“Na Duidui Vinaka e Rawa ni Cakava na Loloma Soliwale i Karisito,” Me iSakisaki ni iTabagone, Maji 2024.
Kaukauwa mo Vorata na iValavala Ca
Na Duidui Vinaka e Rawa ni Cakava na Loloma Soliwale i Karisito
Ni da sa mai kila ni loloma soliwale ni iVakabula e sega ni ka e rawati ka sa dau tu ga, e rawa kina ni yaco na veika veivakurabuitaki ena noda bula.
Droini mai vei Jarom Vogel
Niu a se bisopi kina, a veivakurabuitaki niu raica na vakacegu era vakila na itabagone ni ra sotavi au me vakatusa e dua na ivalavala ca me tiki ni nodra veivutuni. Ia, au sega ni kinoca rawa ka raica e dua na ivakarau dau yaco wasoma: era na mai vakatutusa na itabagone, yalo vinaka cake, oti o ya—veitalia ga na nodra inaki vinaka duadua—era cakacala tale. Era na qai vakatutusa, logavinaka, ka cakacala tale. Ni oti e tolu se va na gauna ena ivakarau oya, vakavuqa era sa dau soro.
Au vakavinavinaka ni ra sa vakavulici na itabagone oqo ni o Jisu Karisito, ena Nona Veisorovaki, sa solia vei ira na madigi me ra veivutuni ka tekivu tale. Ia, au lomaleqataka de rairai era sega ni kila vinaka tu me baleta e dua tale na veivakalougatataki e solia na iVakabula: Nona loloma soliwale—na kaukauwa veivueti1, veivuke vakalou, kei na “edaumeni ni kaukauwa eda tubu mai kina mai na tamata malumalumu ka vakaiyalayala eda sa yaco oqo ki na bula vakacerecerei.”2
Au vakadeitaka meu veivakavulici vakamatata cake, me vaka a vakatavulica o Peresitedi Russell M. Nelson, ni “veivutuni … e sa dua na iwalewale”3 ka vakawasoma e dau taura na gauna kei na sasaga tale.4 Au vinakata me ra kila na lewe ni noqu tabanalevu ni dau sotavi keda na Kalou ena vanua eda tiko kina ka solia na loloma soliwale me vukei keda ena gauna taucoko ni cakacaka ni veivakataucokotaki, se cava ga na balavu ni gauna e taura.
Na Sala e Vukei Iko Kina na KilaiMatata ni Loloma Soliwale
Ena vica na yabaki sa oti, a vakaraitaka e dua na vuli me baleti ira e sivia e 600 na itabagone qase cake ena Brigham Young Univesiti ni o ira era kila tu ka kilamatata na loloma soliwale e laurai ni lailai sobu na nodra ivakatagedegede ni lomaocaoca, nuiqawaqawa, madua, kei na vakataucokotaki.5 A vakaraitaka e dua na vakadidike e muri ni dua na vakabauta ena loloma soliwale e dau semati ki na ivakatagedegede cecere cake ni vakavinavinaka, marau-e-loma, vakaibalebale ni bula, vakacegu ena bula, kei na yalonuidei.6
Ena veivosa tale eso, era na sega soti ni madua ka yalodei cake na tamata ni ra mai kila ni loloma soliwale e sa tu sara ga eke kei na gauna sara ga oqo—sega ni oti na noda rawata se me ganiti keda. Ni da sa kila ni Kalou e vukei keda se cava ga na veika eda sa cakava se na levu ni gauna eda nanuma ni da sa biuti Koya sobu kina, eda sa vakauqeti meda tovolea tikoga.7
“Au sa Biuti Tamada Vakalomalagi Sobu”
Dua na gauna walega oqo a mavoa e dua na daukaulotu ena dua na itaviqaravi ni qito ena siga ni vakavakarau ka vakau yani ki vale me laki vakabulabula kina. A tu na nona lalawa cecere me rawata na veivuke vakayago e gadreva me qai lesu tale ki na nona kaulotu. Ia, ni rui sivia na nona gauna duadua ka sega ni tuvanaki a veimuataki totolo kina kena yaco tale na itovo makawa eso.
A vakayacora na ivalavala ca ka nanuma o koya ni sa veivutunitaka ka biuta tu mai ni bera na nona kaulotu. A yalolailai ka rarawataka na nona sega ni lewai koya rawa vakaikoya. Na levu ga ni nona lomaleqa, na levu ni nona segata me dro tani yani ki na itovo ca oqori. E a dua na ivakarau ni bula ka kauti koya sobu tiko vakatotolo.
“Au vakila niu sa biuti Tamada Vakalomalagi sobu,” a kaya na cauravou oqo vua na nona iliuliu ni matabete. “Au a sa veivutunitaka oqo e liu, ka sa vosoti au na Kalou. Au a yalataka niu na sega ni qai cakava tale, ia oqo sa vaka ga au se bera vakadua ni veivutuni. Sa sega ni ganiti au na veivosoti se veivuke ni Kalou. Sega ena gauna oqo. Sega vakadua.”
A kaya na nona iliuliu ni matabete,“O sa qai sega beka ni marautaka mo kila ni loloma soliwale e dua na isolisoli? E sega ni dodonu me ka mo rawata se me ganiti iko. O na gadreva ga mo digitaka mo ciqoma ena nomu tuvakarau mo tovolea tikoga ka kakua ni soro.”8 A qai wasea na iliuliu oqo na veimalanivosa oqo nei Elder Neil L. Andersen ena Kuoramu ni iApositolo Le Tinikarua: “Eda na rairai sikalutu lesu vagauna, ia meda lesu totolo sara ena yalomalumalumu ki duruda ka toso tale ki liu ena sala dodonu.”9
Vakadua tale, a vuki ki lomalagi na cauravou oya, ka sa tu e kea na iVakabula me veivuke. A sega walega ni vakabulai na nona mavoa, ia a vakatalega kina na yalona. Dua na takete lailai ena dua na gauna, kei na loloma soliwale rawati mai vei Jisu Karisito, sa tekivu me vinaka cake o koya. Sega ni dede sa lesu tale ki na nona kaulotu ka vakasinaiti ena vakavinavinaka, bula kilikili, na yalo e vakaibalebale, vakacegu ena bula, kei na nuidei. Oqori na duidui e rawa ni cakava na loloma soliwale i Karisito.