សម័យប្រជុំរសៀលថ្ងៃអាទិត្យ
ព្រះវិហារបរិសុទ្ធ ព្រះដំណាក់នៃព្រះអម្ចាស់កសាងច្រើននៅទូទាំងផែនដី
សេចក្តីដកស្រង់
តើបងប្អូនធ្លាប់ឆ្ងល់ទេថា ហេតុអ្វីព្រះអម្ចាស់ដឹកនាំព្យាការីរបស់ទ្រង់ឲ្យសង់ព្រះវិហារបរិសុទ្ធរបស់ទ្រង់ យ៉ាងច្រើននៅពេញផែនដី នាពេលឥឡូវនេះដូច្នេះ ?…
… មូលហេតុមួយគឺថា នៅក្នុងចំណោមចលាចល និងការល្បួងក្នុងលោកិយ ទ្រង់បានសន្យាថានឹងពង្រឹង និងប្រទានពរដល់ពួកបរិសុទ្ធនៃសេចក្ដីសញ្ញារបស់ទ្រង់ ហើយសេចក្ដីសន្យារបស់ទ្រង់កំពុងតែត្រូវបានបំពេញ !…
នៅក្នុងដំណាក់របស់ទ្រង់ យើងពិតជាទទួលបានអំណាចសួគ៌ាមែន ។ សេចក្ដីជំនឿរបស់យើងទៅលើព្រះយេស៊ូវគ្រីស្ទ និងសេចក្ដីស្រឡាញ់របស់យើងចំពោះទ្រង់ ត្រូវបានបញ្ជាក់ និងការពារ ។ យើងរៀនស្រឡាញ់ទ្រង់កាន់តែច្រើន ។ យើងទទួលបានការធានាខាងវិញ្ញាណអំពីអត្តសញ្ញាណដ៏ពិតរបស់យើង និងគោលបំណងនៃជីវិតនេះ ។ កាលយើងមានចិត្តស្មោះត្រង់ នោះយើងទទួលបានពរជ័យនៃការការពារពីការល្បួង និងការរំខានទាំងឡាយ ។ យើងទទួលអារម្មណ៍នៃសេចក្ដីស្រឡាញ់របស់ព្រះអង្គសង្រ្គោះនៅពេលទ្រង់លើកយើងចេញពីការលំបាករបស់យើង ។ យើងប្រដាប់ដោយព្រះចេស្ដារបស់ទ្រង់ ។…
មិត្តជាទីស្រឡាញ់របស់ខ្ញុំ បើយើងអាច និងមិនទាន់បានចូលរួមច្រើនក្នុងព្រះវិហារបរិសុទ្ធទេ សូមឲ្យយើងរកពេលបន្ថែមទៀត ដើម្បីថ្វាយបង្គំនៅក្នុងដំណាក់របស់ព្រះអម្ចាស់ឲ្យបានទៀងទាត់ ។…
ព្រះវិហារបរិសុទ្ធគឺមានន័យថា ដំណាក់នៃព្រះអម្ចាស់ ។ ខ្ញុំសន្យានឹងបងប្អូនថា កាលដែលបងប្អូនមកកាន់ដំណាក់ដ៏បរិសុទ្ធរបស់ទ្រង់ដោយភាពស័ក្ដិសម និងប្រកបដោយការអធិស្ឋាន នោះបងប្អូននឹងប្រដាប់ដោយព្រះចេស្ដាទ្រង់ ព្រះនាមទ្រង់នឹងលើកដាក់មកលើបងប្អូន ពួកទេវតារបស់ទ្រង់នឹងថែរក្សាបងប្អូន ហើយបងប្អូននឹងធំឡើងក្នុងពរជ័យនៃព្រះវិញ្ញាណបរិសុទ្ធ ។…
នៅជំនាន់នៃការច្របូកច្របល់ និងការចលាចលនេះ ខ្ញុំសូមថ្លែងទីបន្ទាល់ថា ព្រះវិហារបរិសុទ្ធគឺជាព្រះដំណាក់ដ៏បរិសុទ្ធរបស់ទ្រង់ ហើយនឹងជួយថែរក្សាយើង ការពារយើង ហើយរៀបចំយើងសម្រាប់ថ្ងៃដ៏រុងរឿងនោះ នៅពេលព្រះយេស៊ូវគ្រីស្ទយាងត្រឡប់មកវិញដោយមហិទ្ធិឬទ្ធិ ព្រះចេស្ដា និងសិរីរុងរឿងដ៏អស្ចារ្យ ដោយមានទេវតាដ៏បរិសុទ្ធទាំងអស់មកជាមួយ ។