សម័យប្រជុំរសៀលថ្ងៃអាទិត្យ
រីករាយនៅក្នុងអំណោយទាននៃកូនសោបព្វជិតភាព
សេចក្តីដកស្រង់
បើគ្មានកូនសោបព្វជិតភាពទេ នោះគ្មាននរណាម្នាក់អាចទទួលបានពិធីបរិសុទ្ធ និងសេចក្ដីសញ្ញាដ៏ចាំបាច់ ដែលភ្ជាប់យើងទៅនឹងមនុស្សជាទីស្រឡាញ់របស់យើងដ៏នៅអស់កល្បជានិច្ច ហើយអនុញ្ញាតឲ្យយើងរស់នៅជាមួយព្រះនៅទីបំផុតឡើយ ។…
កូនសោបព្វជិតភាពផ្ដល់សិទ្ធិអំណាចដល់យើងក្នុងការផ្ដល់ពរជ័យទាំងអស់ដែលបានសន្យាដល់អ័ប្រាហាំទៅឲ្យបុរស និងស្ត្រីគ្រប់រូបដែលគោរពតាមសេចក្ដីសញ្ញា ។ កិច្ចការព្រះវិហារបរិសុទ្ធធ្វើឲ្យពរជ័យដ៏ថ្លៃថ្លាទាំងនេះមានដល់បុត្រាបុត្រីរបស់ព្រះ ទាំងអស់ ដោយមិនគិតពី កន្លែង ឬ ពេល ណាដែលពួកគេបានរស់នៅ ឬកំពុងរស់នៅឥឡូវនេះទេ ។…
កូនសោបព្វជិតភាពដែលបានស្ដារឡើងវិញតាមរយៈព្យាការី យ៉ូសែប ស្ម៊ីធ ធ្វើឲ្យបុរស និងស្ត្រី គ្រប់រូប ដែលគោរពតាមសេចក្ដីសញ្ញារីករាយនឹងឯកសិទ្ធិខាងវិញ្ញាណដ៏អស្ចារ្យដោយ ផ្ទាល់ខ្លួន ។…
បងប្អូនប្រុសស្រីជាទីស្រឡាញ់នេះជាការសន្យារបស់ខ្ញុំ ។ គ្មានអ្វីនឹងជួយបងប្អូន ច្រើនជាង ការថ្វាយបង្គំនៅក្នុងព្រះវិហារបរិសុទ្ធជាទៀងទាត់តាមដែលកាលៈទេសៈរបស់បងប្អូនអនុញ្ញាតឲ្យ ដើម្បីកាន់ដំបងដែកយ៉ាងខ្ជាប់ខ្ជួនជានិច្ចនោះទេ ។ គ្មានអ្វីដែលនឹងការពារបងប្អូន ពេលដែលបងប្អូនជួបនឹងភាពងងឹតនៃពិភពលោក ជាង នេះនោះទេ ។ គ្មានអ្វីដែលនឹងពង្រឹងទីបន្ទាល់របស់បងប្អូនអំពីព្រះអម្ចាស់ព្រះយេស៊ូវគ្រីស្ទ និងដង្វាយធួនរបស់ទ្រង់ ឬជួយបងប្អូនឲ្យយល់ពីផែនការដ៏អស្ចារ្យរបស់ព្រះ ជាងនេះនោះទេ ។ គ្មានអ្វីដែលនឹងធ្វើឲ្យវិញ្ញាណរបស់បងប្អូនធូរស្រាលក្នុងអំឡុងពេលឈឺចាប់ ជាង នេះនោះទេ ។ គ្មានអ្វីដែលនឹងបើកស្ថានសួគ៌ ជាងនេះនោះទេ ។ គ្មានទាល់តែសោះ !
ព្រះវិហារបរិសុទ្ធ គឺជា ច្រកទ្វារនាំទៅកាន់ពរជ័យដ៏មហិមាបំផុតដែលព្រះមានសម្រាប់យើងម្នាក់ៗ ព្រះវិហារបរិសុទ្ធគឺជាកន្លែងតែមួយគត់នៅលើផែនដីដែលយើងអាចទទួលពរជ័យ ទាំងអស់ ដែលបានសន្យាដល់អ័ប្រាហាំ ។…
ចូរយើង រីករាយ ក្នុងការស្តារឡើងវិញនូវកូនសោបព្វជិតភាព ដែលធ្វើឲ្យបងប្អូន និងខ្ញុំរីករាយនឹង រាល់ ពរជ័យខាងវិញ្ញាណ ពេលយើង មានឆន្ទៈ និងស័ក្ដិសមដើម្បីទទួលនោះ ។