“Au sa Lomaocaoca! Sa qai Cava Qo?,” Me iSakisaki ni iTabagone, Maji 2024.
Kaukauwa ena Veigauna ni Lomaocaoca
Au sa Lomaocaoca! Sa qai Cava Qo?
Oqo eso na vakasama me vukei iko mo tadolava na kaukauwa veivakacegui ni iVakabula.
Droini mai vei Uran Duo
Lomaocaoca. Nuiqawaqawa. Osooso. Veivakasaurarataki. Leqa. Lomaleqa.
Se cava ga o vakatoka kina, sa tiki tu ni bula oqo me tekivu mai na gauna rau a biuta kina na Were o Atama kei Ivi. E sega ni dua na iwalewale ni “bula galala ena lomaocaoca.” E dina sara, e dua na bula vakaoya ena vakadruka na inaki! (Raica na 2 Nifai 2:11–12.)
Me vaka ni da sega ni rawa ni kauta laivi taucoko na lomaocaoca, e dodonu meda vakanamata ki na ivakarau ni noda walia. E vuqa na ivurevure ni lomaocaoca e rawa ni wasei ena rua na iwasewase:
-
Veika o rawa ni lewa.
-
Na veika o sega ni rawa ni lewa.
1. Na Veika o Rawa ni Lewa
Ena veiyabaki, e vuqa na tamata mai na veimatalotu tale eso era sa kunea na vakacegu ena nodra cavuqaqataka na ka e vakatokai me “Masu Ni Vakacegu”: “Na Kalou, ni solia vei au na vakacegu meu ciqoma na veika au sega ni rawa ni veisautaka, na yaloqaqa meu veisautaka na veika au rawata, kei na vuku meu kila na kedrau duidui.”1
A solia na Parofita o Josefa Simici na ivakasala vata oqo vei ira na Yalododonu taumada mera walia kina na nodra bolebole: “Oi kemudou na wekaqu lomani, me da kitaka na veika kecega eda rawata ena yalo mamarau; io me da tudei sara, ka nuitaka tu ni da na raica na veivakabulai ni Kalou, io me da raica na ligana ni sa vakaraitaka mai” (Vunau kei na Veiyalayalati 123:17; vakamatatataki).
Ena vosa tale eso: Cakava na veika kece o rawata, ka laiva vua na Kalou me tomana mai kea. Vakanamata ki na veika o rawa ni vakatulewataka, me vaka na:
Nomu digidigi ga
Ena vuku ni Veisorovaki i Jisu Karisito, eda sa “galala kina ka sega ni mudu, ka kila na vinaka mai na ca; [me da] lewa vakai [keda] na ka [me da] kitaka ka sega na ka me lewai [keda]” (2 Nifai 2:26). E dodonu meda “gumatua [o ya, ena nanamaki]” ena cakacaka vinaka (Vunau kei na Veiyalayalati 58:27).
Nomu ivakarau ni rai
A vola na dauniserekali ni Amerika o Maya Angelou, “ Na ka mo cakava ni o sega ni taleitaka e dua na ka o ya mo veisautaka. Kevaka o sega ni rawa ni veisautaka, veisautaka na ivakarau ni nomu vakasamataka.”2 Vakaraica na veika vinaka vei ira na tamata kei na ituvaki eso. Vukica na cakacaka ki na qito. Na vakalomalomani iko ena levu ni nomu cata e dua na ituvaki ena sega ni vakavinakataka.
Na nomu sotava na veika o sega ni rawa ni vakatulewataka
E sega ni rawa ni o tarova na cagilaba, ia e rawa ni o solia na gauna, ilavo, se cakacaka me vukei ira era vakaleqai kina. E sega ni rawa ni o tarova e dua na itokani mai na nona biuta na Lotu, ia e rawa ni o tomana tikoga na nomu lomani koya ka ivakaraitaki vinaka tiko vua. O na sega ni rawa ni vukea kevaka e dua e vosa vakacacataki iko, ia e rawa ni o digitaka na ivakarau mo sotava kina.
Ena loma ni veika kece oqo, nanuma tiko na ka e rawa ni o dau cakava tu ga: masu. Kerea vua na Kalou me cakava na veika o sega ni rawa ni cakava—me veisautaka na veika o sega ni rawa ni veisautaka. Se cava ga na kena icavacava, na iVakabula e rawa ni vukei iko mo vakila na vakacegu.
2. Na Veika O Sega ni Lewa Rawa
Oqo na iwasewase rawarawa duadua me wali baleta ni rawarawa na kena iwalewale:
Kevaka o sega ni rawa ni vakatulewataka, kakua ni leqataka.
Ia, mo vakabauti Jisu Karisito ga ka vakanamata ki na ka o rawa ni vakatulewataka. Tovolea me kakua ni vakaogai iko na lomaleqa.
E rawarawa cake na kena tukuni mai na kena caka, e dina sara. (O sega beka ni diva me tu vei iko e dua na ivakasaribariba ni “lomaleqa” mo rawa ni dau waqaca ka bokoca?)
Ia na kena ciqomi ni leqa e sega ni tiko ena nomu vakatulewa sa ikoya na imatai ni kalawa mo kakua kina ni vakatara me vakaogai iko. Qai vaqaqacotaka nomu vakabauti Jisu Karisito.
Vakararaba na veika eda sega ni rawa ni lewa e dau lutu ena ruku ni dua vei rau e rua na iwasewase:
iTuvaki ni draki ni bula
Dausiga, lauqa, tavuki ni vanua. Matedewa. Eso na ituvaki ni bula vakayago kei na ituvaki ni bula. Na itovo vakatamata e rawa ni tara na veika oqo, ka sa dau tu na ikalawa e rawa ni da taura me da vakarautaki keda kina se vakalailaitaka na kena revurevu. Ia eda sega ni rawa ni lewai ira ena veisiga yadua.
Nodra digidigi na tamata tale eso
iTovo ni tamata ena initaneti. Se ra tiko ga ena Lotu o ira na nomu itokani se sega. Na veika era kaya na tamata e dakumu. Na vakatulewa e vakayacori ena mataveilewai kei na matanitu. Na veika e kaburaki ena TV. Na isau ni iyaya. E rawa ni o solia na nomu nanuma, ia e muri, na digidigi kece era cakava na tamata e sega ni o lewa rawa.