សូមមកចូលរួមជាមួយយើង
ដោយ ប្រធាន ឌៀថើរ អេស្វ អុជដូហ្វ
ទីប្រឹក្សាទីពីរក្នុងគណៈប្រធានទីមួយ
មានកន្លែងសម្រាប់អ្នកក្នុងសាសនាចក្រនេះ ដោយពុំខ្វល់ពីកាលៈទេសៈ ប្រវត្តិផ្ទាល់ខ្លួន ឬភាពរឹងមាំនៃទីបន្ទាល់ឡើយ ។
គ្រាមួយមានបុរសម្នាក់សុបិន្តថា គាត់នៅក្នុងសាលធំមួយដែលមានអ្នកតំណាងសាសនានៅទូទាំង ពិភពលោកជួបប្រជុំគ្នា ។ គាត់យល់ថា សាសនានីមួយៗបង្រៀនអ្វីច្រើនដែលគួរឲ្យប្រាថ្នា និងមានតម្លៃ ។
គាត់ជួបនឹងស្វាមីភរិយាមួយគូ ជាតំណាងពីសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ ហើយបានសួរថា « តើអ្នកតម្រូវឲ្យសមាជិកអ្នកធ្វើអ្វីខ្លះ ? »
ពួកគេឆ្លើយថា « យើងពុំតម្រូវអ្វីទេ គឺព្រះទេតើ ដែលយើងថ្វាយខ្លួនចំពោះនោះ » ។
ពួកគេពន្យល់ពីការហៅក្នុងសាសនាចក្រ ការបង្រៀន និងសួរសុខទុក្ខតាមផ្ទះ បេសកកម្មពេញម៉ោង រាត្រីជួបជុំគ្រួសារ កិច្ចការព្រះវិហារបរិសុទ្ធ សេវាកម្មសុខុមាលភាព និងសប្បុរសធម៌ និងការចាត់តាំងឲ្យបង្រៀន ។
បុរសនោះសួរថា « តើអ្នកធ្វើកិច្ចការទាំងនេះទទួលបានប្រាក់រង្វាន់ឬទេ ? »
ពួកគេពន្យល់ថា « អូ៎! អត់ទេ គេស្ម័គ្រចិត្តលះបង់ពេលវេលារបស់គេ » ។
ពួកគេបន្តថា « មិនតែប៉ុណ្ណោះ សមាជិកយើងចំណាយពេលចុងសប្ដាហ៍មើលសន្និសីទទូទៅរយៈពេល10ម៉ោង រៀងរាល់ប្រាំមួយខែម្ដងទៀតផង » ។
បុរសនោះងឿងឆ្ងល់ « ពួកគេឡើងនិយាយរយៈពេលដប់ម៉ោងឬ ? »
« ចុះតើការប្រជុំរាល់ថ្ងៃអាទិត្យដូចម្ដេចដែរ ? មានរយៈពេលប៉ុន្មាន ? »
« បីម៉ោងរាល់ថ្ងៃអាទិត្យ ! »
បុរសនោះបន្លឺថា « ម្ចាស់ថ្លៃអើយ តើសមាជិកសាសនាចក្រអ្នកពិតជាធ្វើអ្វីដែលអ្នកនិយាយឬ ។ »
« មែនហើយ និងមានច្រើនទៀត ។ យើងពុំទាន់បាននិយាយពីពង្សប្រវត្តិ ការបោះជំរុំរបស់យុរវ័យ ការប្រជុំធម្មនិដ្ឋាន ការសិក្សាគម្ពីរ ការប្រជុំហ្វឹកហ្វឺនអ្នកដឹកនាំ សកម្មភាពយុវវ័យ ថ្នាក់សិក្ខាសាលា ការថែទាំអគារព្រះវិហារ និងមែនហើយ យើងមានច្បាប់សុខភាពរបស់ព្រះ ការតមអាហារប្រចាំខែដើម្បីជួយទុរគតជន ព្រមទាំងដង្វាយមួយភាគក្នុងដប់ » ។
បុរសនោះវាចាថា « ខ្ញុំពុំយល់សោះ ឥឡូវនេះ ។ ហេតុអ្វីមានគេចង់ចូលរួមសាសនាចក្របែបនេះទៅហ្ន៎ ? »
ស្វាមីភរិយាញញឹម ហើយថ្លែងថា « យើងគិតថាអ្នកនឹងសួរដូចនេះ ? »
ហេតុអ្វីមានគេចូលរួមសាសនាចក្របែបនេះ ?
