ព្រះរាជបំណងរបស់ព្រះគឺដើម្បីនាំបងប្អូនទៅផ្ទះវិញ

សេចក្តីដកស្រង់

ដោយអែលឌើរ ផាទ្រីក ខៀរ៉ុន

ក្នុងកូរ៉ុមនៃពួកសាវកដប់ពីរនាក់

រូបភាព

ផាទ្រីក ខៀរ៉ុន

អ្វីៗទាំងអស់អំពីផែនការរបស់ព្រះវរបិតាសម្រាប់បុត្រាបុត្រីជាទីស្រឡាញ់របស់ទ្រង់គឺត្រូវបានរចនាឡើងដើម្បីនាំមនុស្សគ្រប់រូបត្រឡប់ទៅផ្ទះវិញ ។…

តើនេះមានន័យថាអ្វីគ្រប់យ៉ាងទៅស្របនឹងរបៀបដែលយើងរស់នៅក្នុងជីវិតរបស់យើងឬ ?… អត់ទេ គឺអត់ទេ ។… ជាមូលដ្ឋាននៃការបង្រៀនទាំងអស់របស់ទ្រង់ គឺឲ្យរស់នៅតាមក្រមសីលធម៌ខ្ពស់ គឺជាការអំពាវនាវឲ្យមានការរីកចម្រើនផ្ទាល់ខ្លួន ឲ្យផ្លាស់មកជឿលើព្រះគ្រីស្ទ ឆ្ពោះទៅកាន់ការផ្លាស់ប្ដូរដ៏ធំនៅក្នុងដួងចិត្ត ។…

បើយើងជឿលើបំណងនៃផែនការរបស់ព្រះវរបិតាសម្រាប់មនុស្សទាំងអស់ គឺដើម្បីសង្គ្រោះយើង ប្រោសលោះយើង ផ្ដល់សេចក្តីមេត្តាករុណាដល់យើង និងនាំឲ្យយើងមានសុភមង្គល តើព្រះរាជបុត្រាមានព្រះរាជបំណងអ្វីខ្លះតាមរយៈផែនការដ៏ធំនេះ ?…

ព្រះទ័យរបស់ព្រះយេស៊ូវ គឺជាព្រះទ័យដ៏សប្បុរសរបស់ព្រះវរបិតា ! ទ្រង់ចង់ធ្វើឲ្យបុត្រាបុត្រីរបស់ព្រះវរបិតាសួគ៌គ្រប់រូបទទួលបានគោលបំណងដ៏ខ្ពង់ខ្ពស់នៃផែនការនេះ —គឺដើម្បីទទួលបានជីវិតដ៏អស់កល្បជានិច្ចនៅជាមួយទ្រង់ទាំងទ្វេ ។ គ្មាននរណាម្នាក់ត្រូវបានដកចេញពីសក្តានុពលនៃព្រះនេះឡើយ ។…

ព្រះអង្គសង្រ្គោះជាអ្នកគង្វាលល្អបានទៅស្វែងរកចៀមដែលបាត់របស់ទ្រង់រហូតដល់ទ្រង់រកឃើញចៀមទាំងនោះ ។…

ទេ ! ទ្រង់មិនដាក់របាំងផ្លូវទេ ប៉ុន្តែទ្រង់នឹងដកយកវាចេញវិញ ។ ទ្រង់មិនបណ្ដេញបងប្អូនចេញឡើយ ប៉ុន្តែទ្រង់ស្វាគមន៍បងប្អូនឲ្យចូលមកវិញ ។…

នេះជាដំណឹងល្អ ! ខ្ញុំមានអំណរគុណយ៉ាងខ្លាំងចំពោះសេចក្ដីពិតដ៏សាមញ្ញទាំងនេះ ។ ការរៀបចំឡើងរបស់ព្រះវរបិតា ផែនការរបស់ទ្រង់ ព្រះរាជបំណងប្រាថ្នា និងសេចក្ដីសង្ឃឹមរបស់ទ្រង់គឺដើម្បីព្យាបាលបងប្អូន ប្រទានភាពសុខសាន្តដល់បងប្អូន នាំបងប្អូន និងមនុស្សជាទីស្រឡាញ់ត្រឡប់ទៅផ្ទះវិញ ។

