“Ni Naica Beka Meu Muduka Kina Noqu Vakila na Cala kei na Madua?,” Me iSakisaki ni iTabagone, Maji. 2024.
Kaukauwa mo Vorata na iValavala Ca
Ni Naica Beka Meu Muduka Kina Noqu Vakila na Cala kei na Madua?
Ena so na gauna ena rawarawa beka mo vakila na nuiqawaqawa me baleti iko mai na nomu vakila na loloma ni iVakabula vei iko—ia me vaka a kila tu o Nifai, e sega ni dodonu me vaka oya.
Ni o cakava e dua na ka cala, o na rairai nanuma beka ni o sa druka. Ni dodonu mo a kila vinaka cake. Ni sega ni ganiti iko na loloma.
Vakatitobu sara, o kila tu ni sega ni dua vei ira na ka oqori e dina. O sa vulica me baleta na kemu yaga vakaluvena tagane se yalewa na Kalou, ka o kila ni veivutuni e ka dina ka ena rawa. Ia, ni oti na nomu ivalavala ca se cakava e dua na cala, o na rairai temaki mo totogitaki iko vakalevu cake mai vua e dua tale ena vakanananu ni vakilai ni cala kei na madua.
Eso mada ga na noda tamata taleitaki ena ivolanikalou era a vakila oqo ena so na gauna.
O Nifai sara mada ga?
Ni volavola oti me baleta na takali nei tamana, a vola o Nifai, “Ia, e dina ga ni sa rui vinaka vakaoti na Turaga ena nona vakaraitaka vei au na nona cakacaka lelevu ka talei, sa kaya vakaoqo na yaloqu: A tamata vakaloloma dina koi au! Io, sa rarawa na yaloqu ena vuku ni noqu itovo vakayago; sa yaluma na yaloqu ena vuku ni noqu caka cala. Au sa vakavolivoliti, ena vuku ni veitemaki kei na ivalavala ca sa dau vakaleqai au vakarawarawa. Ia ni’u sa gadreva me’u marau, sa vutugu na yaloqu ena vuku ni noqu ivalavala ca” (2 Nifai 4:17–19).
Oqo o Nifai eda veivosakitaka tiko—o koya vata ga ka a vueta na peleti parasa mai vei Lepani, a cakava e dua na dakaititi mai na kau dodonu ena lekutu, ka taya e dua na waqa ka se sega mada ni bau taya e dua e liu. A tu na nona ivakadinadina ni nona vinaka na Turaga; ia, a vakila ni sega ni veiraurau kei na nona ivalavala ca kei na malumalumu.
Ia na cava meda cakava? Ke a sasaga vakaukauwa na noda qaqa ni iVola i Momani ena yalo ni vakilai ni cala kei na yalolailai, na cava eda rawa ni cakava ni da vakila na veika vata oqori?
Na iDola Sai Koya Meda Vakanamata vei Jisu Karisito
A sega ni tini ga e kea na italanoa kei Nifai. Na idola vei Nifai oya me vagolea nona vakanamata mai vei koya kivei Jisu Karisito.
Ni tagicaka tiko o Nifai, e kaya o koya, “Ia, au sa kilai Koya ka’u sa vakararavi vua. Sa dau totaki au na noqu Kalou” (2 Nifai 4:19–20).
Ni oti na veisau ni vakasama oqo, sa sega tale ni vakanamata na noda qaqa ena ivolanikalou ki na yaluma e vakila o koya mai na nona cala. Ia, e dau rekitaka na nona iVakabula! E kaya o Nifai, “ Mo reki, o iko na lomaqu, ka tagi vua na Turaga, ka kaya: Oi kemuni na Turaga, au na vakacaucautaki kemuni tiko ga me sega ni mudu; io, ena rekitaki kemuni na yaloqu, na noqu Kalou, kei na uluvatu ni noqu veivakabulai” (2 Nifai 4:30).
Me vakataki Nifai, e rawa ni o kunea na loloma veivueti, veivosoti, kei na vakacegu vei Jisu Karisito. O na sega beka ni vakila ni o rawa ni solia vei iko na loloma soliwale, ia e tiko e Dua ka na cakava oqori. E kaya o Elder Jeffery R. Holland ena Kuoramu ni iApositolo Le Tinikarua, “Na loloma soli wale i Karisito e solia vei keda sega walega na veivakabulai mai na rarawa kei na ivalavala ca kei na mate ia na veivakabulai talega mai na noda dau vakalewai keda tikoga.”1
Ni o sa yalolailai sara ka sega ni raica e dua na sala mo vorata rawa kina na nomu ivalavala ca kei na cala, mo kila tiko ni Tamada Vakalomalagi kei Jisu Karisito e se sega vakadua ni mudu nodrau lomani iko. Vakanamata vua na nomu iVakabula, ka sa na rawa Vua me vukei iko mo ulabaleta ruarua na nomu ivalavala ca kei na nomu vakila na cala.