កាលដែលសាសនាចក្រជាច្រើនលើពិភពលោក កំពុងចុះអន់ថយចំនួនសមាជិក តែសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ---ថ្វីបើតូច បើប្រៀបធៀបនឹងព្រះវិហារដទៃទៀតជាច្រើនក្ដី ---ជាសាសនាចក្រមួយដែលរីកចម្រើនលឿនជាងគេលើផែនដីនេះ ។ គិតត្រឹមខែ កញ្ញា ឆ្នាំ 2013 សាសនាចក្រមានសមាជិកច្រើនជាង 15 លាននាក់នៅជុំវិញពិភពលោក ។
មានហេតុផលច្រើន ប៉ុន្តែខ្ញុំសូមលើកឡើងពីរបីបានទេ ?
សាសនាចក្ររបស់ព្រះអង្គសង្គ្រោះ
សាសនាចក្ររបស់ព្រះអង្គសង្គ្រោះ
ដំបូង សាសនាចក្រនេះបានសាងឡើងវិញនៅជំនាន់នេះដោយព្រះគ្រីស្ទទ្រង់ផ្ទាល់ ។ នៅសាសនាចក្រនេះ អ្នកនឹងឃើញថាមានសិទ្ធិអំណាចប្រព្រឹត្តតំណាងឲ្យទ្រង់ — ដើម្បីជ្រមុជទឹកសម្រាប់ការផ្ដាច់បាប ផ្ដល់អំណោយទានព្រះវិញ្ញាណបរិសុទ្ធ និងភ្ជាប់នៅផែនដី និងនៅស្ថានសួគ៌ ។ 1
អស់អ្នកដែលចូលសាសនាចក្រនេះ ស្រឡាញ់ព្រះអង្គសង្គ្រោះ យេស៊ូវគ្រីស្ទ ហើយគេចង់ធ្វើតាមទ្រង់ ។ គេអរសប្បាយនឹងតម្រិះដែលព្រះមានបន្ទូលមកកាន់មនុស្សសារជាថ្មី ។ ពេលគេទទួលបានពិធីបរិសុទ្ធបព្វជិតភាពដ៏ពិសិដ្ឋ និង ធ្វើសេចក្ដីសញ្ញាជាមួយព្រះ គេមានអារម្មណ៍ពីព្រះចេស្ដាព្រះនៅក្នុងជីវិត ។ 2 ពេលគេចូលព្រះវិហារបរិសុទ្ធ គេមានអារម្មណ៍ថា គេនៅក្នុងវត្តមានព្រះ ។ ពេលគេអានព្រះគម្ពីរដ៏បរិសុទ្ធ 3 និង រស់តាមការបង្រៀននៃព្យាការី នោះគេខិតកាន់តែជិតព្រះអង្គសង្គ្រោះដែលគេស្រឡាញ់យ៉ាងខ្លាំង ។
សេចក្ដីជំនឿដែលសកម្ម
សេចក្ដីជំនឿដែលសកម្ម
ហេតុផលមួយទៀត គឺព្រោះតែសាសនាចក្រផ្ដល់ឱកាសឲ្យធ្វើល្អ ។
ការជឿលើព្រះ គឺគួរឲ្យសរសើរ តែមនុស្សភាគច្រើនចង់ធ្វើលើសជាងការគ្រាន់តែស្ដាប់ទេសនកថាបំផុសគំនិត ឬ « សុបិននៃវិមានស្ថានសួគ៌ [ របស់គេ ] » ។ 4 គេចង់ធ្វើឲ្យជំនឿក្លាយទៅជាទង្វើ ។ គេចង់មូរដៃអាវឡើងធ្វើការ និងជាប់សន្យាក្នុងកិច្ចការអស្ចារ្យនេះ ។
នោះហើយជាអ្វីដែលកើតឡើងកាលគេចូលរួមនឹងយើង — គេមានឱកាសច្រើនដើម្បីបំប្លែងទេពកោសល្យ មេត្តាធម៌ និងពេលវេលារបស់គេទៅជាកិច្ចការល្អ ។ ព្រោះយើងពុំទទួលបានប្រាក់ជាសាសនាចារ្យក្នុងក្រុមជំនុំទូទាំងពិភពលោក នោះសមាជិកធ្វើការបម្រើដោយខ្លួនគេ ។ គេត្រូវហៅដោយការបំផុសគំនិត ។ ជួនកាល យើងស្ម័គ្រចិត្ត ជួនកាល យើងគឺ « ត្រូវបានចាត់តាំង » ។ យើងពុំចាត់ទុកការចាត់តាំងជាបន្ទុកនោះទេ តែជាឱកាសបំពេញសេចក្ដីសញ្ញាដែលយើងបានចុះដើម្បីធ្វើការបម្រើព្រះ និង កូនចៅទ្រង់ ។
