សម័យប្រជុំព្រឹកថ្ងៃសៅរ៍
ត្រូវប្រដាប់ខ្លួនដោយព្រះអម្ចាស់យេស៊ូវគ្រីស្ទវិញ
សេចក្តីដកស្រង់
ព្រះវរបិតាយើងមានព្រះទ័យចង់មានទំនាក់ទំនងស៊ីជម្រៅជាមួយបុត្រាបុត្រីទ្រង់ទាំងអស់ ប៉ុន្តែវាជាជម្រើសរបស់យើងទេ ។ ពេលយើងជ្រើសរើសខិតកាន់តែជិតទ្រង់តាមរយៈទំនាក់ទំនង សេចក្ដីសញ្ញា នោះវាអនុញ្ញាតឲ្យទ្រង់ខិតកាន់តែជិតយើងដែរ ហើយប្រទានពរយើងកាន់តែពេញលេញ ។
… ព្រះយេស៊ូវគ្រីស្ទគឺជាស្នូលនៃសេចក្ដីសញ្ញាទាំងអស់ដែលយើងបានធ្វើ ហើយពរជ័យនៃសេចក្ដីសញ្ញាកើតមានមកដោយសារតែការពលិកម្មធួនរបស់ទ្រង់ ។
បុណ្យជ្រមុជទឹកដោយការពន្លិច គឺជានិមិត្តសញ្ញាច្រកទ្វារដែលយើងចូលទៅក្នុងទំនាក់ទំនងសេចក្ដីសញ្ញាជាមួយព្រះ ។ ការពន្លិចទៅក្នុងទឹក ហើយងើបឡើងមកវិញគឺជានិមិត្តសញ្ញានៃការសុគត និងការមានព្រះជន្មរស់ឡើងវិញរបស់ព្រះអង្គសង្គ្រោះទៅកាន់ជីវិតថ្មី ។… យើងអាននៅក្នុងព្រះគម្ពីរសញ្ញាថ្មីថា « ព្រោះអស់អ្នកដែលបានទទួលបុណ្យជ្រមុជក្នុងព្រះគ្រីស្ទ នោះឈ្មោះថាបានប្រដាប់កាយដោយព្រះគ្រីស្ទហើយ » [កាឡាទី ៣:២៧] ។…
ពិធីបរិសុទ្ធនៃសាក្រាម៉ង់ក៏ចង្អុលនាំទៅកាន់ព្រះអង្គសង្រ្គោះផងដែរ ។ នំប៉័ង និងទឹកជានិមិត្តសញ្ញានៃសាច់ និងព្រះលោហិតរបស់ព្រះគ្រីស្ទដែលបានច្រួចជំនួសយើង ។… ពេលយើងធ្វើសកម្មភាពនៃការទទួលទាន និងផឹកនិមិត្តរូបនៃសាច់ និងព្រះលោហិតរបស់ទ្រង់ នោះវាជានិមិត្តសញ្ញាថា ព្រះគ្រីស្ទក្លាយជាផ្នែកមួយនៃយើង [ សូមមើ់ល យ៉ូហាន ៦:៥៦] ។…
ពេលយើងធ្វើសេចក្ដីសញ្ញាជាមួយព្រះនៅក្នុងដំណាក់នៃព្រះអម្ចាស់ នោះយើងពង្រឹងទំនាក់ទំនងយើងជាមួយទ្រង់កាន់តែខ្លាំង ។ អ្វីគ្រប់យ៉ាងដែលយើងធ្វើនៅក្នុងព្រះវិហារបរិសុទ្ធ នាំទៅរកផែនការរបស់ព្រះវរបិតាសម្រាប់យើង ដែលព្រះអង្គសង្រ្គោះ និងពលិកម្មធួនរបស់ទ្រង់គឺជាស្នូល ។…
… សម្លៀកបំពាក់ពិសិដ្ឋនៃព្រះវិហារបរិសុទ្ធរំឭកយើងថា ព្រះអង្គសង្រ្គោះ និងពរជ័យនៃដង្វាយធួនទ្រង់គ្របដណ្តប់យើងពេញមួយជីវិត ។ កាលយើងពាក់សម្លៀកបំពាក់ពិសិដ្ឋនៃបព្វជិតភាពដ៏បរិសុទ្ធជារៀងរាល់ថ្ងៃ នោះនិមិត្តសញ្ញាដ៏ស្រស់ស្អាតនេះបានក្លាយជាផ្នែកមួយនៃខ្លួនយើង ។…
… ខ្ញុំសូមថ្លែងទីបន្ទាល់ថា ពរជ័យដ៏អស្ចារ្យនៃទំនាក់ទំនងសេចក្ដីសញ្ញានោះគឺសមនឹងតម្លៃណាស់ ។