“Na Cava Au Gadrevi Jisu Karisito Kina,” Me iSakisaki ni iTabagone, Maji. 2024.
Kaukauwa ena Nomu Veiwekani kei Koya
Na Cava Au Gadrevi Jisu Karisito Kina
Sa ka bibi sara na noda kila na noda veimaliwai vata kei na iVakabula.
Na iTara ni iVakavuvuli, mai vei Kelsy kei Jesse Lightweave
“Na cava au gadrevi Jisu Karisito kina?” Oqo e dua na taro bibi mo tarogi iko kina—sega ni “keda kece” vaka cokovata se “kedatou” vakamatavuvale. Ia, na kena dina sara, “oi au.” Na cava na noqu isaunitaro ki na taro oya?
Na isaunitaro au kunea me baleti au a lako mai ena cakacaka ni vakabauta yadua; sasagataka tiko e veisiga meu bulataka na noqu veiyalayalati, oka kina na noqu veiyalayalati ni papitaiso; kei na vulici ni vakarorogo ki na domo ni Turaga mai na Nona Yalotabu. Ka bibi duadua, ni yavutaki ena noqu veiwekani kei na noqu iVakabula.
E Dua na Veiwekani kei na iVakabula
Au rawa ni vola ena yalodei na vuna au gadreva kina na noqu itubutubu se noqu itokani voleka duadua. Au sa dau vakabulabulataka wasoma na veimaliwai oqori. Na kedra yaga ena noqu bula sai koya na kena laurai ka dei ni gauna kei na sasaga au biuta meu volekati rau ena veika rawarawa me vakataka na veivosaki e veigauna, na veikilai, ka vakatara na nodra vuku dodonu me vakayarayarataka na noqu bula.
Na noda veimaliwai kei Jisu Karisito e rawa ni vakamuria e dua na ivakarau vata ga. Na masu e veisiga vua na Tamada Vakalomalagi ena yaca i Jisu Karisito ena ganita. Sa vakakina na noda kila na iVakabula ena noda vakasaqaqara ena ivolanikalou, wilika na nodra vosa na parofita kei na iapositolo, ka vakarorogo ki na Yalotabu. Au vakatitobutaka na veiwekani oya niu vakatara na veika kece au vulica tiko me vakayarayarataka na noqu bula kei na noqu itovo ni bula.
Vakasamataka talega na yavu ni veivakabulai. Na iulutaga oya, “yavu ni veivakabulai,” e kena nanuma ni o iko kei au—na tamata kecega—sa gadreva na veivakabulai ka sa tiki ni ituvatuva ni bula oqo na veivakabulai. Eda a gadreva na veivuke ka sega ni rawa ni da vakabulai keda vakai keda.
Ia na Kalou a talai keda mai ki vuravura ena dua na yalayala tawamudu ni na vakarautaka o Koya e dua na iVakabula, o Jisu Karisito, o koya ena ulabaleta na veivakataotaki ka tawasei keda tu mai na iserau ni Kalou.1 Ni da sa veiyalayalati kei na Kalou, sa yalataka o Koya me cakava na ka kecega e rawata o Koya, ka sega ni kauta laivi na noda rawa ni digidigi, me vukei keda meda maroroya na noda yalayala tabu Vua.2
iTaba lolomataka o Tracy Y. Browning
Au Gadreva me Kila ni Kila Tu o Koya
Au a papitaiso niu a yabaki 16 ka tiko mai New York City. Taumada au vakila niu a vakayagataka e vuqa na gauna ena noqu veimuataki tiko ena noqu vakabauta vou, kei na kena isema vakaveimaliwai ni veiyalayalati kei na Kalou, kei na noqu veimaliwai kei ira na itokani.
Au a lomaleqataka niu sega ni veitokani e koronivuli meu rawa ni sema vata kei ira. Ia era dau cakava na noqu itokani na veika au qai kila ni ra na vakacacana na yaloqu ka sega ni sala vata kei na noqu taura tiko vei au na yaca i Jisu Karisito. Au kila ni vinakata o Jisu Karisito meu cakava na digidigi e vinaka cake.
Na ka au sega ni kila o ya se sa kila vinaka tu beka na iVakabula na noqu nuiqawaqawa. E dau dredre vakalevu cake ena veisiga niu sureti meu cakava na veika au kila ni sega ni vinaka. Au dau vakadonui ira ena so na gauna ni ra sega ni ca, ia au kila niu sa vakaleqa tiko na veika e sega ni dodonu meu cakava.
Au a gadreva meu kila ni kila vinaka tu na iVakabula na noqu galili kei na cala au vakila niu vakasamataka sara mada ga meu vakalolovirataka na ivakatagedegede ni kosipeli me rawa niu vakila kina na yalo ni veiciqomi kei ira na noqu itokani. Au a vakila ni vaka au sa luvu tiko. Au a gadreva na veivueti. Au a gadrevi Jisu Karisito.
