សម័យប្រជុំល្ងាចថ្ងៃសៅរ៍
បរិសុទ្ធភាពថ្វាយព្រះអម្ចាស់ក្នុងជីវិតប្រចាំថ្ងៃ
សេចក្តីដកស្រង់
នៅជុំវិញខ្លួនយើង មានឱកាសដើម្បីសើច រីករាយ មើលដោយភ្នែកនៃអំណរគុណ ។ ដំណឹងល្អរបស់យើងជាដំណឹងល្អនៃអំណរ និងបរិសុទ្ធភាពនៅក្នុងជីវិតប្រចាំថ្ងៃ ។ បរិសុទ្ធភាពញែកអ្វីៗចេញសម្រាប់គោលបំណងដ៏ពិសិដ្ឋ ។ ប៉ុន្តែ បរិសុទ្ធភាពក៏អញ្ជើញយើងឲ្យបញ្ចូលនូវរឿងពិសិដ្ឋទៅក្នុងការរស់នៅប្រចាំថ្ងៃផងដែរ—ដើម្បីរីករាយប្រចាំថ្ងៃ នៅក្នុងពិភពលោកដែលស្មុគស្មាញ និងលំបាកនេះ ។ ដើម្បីដើរជាមួយនឹងព្រះអម្ចាស់ យើងត្រូវតែក្លាយជាបរិសុទ្ធ ដ្បិតទ្រង់បរិសុទ្ធ ហើយដើម្បីជួយយើងឲ្យក្លាយជាបរិសុទ្ធ ព្រះអម្ចាស់អញ្ជើញយើងឲ្យដើរជាមួយនឹងទ្រង់ ។
គ្រួសារដែលមានសេចក្តីជំនឿ និងសហគមន៍នៃពួកបរិសុទ្ធ ប្រយុទ្ធនឹងភាពឯកោ និងក្រុមមនុស្សឯកោ ។ បរិសុទ្ធភាពថ្វាយព្រះអម្ចាស់និយាយថា ទេ ចំពោះអ្នកប្រមាថ និយាយថា ទេ ចំពោះការនិយាយកលមិនល្អពីអ្នកដទៃ និយាយថា ទេ ចំពោះក្បួនរកប្រាក់ដោយការញ៉ុះញ៉ង់កំហឹង និងការបែកបាក់ ។ បរិសុទ្ធភាពថ្វាយព្រះអម្ចាស់និយាយថា បាទ/ចាស ចំពោះភាពពិសិដ្ឋ និងគារវភាព និយាយថា បាទ/ចាស ចំពោះការក្លាយជាមនុស្សដែលមានសេរីភាពបំផុត រីករាយបំផុត ពិតប្រាកដបំផុត និងជាមនុស្សល្អបំផុត កាលយើងដើរតាមទ្រង់ដោយជំនឿ ។
បរិសុទ្ធភាពថ្វាយព្រះអម្ចាស់ធ្វើឲ្យការរស់នៅប្រចាំថ្ងៃពិសិដ្ឋ ។ វាធ្វើឲ្យយើងខិតកាន់តែជិត និងរីករាយចំពោះព្រះអម្ចាស់ និងចំពោះគ្នាទៅវិញទៅមក ហើយរៀបចំយើងដើម្បីរស់នៅជាមួយនឹងព្រះ ជាព្រះវរបិតារបស់យើង និងព្រះយេស៊ូវគ្រីស្ទ ព្រមទាំងមនុស្សជាទីស្រលាញ់របស់យើង ។
យើងអាចទទួលអារម្មណ៍នៃក្តីស្រលាញ់របស់ទ្រង់ នៅពេលយើងធ្វើឲ្យបរិសទ្ធភាពថ្វាយដល់ព្រះអម្ចាស់ប្រចាំថ្ងៃរបស់យើង រីករាយជារៀងរហូត ។