“Rawata na Nona Kaukauwa—Ena Gauna Oqo kei na Veigauna,” Me iSakisaki ni iTabagone, Maji 2024.
Kaukauwa e Veigauna Kece
Rawata na Nona Kaukauwa—Ena Gauna Oqo kei na Veigauna
O sa kilikili kaya na kaukauwa kei na veivuke i Jisu Karisito.
Droini mai vei Alex Nabaum
Raitayalotaka mada ni o taubale voli ena veikau ka takosova e dua na gonetagane lailai a tacaqe ka tau yani ka tacori sara ena vei tabananikau madu. E dua vei ira na tabana oqori sa rui bibi vua me laveta tani duadua ga.
O na veivuke? Se o na dabe mada ka vakadeitaka ke gadreva o koya na nomu veivuke?
E dina sara o na veivuke! Na vakasama ni kena tarovi na nomu veivuke me yacova ni sa rawata na gonetagane oqori ena rairai ka vakalialia vei iko. Ia eda dau nanumi keda vakaoqo—vakavo ga, ena kisi oqo sai keda na gone e vakaleqai tu.
O Sa Kilikili Mo Vakabulai
Se cava ga na nomu yabaki ni bula, o iko e dua na gone e vakatauvatani kivua na Tamada Vakalomalagi kei Jisu Karisito. (O iko, vakaidina na luvena dina na Tamada Vakalomalagi.) Kei na nomu kaukauwa—vakayago, vakasama, vakayalo, se na lomamu—e sega ni vakatauvatani rawa ki na Nodrau. E vuqa vei keda eda kila vinaka tu na vakasama oya. Ia ni da tarabe se cava ga na vuna, eda dau nanuma ni da sega ni rawa ni dolele yani me da vukei me yacova ni da sa rawata rawa. E sega saraga ni dina oqori.
A vosa o Peresitedi Dieter F. Uchtdorf, iKarua ni Daunivakasala ena Mataveiliutaki Taumada–ena gauna oya, me baleta na italanoa vakaibalebale ni sipi ka yali ena Luke 15.
“E dodonu beka me kila na sipi na vakayagataki ni kabasi me raica kina na veiyawaki ni vanua?” a taroga o koya. “Ena rawa beka me vakayagataka na GPS me raica na vanua e tiko kina? Me tiko beka vua na kila vakavuku me bulia e dua na gacagaca livaliva me kaciva na veivuke? E gadreva beka na sipi na veivakadonui mai vua e dua na iliuliu ni vanua ni bera ni mai veivueti na iVakatawa Vinaka?
“Sega. Sega sara! Sa kilikili me vueti vakalou na sipi baleta ga ni sa lomani mai vua na iVakatawa Vinaka.
“Vei au, na vosa vakatautauvata ni sipi sa yali sa dua vei ira na itukutuku nuitaki ena ivolanikalou taucoko.”1
O keda yadua e rawa ni da mai yali ena vuqa na vuna duidui. Ka vei keda yadua, sa rairai vaqarai keda rawa tiko na veivuke vakalou.
Sa Dau Tu Ga na Veivuke
Sa vakarautaki tu vei keda na veivuke sega walega ni gauna eda cakacala kina, ia ena gauna talega eda bula tiko kina na kena vinaka duadua eda rawata. A vakatavulica o Elder David A. Bednar ena Kuoramu ni iApositolo Le Tinikarua:
“Au vakananuma tiko ke da na sega ni vakila tiko na kaukauwa e tiko ena Veisorovaki ena noda bula ka qai vakabauta tu vakatikina me da sa na cola duadua tu ga na noda iusana ena noda kaukauwa vakaikeda kei na yalo ni sasaga mai na noda kaukauwa vakaiyalayala.
“E sa dua na ka na noda kila ni o Jisu Karisito e a lako mai ki na vuravura me mai mate ena vukuda. Ia e dodonu talega me da na vakavinavinakataka ni gadreva na Turaga ena nona Veisorovaki kei na kaukauwa ni Yalotabu me vakabulabulataki keda—sega walega me veituberi tiko yani, ia me veivakaukauwataki ka veivakabulai.”2
O sa kilikili kaya na Nona veivuke! Se cava ga na sala o sa lakova oti wale tikoga oqo, sa tu vakarau o Jisu Karisito me lakova vata kei iko na tolonisala ka tarava.