ពរជ័យរតនសម្បត្តិ
ពរជ័យរតនសម្បត្តិ
ហេតុផលទីបី មូលហេតុដែលមនុស្សចូលសាសនាចក្រ គឺព្រោះតែការដើរតាមមាគ៌ាជាសិស្ស នាំទៅរកពរជ័យដ៏ថ្លៃថ្លា ។
យើងចាត់ទុកបុណ្យជ្រមុជទឹកជាចំណុចផ្ដើមនៃជីវិតជាសិស្ស ។ ការដើរតាមព្រះគ្រីស្ទនាំយើងទៅរកសន្តិភាព និងគោលបំណងក្នុងជីវិត និងសេចក្ដីអំណរខ្លាំង និងការសង្គ្រោះដ៏អស់កល្បជានិច្ចនៅលោកខាងមុខ ។
អស់អ្នកដើរតាមមាគ៌ានេះយ៉ាងស្មោះត្រង់ចៀសផុតពីអន្លង់គ្រោះថ្នាក់ ទុក្ខព្រួយ និងវិប្បដិសារីនៃជីវិត ។
អ្នកកំសត់ខាងវិញ្ញាណ និងទៀងត្រង់ រកឃើញសម្បត្តិលើសលប់នៃតម្រិះនៅទីនេះ ។
អ្នករងទុក្ខ ឬ សោកសង្រេងបានកម្សាន្តចិត្តនៅទីនេះ ។
អ្នកមានអំពើបាបបានអត់ទោស ដោះលែង និងសម្រាក ។
ចំពោះអ្នកដែលដើរចេញ
ការស្វែងរកសេចក្ដីពិតនាំមនុស្សរាប់លាននាក់មកសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ ។ ប៉ុន្តែ បែរជាមានមនុស្សខ្លះដើរចេញពីសាសនាចក្រដែលគេធ្លាប់ស្រឡាញ់ទៅវិញ ។
មានគេអាចសួរថា « បើដំណឹងល្អអស្ចារ្យ ហេតុអ្វីមានគេដើរចេញទៅវិញ ? »
យើងអាចសន្និដ្ឋានថា ព្រោះគេបាក់ទឹកចិត្ត ឬ ខ្ជិល ឬ ប្រព្រឹត្តបាប ។ ប្រាកដណាស់ វាពុំងាយអញ្ជឹងទេ ។ តាមពិត វាពុំគ្រាន់តែជាហេតុផលមួយទេ ចំពោះស្ថានភាពចម្រុះនោះ ។
សមាជិកជាទីស្រឡាញ់របស់យើងខ្លះ ស្មុគស្មាញ ហើយសួរខ្លួនថាតើគេគួរដកខ្លួនចេញពីសាសនាចក្រឬទេ ។
ក្នុងសាសនាចក្រនេះ ដែលគោរពដល់សិទ្ធិជ្រើសរើសផ្ទាល់ខ្លួនយ៉ាងខ្លាំង ដែលបានស្ដារឡើងវិញដោយយុវជនម្នាក់ដែលមានសំណួរ និងរកចម្លើយ នោះយើងគោរពអ្នកដែលស្វែងរកសេចក្ដីពិតយ៉ាងស្មោះ ។ វាអាចនឹងបំបាក់ដួងចិត្តយើង ពេលជីវិតគេត្រូវដកចេញពីសាសនាចក្រដែលយើងស្រឡាញ់ និងសេចក្ដីពិតដែលយើងមាន តែយើងផ្ដល់កិត្តិយសដល់សិទ្ធិដើម្បីថ្វាយបង្គំព្រះ ស្របតាមឆន្ទៈនៃសតិសម្បជញ្ញៈខ្លួន ដូចយើងប្រកាសពីសិទ្ធិនោះសម្រាប់ខ្លួនយើងដែរ ។ 5
សំណួរដែលពុំទាន់ឆ្លើយ