Ni Vakatitobutaki na Noqu Veiwekani kei Koya
A titobu sara na noqu veiwekani kei Jisu Karisito niu qai kila vakataki au na vuna au gadrevi Koya kina. Oqo na gauna au sa tekivu toso kina mai na noqu kila walega ni dodonu meu bulataka na kosipeli ki na kila vinaka na vuna au vinakata kina meu bulataka na kosipeli ka kerea na veivuke meu cakava sara. Au a tekiduru ga ka talaucaka na yaloqu vua na Kalou, ena vakanuinui ni o Koya e kauwaitaki au kei na noqu leqa, ni ituvatuva ni veivakabulai a buli me vukei au, ka ni noqu marau sara mada ga e tiki ni ituvatuva oya.
E vakavulica o Peresitedi Russell M. Nelson, “Ni daru sa cakava e dua na veiyalayalati kei na Kalou, na nodaru veiwekani kei Koya sa yaco me voleka cake sara mai ni se bera na nodaru veiyalayalati. … Ena vuku ni noda veiyalayalati kei na Kalou, ena sega vakadua ni oca ena Nona sasaga me vukei keda, ka da na sega vakadua ni vakatikitikitaka na Nona dauvosota vakayalololoma mai vei keda.”3
Au a vosa vua na Tamada Vakalomalagi me baleta na noqu vakila niu cala, na noqu sega ni kila na cava meu cakava meu maroroya ruarua kina na noqu ivakatagedegede kei ira na noqu itokani. Au a tukuna Vua niu sa yalorarawa ka gadreva dina tu na Nona veivuke.
Au a tekivu vakila na vakacegu niu se tekiduru no. Na yalo vakacegu oqo a vukei au meu kila ni iVakabula a kila tu na veika au vakila tiko ka kauwaitaka tu o Koya—vakalevu sara, vakaidina.
Niu sa qase mai ka rabailevu cake noqu rai, au kila ni veigauna kece au lako mai kina vua na Kalou ka vakamamasu meu vukei se vosoti, e vaka meu kau yani vakatautauvata ki na Were o Kecisemani, ka a sautaninini kina na noda iVakabula ena mosi ka tekivu me vakararawataki ruarua ena yago kei na yalo ena cala kei na ivalavala ca ka tawasei keda tani tu mai vua na Kalou.4 E sa dua na ivakananumi ni kila vinaka tu o Koya na veika au lako curuma tiko—vinaka cake sara mai na dua tale e rawa ni cakava.
Ena Yalo Bibivoro, Noda iVakabula, mai vei Jay Bryant Ward
Sega ni Tiko Duadua
Niu duri cake, a vukei au na Yalotabu meu kila eso na ka, ka vakauqeti au meu cakava na veika tale eso. iMatai, au qai nanuma ni dua na noqu itokani e Musolomani ka sega vakadua ni kerei me veisautaka na nona ivakatagedegede baleta ni keitou rokova na nona vakabauta ka kila ni tiko eso na ka ena sega ni cakava o koya. Au a vakauqeti meu wasea na noqu vakabauta vou vei ira na noqu itokani me rawa talega ni ra kila vakavinaka cake na veika baleti au kei na vuna e bibi kina vei au na noqu ivakatagedegede vou.
Au a tekivu vakamalua. Au a tukuna vua e dua na itokani na sala au a sotava tiko kina na dredre. E a yalovinaka ka veidokai o koya. A vukei au ena noqu veivosaki kei ira na itokani tale eso. Era sega ni kila vinaka taucoko, ia ni toso na gauna, au raica ni ra sa tuvanaka me rawa niu dau vakaitavi ka sega ni voroka na noqu yalayala vua na Kalou.
Au kila ni rawa ni da vakayagataka taucoko na kaukauwa me da vorata kina na veivakayarayarataki tudei ni vuravura. Na maroroi ni veiyalayalati e vukea oqori, ka sa itakele ni noda veiyalayalati o Jisu Karisito.5 Oqo na ka au sa kunea rawa me baleti au—na cava au gadrevi Jisu Karisito kina.
Na lako ki vale vua na Kalou e sega ni dua na ka au rawa ni cakava vakataki au. Ka sa vuqa tu na ikalawa lalai kei na veika sotavi e veisiga meu—kei keda taucoko—na cakava ena ilakolako oya i vale. Ia eda sa kalougata dina ni da sa daucaka veiyalayalati ka dau rokova na veiyalayalati ni Kalou “ena sega vakadua ni oca ena Nona sasaga me vukei keda” me yacova ni da sa yaco yani kina.