Kaukauwa ena Malumalumu

Na Cakacaka vata kei na Malumalumu Sa Nona Mesamesa na iVakabula

Mai vei Tyler kei Kiplin Griffin

O Jisu Karisito e rawa ni vukei keda meda tubu ena gauna ni dredre, ka sega walega ni lako curuma.

cauravou ni rairai malumalumu voli

Droini mai vei Uran Duo

E sega ni vakila o Mason na loloma ni Kalou me vaka e liu. Sa vica na yabaki nona valuta tiko na veiqaravi vakavuniwai ni lomabibi ka sega soti ni toso vinaka, ka lomaleqataka ni na sega ni yaco rawa na nona tatadra.

E rogoca o Anna ni ra veivosakitaka na itabagone tale eso na veika era sotava ena ivakatakila kei na cakamana. E dina ga ni tovolea tiko, e sega ni vakila o koya na isaunitaro se sotava na veika vakayalo me vakataki ira tale eso.

E vakataroga o Ethan kevaka ena vakila ni na savasava se kilikili tale. Sa dau rawai vakavuqa o koya ena veitemaki eso ka vakila kina ni sa yali na nona vakatulewa ka vakataroga se sa vakayalia vakadua na nona veivakalougatataki sa yalataki tu. E lomatarotaro o koya kevaka e rawa ni vosoti ni vakila vakalevu tikoga na nona cala ena lotu.

E sotava o Madison na dredre ni kana. E vakaleqai tu nona rawa ni vuli o Olivia. E sotava o Conner na dredre ena vakilai ni cala vakayalo (vakilai vakasivia ni cala ni bula savasava). E a vakacacani o Apikali ka vakila ni sa sega ni yaga o koya. Rau sa veisere na itubutubu nei Jake, ka vakila o koya na mosi kei na veilecayaki. A veidabuitaki o Jayden ka sega ni vakila o koya ni rawa ni veivosoti.

E levu tu na nodra dredre na tamata, ia e dua ga na kena iwali. Na iwali oqori e kilai ena dua na yaca—o Jisu Karisito. O ira na tamata oqo era vinakata me ra vakila na kaukauwa, savasava, mamarau, ka taucoko tale, ia era sega ni rawa ni walia ga vakataki ira na nodra leqa. Ia o Jisu Karisito e solia na veivuke. Na kena dina, ni cakacaka ena malumalumu e sa Nona mesamesa. Na nona veivuke e sega ni dau yaco mai vakadodonu se na gauna eda vinakata kina, ia e dau yaco mai.

Oqo eso na ivakavuvuli me vukei keda meda ciqoma na veisureti ni iVakabula meda lako vata kei Koya (raica na Mosese 6:34), vakabibi ni da veibo kei na malumalumu eso.

Na Bula e Dodonu me Dua na Veivakatovolei

E lomani iko vakalevu cake na Kalou mai na Nona lomana na nomu vakila na vakacegu kei na yalorawarawa. E vica vei ira na nomu tamata qaqa era sotava walega na vakacegu kei na rawaka? E rairai era a dau sotava wasoma na veisaqasaqa kaukauwa kei na dredre. Me tiki ni noda vakatovolei ena bula oqo, “sa raica na Turaga ni sa dodonu me totogitaki ira na nona tamata; io, a vakatovolea na nodra dauvosota kei na nodra vakabauta” (Mosaia 23:21). Eda na sega beka ni taleitaka, ia e vakavuqa ni dau solia vei keda na noda veivakatovolei dredre duadua na madigi ni tubu vakasakiti.

Na Malumalumu e Sega ni iVakatakilakila ni Nona Sega ni Vakadonuya na Kalou

E vuqa na tamata ena gauna makawa era vakabauta ni tauvimate vakayago se vakasama e ivakatakilakila ni itotogi ni Kalou (raica na Joni 9:2). Ia na malumalumu e dua na tiki ni bula e kauta mai na Lutu Tani. E dina ga ni veimulomulo kei na bolebole eso e tiki matau ka bibi ni ituvatuva i Tamada Vakalomalagi, ia e sega ni vakakina meda dui sotava duadua na veidredre oqori. A sega ni talai mai o Jisu Karisito me vakacacani keda; A talai mai me mai lomani ira ka vukei ira era sa yali, malumalumu, se galili—ka sai keda kece sara (raica na Joni 3:16–17; Luke 15).

Sa Vakaukauwataki na Veika Malumalumu vei Karisito

Sa ka bibi meda vakatakilai keda ena noda sema vakaveiyalayalati kei Karisito kei na noda vakararavi ki na Nona vinaka sara ka sega ni vakamatatataki mai na noda noda malumalumu. A sega vakadua ni vukitani o Jisu Karisito mai vei ira na malumalumu era vakasaqarai Koya ena vakabauta. Na Kalou e solia vei ira na tamata “na malumalumu me ra yalomalumalumu kina; ia sa rauti ira vinaka na tamata kecega era sa vakamalumalumutaki ira vei [Koya] na [Nona] loloma soliwale … ka vakabauti [Koya],” ia kevaka era sa kitaka, ena “qai vakayacora [o Koya] me vu ni nodra kaukauwa na veika malumalumu” (Ica 12:27). Ni da kauta mai na noda sasaga vua na Turaga ena yalo raramusumusu kei na yalo bibivoro (raica na 3 Nifai 9:20), ena sega beka ni kauti ira tani vakasauri o Koya, ia ena vukei keda o Koya ka vakaukauwataki keda.

Mo Vosoti Iko vakai Iko.

Na salatu ni veiyalayalati e dua na ilakolako balavu sara, sega ni dua na cici lekaleka totolo. Ni da muria na salatu oya ena vukei keda me lako curuma e vuqa na veiveisau kei na veigoleyaki, na lako cake kei na lako sobu, na lasa kei na veika rerevaki, na rarama ni matanisiga kei na ca-va ni bula. E vuqa na lesoni e rawa ni vulici ena veikalawa yadua ena ilakolako oya. Na loloma soliwale i Jisu Karisito e dau vakatakilai mai vakawasoma ni toso na gauna, sega walega ena veigauna veiyawaki se veicakamana.eso.

rairai kaukauwa na cauravou

Sema vei Karisito

Kevaka o vakila ni o malumalumu se o sasaga tiko, ciqoma na veisureti ni iVakabula: “Dou lako mai vei au, koi kemudou vakayadua ga sa oca ka colata na icolacola bibi, ia kau na vakacegui kemudou” (Maciu 11:28). Vaqara na sala eso ena vukei iko mo sema kina vata kei Koya. Ni o dolele yani Vua, o na raica ni sa dolele tiko mai vei iko o Koya ka na sega vakadua ni biuti iko tani! Ena sega ni taucoko tu na bula, ka na sega talega ni galala mai na malumalumu, mosi, kei na sasaga. Ia ena vinaka cake ni tu na Dauniveivakabulai ena yasamu me laveti iko ni ko sa lutu, vadretitaka na nomu mavoa, ka dusimaki iko ki na salatu e veimuataki ki na reki tawayalani.

E kenadau o Jisu Karisito ena cakacaka ena malumalumu. E kenadau o Koya ena cakacaka vata kei iko!