មកស្គាល់ប្រវត្តិ អែលឌើរ ផាទ្រីក ខៀរ៉ុន

លោកកើតនៅថ្ងៃ ទី១៨ ខែ កក្កដា ឆ្នាំ ១៩៦១ នៅទីក្រុងខាឡែល ខំប៊ឺឡែន ប្រទេសអង់គ្លេស ។
លោករស់នៅប្រទេសអារ៉ាប់ ជាច្រើនឆ្នាំជាមួយគ្រួសាររបស់លោក ។
លោកចាប់ផ្តើមចូលរៀន និងស្នាក់នៅសាលានៅប្រទេសអង់គ្លេសពេលលោកមានអាយុ ១០ ឆ្នាំ ។ លោកនិយាយអំពីសាលានោះថា « បើប្រៀបធៀបទៅ ហារី ផតធឺ ប្រាកដជាមានជីវិតងាយស្រួលជាងនៅសាលា ហកវើត នោះ » ។ « វាពិបាកណាស់ » ។ ប៉ុន្តែលោកបានមានប្រសាសន៍ថា ពេលរស់នៅទាំងក្នុងប្រទេសអារ៉ាប់ និងប្រទេសអង់គ្លេស « ខ្ញុំបានជួបមនុស្សខុសគ្នាជាច្រើន » ហើយ « តាមរយៈបទពិសោធន៍នេះខ្ញុំបានរៀនថា ភាពខុសគ្នាភាគច្រើនគឺល្អ ហើយអស្ចារ្យណាស់ ! ជីវិតខ្ញុំបានចម្រើនឡើងហួសពីការស្មាន ដោយសារការប្រាស្រ័យទាក់ទងជាមួយនឹងមនុស្សដែលមានវប្បធម៌ និងជំនឿផ្សេងៗគ្នាដែលមកពីផ្នែកជាច្រើននៃពិភពលោកនេះ » ។
ពេលលោកមានអាយុប្រាំពីរឆ្នាំ ខ្យាដំរីបានខាំជើងលោកពេលកំពុងធ្វើដំណើរទៅបោះជំរំ ។
ជាក្មេងអាយុប្រាំបួនឆ្នាំរស់នៅលើវាលខ្សាច់អារ៉ាប់ ឪពុករបស់លោកបានបង្រៀនឲ្យលោកចេះបើកបរ ។
លោកបានទទួលពិធីបុណ្យជ្រមុជទឹក នៅល្ងាចមុនថ្ងៃបុណ្យគ្រីស្ទម៉ាស់ ក្នុងឆ្នាំ ១៩៨៧ នៅអាយុ ២៦ ឆ្នាំ ។
លោកបានជួបភរិយារបស់លោក ជែនីហ្វើរ ខណៈពេលដែលនាងទៅលេងទីក្រុងឡុងដ៍ ក្នុងអំឡុងពេលសិក្សានៅបរទេស ។ ពួកលោកបានរៀបអាពាហ៍ពិពាហ៍នៅក្នុងព្រះវិហារបរិសុទ្ធ អូកលែន រដ្ឋកាលីហ្វ័រញ៉ា នៅខែ មករា ឆ្នាំ ១៩៩១ ។
ពួកលោកមានកូនបួននាក់គឺ ៖ សៀន ( ដែលបានស្លាប់តំាងពីនៅជាទារក ) អេលីហ្សាប៊ែត ស៊ូសានណា និង អិមម៉ា ។
លោកបានធ្វើការនៅចក្រភពអង់គ្លេស អារ៉ាប៊ីសាអូឌីត និងសហរដ្ឋអាមេរិក ក្នុងវិស័យជាច្រើន ។ លោក និងភរិយារបស់លោកធ្លាប់បានធ្វើអាជីវកម្មទំនាក់ទំនងផ្ទាល់ខ្លួន ។
លោកត្រូវបានគាំទ្រជាអ្នកមានសិទ្ធិអំណាចទូទៅ នៅ ថ្ងៃទី ៣ ខែ មេសា ឆ្នាំ ២០១០ ។
លោកត្រូវបានហៅឲ្យបម្រើនៅក្នុងកូរ៉ុមនៃពួកសាវកដប់ពីរនាក់ នៅថ្ងៃទី ៧ ខែ ធ្នូ ឆ្នាំ ២០២៣ ។ លោកបានមានប្រសាសន៍ថា « ការហៅដ៏ពិសិដ្ឋនេះគឺ គួរឲ្យខ្លាច និងរាបសារបំផុតចំពោះខ្ញុំ » ។ « ខ្ញុំនឹងត្រូវដាក់សេចក្ដីទុកចិត្តទាំងអស់របស់ខ្ញុំទៅលើព្រះអង្គសង្គ្រោះ កាលដែលខ្ញុំព្យាយាមប្រែក្លាយដូចជាអ្វីដែលទ្រង់ត្រូវការខ្ញុំដើម្បីធ្វើ និង ចែកចាយទីបន្ទាល់របស់ខ្ញុំអំពីសេចក្ដីស្រឡាញ់ និងពន្លឺរបស់ទ្រង់ ។ … ខ្ញុំស្រឡាញ់ទ្រង់ ។ ខ្ញុំនឹងព្យាយាមបម្រើទ្រង់ឲ្យអស់ពីសមត្ថភាពរបស់ខ្ញុំ » ។