Nomu iVakatawa ena Buca ni Rere

Mai vei Marissa Widdison

Mekasini ni Lotu

Ena veigauna ni lomaocaoca, eda rawa ni vakarogoca na domoi noda iVakatawa.

E dua na iwase kilai levu ena ivolanikalou oya na Same 23. O ira na tamata yalodina e vuravura raraba mai na vuqa na matalotu era tomana tikoga na nodra kune vakacegu ena veitikina oqo ka volai ena vuqa na yabaki sa oti.

A noqui vakatawa ko Jiova; ena sega na ka me yali vei au.

Sa vakadavori au ena vanua veico drokadroka: sa tuberi au ena bati ni ucuwai sa drodro malua.

Sa vakabulabulataka tale mai na yaloqu: sa tuberi au ena sala dodonu ena vuku ni yacana.

Io, kevaka ka’u sa lako e loma ni buca ni yaloyalo ni mate, ka’u na sega ni rerevaka na ca: ni kemuni sa tiko vata kei au; ena vakacegui au na nomuni ititoko kei na nomuni matanakilagi.

O ni sa vakarautaka na noqu tepeli e matadra na noqu meca: O ni sa lumuta na uluqu ena ilumu; sa vuabale na mequ noqu bilo.

E dina ena muri au na yalovinaka kei na loloma ena veisiga kecega ni noqu bula: Ka’u na tikoga ena vale nei Jiova ka sega ni mudu.

O sa bau tu maliwai ira na sipi? Era dau veirikayaki vakalailai ka ra tekivu veiciciyaki ena rorogo ni mamaue se veitosoyaki. Era sega saraga ni kilai tu me ra dau doudou! Oqori beka e dua na ka eda rawa ni vulica mai na kena ibalebale oqo—e kilai keda yadua na Turaga ni da na dau rere ena so na gauna. E sega ni dua na ka me maduataki kina! E sa tiki ni bolebole ni bula oqo. Ena veigauna ni lomaocaoca oqori, e rawa ni da vakarogoca na domo ni noda iVakatawa. E saga tiko o Koya me dusimaki keda ki na “veico drokadroka” ni vakacegu kei na veitaqomaki. Oqo eso na sala e sureti keda kina o Koya meda muri Koya.

Vulica na vosa ni noda iVakatawa—me vaka na Nona ivakavuvuli ena Veiyalayalati Vou, 3 Nifai, se na Vunau kei na Veiyalayalati. Ni da cakava vakakina, eda na vakani vakayalo ka yaco meda kila vakalevu cake na Domona ena veisiga ni mataka.
Masu vua na Tamada Vakalomalagi ena yaca i Jisu Karisito ena gauna cava ga mo kerea kina na vakacegu kei na sautu ena nomu bula.
Ciqoma ni veivuke ni iVakabula e rawa ni taura e levu na kena ivakarau, oka kina o ira na itubutubu, iliuliu ni Lotu, itokani, kei ira sara mada ga na vuniwai kei na ivurevure tale eso ni veiqaravi.
Soqoni vata kei ira tale eso era lomana na iVakabula, me vaka ena lotu se semineri. Oqo e rawa ni semati keda ki na dua na itikotiko lomani ni Yalododonu era cakacaka vata me ra muria na iVakabula ka ulabaleta na leqa rerevaki eso ena Nona veivuke.

Ena so na gauna na ulabaleti ni rere e sa dua na ilakolako, me vaka na lako curuma yani e dua na buca butobuto, me vaka e tukuna na Same 23 . E rawa ni vakadinadinataka o Nicolas F., mai Brazil , ni kevaka o toso tikoga ki liu, ena yaco mai na veivakabulai. A sotava o koya na dredre ni druka kei na rere ena dua na gauna balavu.

“Au a dau masu vakalevu, ka kerea vua na Kalou me kauta tani mai noqu vakasama na vakanananu ca, ka kerei Koya me kauta laivi na yalo ca,” e kaya o koya. A lako curuma o koya na gauna ni veilecayaki ka dau tiko ga ena cala a vakayacora.

“Au a tovolea meu kunea na kaukauwa ni Kalou, ia au a se bera ni vakila na Nona veivakabulai,” e kaya o Nicolas. A vakasaqaqara ena ivolanikalou me baleta na ulabaleti ni rere ka kunea na kaukauwa ena veivosa oqori. A tokoni koya mai o tinana kei ira tale eso.

Sa qai yaco, ena dua na yakavi, a vakila o koya na taucoko kei na vakavinavinaka. Sa qai kila o koya na yawa ni vanua a lakova mai.

“E liu au a vakila ni vaka au tiko e vale ni veivesu ,” e kaya o koya. “Ia oqo au vakila niu sa rawa ni qaqa ena ivalu. Niu vakasaqara na veivuke ni Turaga, au vakila na inuinui.”

Se vaka beka e dua na delana ramase se dua na buca ruguruguwa na gauna ni bula oqo, sa dau tiko kei iko na iVakatawa Vinaka, ka na lako vata kei iko o Koya. E lomani iko o Koya! Ena vukei iko mo lako curuma oqo. Mo tiko volekati Koya, ka na muataki iko o Koya ki na vakacegu.