Kaukauwa mo Veiqaravi

E Rawa Beka Niu Veiqaravi Kevaka Au Sega ni Dauveimaliwai Vinaka?

Mai vei Jessica Anne Lawrence

Mekasini ni Lotu

E rawa ni vaqaqacotaki keda na iVakabula kevaka sara mada ga e dredre na noda dolele yani vei ira na tamata.

Niu se tiko ena koronivuli torocake, au nanuma niu a sega ni tisaipeli yaga sara i Jisu Karisito baleta ni dau dredre meu vosa vei ira na tamata. Au a sega walega ni galugalu—au a dau mamadua sara ga! Au a dau mamadua sara ka dredre kina meu vakaitokani ka meu ivakaraitaki dina vei ira na noqu lewenikalasi e koronivuli vakakina ena lotu.

Ena vuku ni ka oqo, au a yawaki au mai na veikacivi eso ena Goneyalewa ka vakila niu sega ni rawa ni vakai ira na noqu icaba era dau vosa vakalevu ka dauveimaliwai cake mai vei au.

Niu taurivola oti mai na koronivuli torocake ka nanuma meu sa laki kaulotu, au a rere!

Au a vakila ni vinakata na Kalou meu veiqaravi, ia na imatai ni noqu vakasama oya, “Na cava e vinakata kina na Kalou me dua vakai au me veiqaravi? Au sega ni rawata na vosa vei ira na tamata!”

Ia niu a rere tu, au sa nanuma meu sa vakararavi ga vua na Kalou ka laki kaulotu.

Vakararavi ki na Kaukauwa i Karisito

Niu veiqaravi voli, a dredre na veika ena imatai ni gauna, ia niu tomana tikoga na noqu tovolea (ka laivi au meu druka), au raica ni a vaqaqacotaki au na Turaga meu cakava na cakacaka a kerei au o Koya meu cakava.

E kaya na Turaga ena iVola i Momani: “Kevaka era na lako mai vei au ko ira na tamata, au na vakaraitaka vei ira na nodra malumalumu. Au sa solia vei ira na tamata na malumalumu mera vakayalomalumalumutaki ira kina; ia sa rauti ira vinaka na tamata kecega era sa vakamalumalumutaki ira vei au na noqu loloma soliwale; ni kevaka era sa vakayalomalumalumutaki ira vei au, ka vakabauti au, au na qai vakayacora me vu ni nodra kaukauwa na veika malumalumu” (Ica 12:27).

Ena noqu kaulotu au a vakila ni rawa ni cakava vei au o Jisu Karisito na veika totoka sega ni baleta na noqu kaukauwa ia ena vuku ga ni Nona. Kau sa qai kila talega ni Nona kaukauwa e sega ni lako mai vei au baleta ga niu daukaulotu, ia e dua talega na ka au a rawa ni vakararavi kina e koronivuli torocake.

Na ka e totoka baleti Jisu Karisito o ya ni da sega ni gadreva na diqiri se na ivola vereverea ni rawaka me da veiqaravi ena Nona matanitu ka tisaipeli kaukauwa! Ni da yalomalua ka yalodina ena noda gagadre me da veiqaravi, ena ciqomi keda vakadodonu sara o Jisu Karisito, ena vanua eda tu kina, ka solia vei keda na veivuke kei na kaukauwa e gadrevi meda qaravi Koya kina.

Ena Vaqaqacotaki Iko o Koya ena Nomu Qaravi Ira Na Tani

“Sa vakarautaka na Turaga na madigi eso volekati kemuni mo ni vakila ka wasea na Nona loloma. … O na vakila na loloma ni Kalou ena vukumu, vakakina e vukuna o koya o qarava ena Vukuna. Ni o vukei ira na luve ni Kalou ena nodra leqa, ena mamada cake na nomu leqa. Ena vaqaqacotaki nomu vakabauta kei na nomu vakanuinui. ”

Peresitedi Henry B. Eyring, iKarua ni Daunivakasala ena Mataveiliutaki Taumada, “Tovolea, Tovolea, Tovolea,” koniferedi raraba ni Okot. 2018 (Ensign se Liaona, Nove. 2018, 92).

“Na loloma ni Kalou e sega ni yavutaki ena nomu dauveimaliwai vinaka se mai na levu cake ni nomu itokani mai vua e dua tale; e yavutaki tu ena veika e tu e yalomu. Ena Nona veivuke, ka kevaka o yalomalumalumu ka veidokai, sa rawa ni o vakavulica na dina vei ira era tu wavoliti iko. Au vinakata meu yalodina tiko meu rawa ni wasea na veika e vinakata na Kalou vei au.”

Jocelyn R., 13

Raica na app ni Gospel Living ni vula oqo me baleta na ikuri ni vakasama mai vei Jessica kei ira tale eso era sotava na madua kei na nuiqawaqawa vakaveimaliwai.