មនុស្សខ្លះស្មុគស្មាញពីសំណួរដែលគ្មានចម្លើយ ពីអ្វីដែលបានធ្វើ ឬ និយាយពីអតីត ។ យើងទទួលស្គាល់យ៉ាងបើកចំហរថា ជិត 200 ឆ្នាំនៃប្រវត្តិសាស្ត្រសាសនាចក្រ — អមដោយការបំផុសគំនិតពុំចេះស្បើយ ភាពថ្លៃថ្នូរ និងព្រឹត្តិការណ៍ដ៏ទេវភាព — មានរឿងខ្លះដែលបាននិយាយ និងធ្វើដែលអាចបណ្ដាលឲ្យមនុស្សចោទជាសំណួរ ។
ពេលខ្លះ សំណួរចោទឡើង ព្រោះតែយើងពុំមានព័ត៌មានទាំងស្រុង ហើយយើងគ្រាន់តែត្រូវអត់ធ្មត់បន្តិចទៀត ។ ពេលសេចក្ដីពិតទាំងស្រុងត្រូវបានស្គាល់ដល់យើង នោះរឿងដែលពុំច្បាស់ពីមុននឹងត្រូវបានដោះស្រាយបំពេញចិត្តយើង ។
ជួនកាលមានយោបល់ខុសគ្នាថា « ភាពពិត » ជាអ្វីពិតទៅ ។ សំណួរមួយដែលបង្កើតមន្ទិលក្នុងគំនិតមនុស្សខ្លះអាចសាងសេចក្ដីជំនឿក្នុងមនុស្សដទៃបន្ទាប់ពីការស្រាវជ្រាវយ៉ាងល្អិតល្អន់ ។
កំហុសនៃមនុស្សពុំគ្រប់លក្ខណ៍
ហើយដើម្បីមានភាពស្មោះស្ម័គ្រគ្រប់លក្ខណ៍ នោះវាមានពេលដែលសមាជិក ឬ អ្នកដឹកនាំសាសនាចក្រជាធម្មតាធ្វើកំហុស ។ ធ្លាប់មានរឿងដែលត្រូវបានពោល និងធ្វើ ដែលពុំចុះសម្រុងនឹងគុណតម្លៃ គោលកាណ៍ ឬគោលលទ្ធិយើង ។
ខ្ញុំគិតថាសាសនាចក្រនឹងបានគ្រប់លក្ខណ៍ បើសាសនាចក្រដឹកនាំដោយមនុស្សដែលគ្រប់លក្ខណ៍ ។ ព្រះល្អគ្រប់លក្ខណ៍ ហើយគោលលទ្ធិទ្រង់បរិសុទ្ធ ។ តែទ្រង់ធ្វើការតាមរយៈយើង — ដែលជាកូនចៅពុំគ្រប់លក្ខណ៍ — ហើយមានកំហុស ។
នៅទំព័រចំណងជើងក្នុងព្រះគម្ពីរមរមនថ្លែងថា « ហើយបើសិនជាមានកំហុសអ្វីសោត កំហុសទាំងនោះគឺជារបស់ផងមនុស្ស ហេតុដូច្នេះហើយ សូមកុំថ្កោលទោសដល់វត្ថុដែលជារបស់ផងព្រះឡើយ ដើម្បីឲ្យអ្នករាល់គ្នាអាចបានឃើញថា គ្មានទោសនៅចំពោះវេទិកាជំនុំជំរះនៃព្រះគ្រីស្ទ » ។ 6
នេះជារបៀបដែលធ្លាប់មាន ហើយនឹងនៅតែមានដរាបដល់ថ្ងៃអស្ចារ្យដែលព្រះគ្រីស្ទទ្រង់ផ្ទាល់សោយរាជ្យលើផែនដី ។
ជាអកុសលដែលមនុស្សខ្លះ ជំពប់ដួលដោយសារកំហុសធ្វើឡើងដោយមនុស្ស ។ ប៉ុន្តែ ដោយពុំគិតពីកំហុសនេះ សេចក្ដីពិតអស់កល្បនៃដំណឹងល្អស្ដារឡើងវិញ ដែលមានក្នុងសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ ពុំអាប់រស្មី ចុះថយ ឬត្រូវបំផ្លាញឡើយ ។
