na noqu daulomani?⁵
Na cava na dina?⁶
Au na kila vakacava niu sa lako donu tiko?⁷

Eda sega beka ni dau vakananuma tu beka na veika vata oqori ena veigauna eso? Ena veisenijiuri sa oti, e se bera ni veisau vakalevu na taro. Ka sega talega na yalololoma ni iVakabula vei ira era tarogi ira. E kila o Koya na sala e rawa ni veivakaleqai ka veilecayaki kina na bula. E kila o Koya na kena rawarawa me vakayali kina na noda sala. E kila o Koya ni da dau lomaleqataka ena so na gauna me baleta na veisiga ni mataka. Ka kaya vei iko kei au, me vaka ga a kaya vei ira na Nona imuri ena dua na gauna balavu sa oti:

“Me kakua ni rarawa na lomamudou.”¹²
“Koi au na sala [kei na] dina.”⁹
“Muri au.”¹⁰

Ni tiko na digidigi bibi mo cakava, o Jisu Karisito kei na Nona kosipeli vakalesui mai era sa digidigi uasivi duadua. Ni tiko nomu vakatataro, Jisu Karisito kei na Nona kosipeli vakalesui mai era sa isau ni taro uasivi duadua.

Oqo na vuna au taleitaka kina Me iSakisaki ni iTabagone: Ai Dusidusi ni Caka Digidigi. E dusimaki keda vei Jisu Karisito me rawa ni da ciqoma na Nona kaukauwa. Au dau maroroya tu ga e dua na ilavelave ena noqu taga ena veigauna kece. Niu sotavi ira na tamata e vuravura taucoko era vinakata me ra kila na vuna, me vaka ni da lewe ni Lotu i Jisu Karisito, cakava na ka eda cakava, au wasea vei ira na idusidusi oqo.

Me iSakisaki ni iTabagone e vakavulica na dina tawamudu me baleta na iVakabula kei na Nona Sala. E sureti iko mo cakava na digidigi e yavutaki mai na dina oqori. Ka dau wasea na veivakalougatataki sa yalataka tu o Koya kivei ira era muri Koya. Yalovinaka wilika, vakasamataka vakatitobu, ka wasea na idusidusi oqo!

Sureti Koya ki Loma

E vinakata o Jisu Karisito me tiki ni nomu bula—e dua na iserau e veisiga, ena gauna vinaka kei na ca. E sega walega ni tucake tu ena mua ni sala, ka waraki iko mo toboki Koya. Sa tiko vata kei iko o Koya ena veikalawa yadua! Sai koya na Sala!.

Ia ena sega ni vakasaurarataka na Nona sala ki na nomu bula. Ko ni sa sureti Koya mai na nomuni digidigi. Oqo na vuna sa rui ka talei dina kina na idusidusi ni digidigi, me vaka na Me iSakisaki ni iTabagone. Ena veigauna kece o cakava kina e dua na digidigi dodonu ka yavutaki ena dina tawamudu ni iVakabula, o vakaraitaka ni o vinakati Koya ena nomu bula. Na veidigidigi oqori ena dolava na matamata kei lomalagi, ka basika mai na Nona kaukauwa ki na nomu bula.¹¹

Cakava e Dua na iSema Kaukauwa

O na nanuma beka ni iVakabula e vakatauvatani ira era rogoca ka cakava na Nona vosa vua na tamata vuku ka “tara na nona vale ena dela ni vatu.” A vakamacalataka oKoya:

“A sa tau mai na uca, ka coka na dobui, ka liwa mai na cagi ka tabaka na vale ko ya; a sa sega ni bale ni sa tauyavutaki tu ena dela ni vatu.”¹²

E sega ni bula e dua na vale ena dua na cava baleta ni kaukauwa na vale. E sega talega ni bula tiko baleta ni kaukauwa na vatu. Na vale sa bula mai na cava baleta ni sa kabi dei tu ki na vatu kaukauwa oya. Sai koya na kaukauwa ni isema ki na vatu e bibi.

Sa vakakina, ni da tara cake na noda bula, sa bibi me da digidigi vinaka. Ka sa ka bibi me da kila na dina tawamudu ni iVakabula. Ia na kaukauwa eda na gadreva me da ulabaleta kina na cava ni bula ena yaco mai ni da semata na noda digidigi vata kei Jisu Karisito kei na Nona ivunau. Oqori na ka e vukei keda kina na Me iSakisaki ni iTabagone.

Me ivakaraitaki, era na kila na nomu itokani ni o tovolea mo kakua ni vakayagataka na vosa veivakacacani se vosa veivakararawataki. E rawa ni ra raici iko ni ko dodoliga yani ki na gone oya e koronivuli ka levu na tamata era sega ni kauwaitaka se dauveivala sara mada ga. Ia era kila beka ni o cakava na digidigi oqo baleta ni a vakavulica o Jisu Karisito ni “tamata kece era tacimuni ka ganemuni—oka kina o ira na tamata era duatani mai vei iko”?¹³

Era na kila beka na nomu itokani ni o gole ki lotu ena vei Sigatabu. Era na raica beka ni o bokoca e dua na sere se vakasuka e dua na veisureti me saravi e dua na iyaloyalo. Ia era kila beka ni o cakava na digidigi oqo baleta ni tiko vei iko “e dua na veiwekani rekitaki ni veiyalayalati kei na Tamada Vakalomalagi kei Jisu Karisito,” ka sa tiki ni yalayala oya mo muria na iVakabula, o sa vakavinavinaka kina “ni tiko kei iko na Yalo Tabu me nomu itokani tudei”?¹⁴

Era na kila beka na tamata ni o sega ni gunu se vakatavako se vakayagataka eso tale na waigaga ni veivakacacani. Ia era kila beka ni o cakava na digidigi oqo baleta ni a vakavulica o Jisu Karisito ni “sa ka tabu na yagomudou,” “e dua na isolisoli vakasakiti mai vua na Tamamu Vakalomalagi,” a buli me ucui Koya?¹⁵

Era na kila beka na nomu itokani ni o sega ni lawaki se lasu, ka o na taura sara vakabibi na vuli. Ia era kila beka ni sai koya oqo baleta ni a vakavulica o Jisu Karisito ni “na sereki kemudou na dina”?¹⁶

Kena bibi duadua, era kila tiko beka na nomu itokani ni o cakava oqo ena so na gauna na digidigi tawakilai me da dinata tikoga na ivakatagedegede i Karisito baleta ni o kila ni “o Jisu Karisito e nomu kaukauwa”?¹⁷

O Koya e Nomu Kaukauwa.

Au vakadinadinataka vei kemuni ni o Jisu Karisito na Sala ki na dua na veisiga ni mataka ramase ka lagilagi—na nomuni veisiga ni mataka. Ka sai Koya talega na Sala ki na dua na ivakaraitaki ramase ka lagilagi. Lako ena Nona sala, ka na lako vata kei iko o Koya. E rawa mo ni cakava oqori!

Kemuni na noqu itokani gone lomani, o Jisu Karisito e nomu kaukauwa. Mo lako vata tiko kei Koya, ka na vukei iko o Koya mo vakatubura “ena tabana ni ikeli”¹⁸ ki na reki tawamudu sa vakarautaka tu o Koya me baleti iko.