ក្នុងនាមជាសាវកនៃព្រះយេស៊ូវគ្រីស្ទ និងជាបុគ្គលដែលបានឃើញដំបូន្មាន និង កិច្ចការសាសនាចក្រនេះមុនគេ ខ្ញុំសូមថ្លែងទីបន្ទាល់ជាឱឡារិកថា គ្មានការសម្រេចចិត្តដ៏សំខាន់ណា ដែលជះឥទ្ធិពលលើសាសនាចក្រនេះ ឬសមាជិក ដែលបានធ្វើឡើងដោយពុំមានការស្វែងរកការបំផុសគំនិត ការដឹកនាំ និងការយល់ព្រមពីព្រះបិតាអស់កល្បយើងឡើយ ។ នេះគឺជាសាសនាចក្រនៃព្រះយេស៊ូវគ្រីស្ទ ។ ព្រះនឹងពុំអនុញ្ញាតឲ្យសាសនាចក្រទ្រង់ រសាត់ឆ្ងាយពីទិសដៅដែលកំណត់ ឬបរាជ័យក្នុងជោគវាសនាដ៏ទេវភាពឡើយ ។
មានកន្លែងសម្រាប់អ្នក
ឱ ចំពោះអ្នកដែលបានដកខ្លួនពីសាសនាចក្រទៅហើយ ខ្ញុំសូមជម្រាបថា ឱ មិត្តជាទីស្រឡាញ់របស់ខ្ញុំអើយ នៅមានកន្លែងសម្រាប់បងប្អូននៅទីនេះ ។
សូមមក ហើយបូកបញ្ចូលទេពកោសល្យ អំណោយទាន និងកម្លាំងជាមួយនឹងយើង ។ ជាលទ្ធផលយើងនឹងកាន់តែប្រសើរទាំងអស់គ្នា ។
មនុស្សខ្លះអាចសួរ « ចុះតើមន្ទិលរបស់ខ្ញុំយ៉ាងម៉េចដែរ ? »
ជាធម្មតាទេដែលមានសំណួរនោះ — គ្រាប់ពូជនៃសំណួរស្មោះត្រង់តែងលេចពន្លកឡើង និងលូតលាស់ជាដើមឈើយល់ដឹងមួយដ៏ធំ ។ មានសមាជិកខ្លះពុំស្វិតស្វាញនឹងសំណួរប្រាកដប្រជា ឬធ្វើឲ្យអន់ចិត្តឡើយនៅពេលមួយ ឬផ្សេងទៀត ។ គោលបំណងនៃសាសនាចក្រគឺបីបាច់ និងបណ្ដុះគ្រាប់ពូជនៃសេចក្ដីជំនឿ — សូម្បីពេលខ្លះជាដីខ្សាច់នៃមន្ទិល និងភាពមិនប្រាកដក្ដី ។ សេចក្ដីជំនឿគឺត្រូវសង្ឃឹមលើការណ៍ដែលមើលពុំឃើញ តែពិត ។ 7
ដូច្នេះ បងប្អូនប្រុសស្រីជាទីស្រឡាញ់របស់ខ្ញុំ---ជាមិត្តជាទីស្រឡាញ់ខ្ញុំអើយ---សូមសង្ស័យមន្ទិលអ្នកពីមុនសង្ស័យសេចក្ដីជំនឿអ្នក ។ 8យើងពុំត្រូវអនុញ្ញាតឲ្យមន្ទិលចាប់យើងជាអ្នកទោស ហើយបញ្ចៀសយើងពីសេចក្ដីស្រឡាញ់ព្រះ ភាពសុខសាន្ត និងអំណោយទាន ដែលបានមកពីសេចក្ដីជំនឿលើព្រះយេស៊ូវគ្រីស្ទជាដាច់ខាត ។
មនុស្សខ្លះអាចថ្លែងថា « ខ្ញុំពុំសមនៅជាមួយនឹងអ្នកក្នុងសាសនាចក្រនេះទេ » ។
បើអ្នកអាចមើលក្នុងចិត្តយើងបាន អ្នកមុខជាយល់ថា អ្នកសមជាងអ្វីដែលស្មានទៅទៀត ។ អ្នកអាចភ្ញាក់ផ្អើលដែលយើងមានចំណង់ និងការពុះពារ និងសេចក្ដីសង្ឃឹមស្រដៀងគ្នានឹងអ្នកដែរ ។ ប្រវត្តិ ឬការអប់រំអ្នកអាចនឹងខុសពីអ្វីដែលអ្នកសង្កេតក្នុងពួកបរិសុទ្ធថ្ងៃចុងក្រោយ តែនោះអាចជាពរជ័យ ។ បងប្អូនប្រុសស្រី មិត្តជាទីស្រឡាញ់ យើងត្រូវការទេពកោសល្យ និង ទស្សនវិស័យផ្សេងៗគ្នារបស់អ្នក ។ ភាពប្លែកពីគ្នានៃបុគ្គល និងក្រុមមនុស្សពេញពិភពលោក គឺជាកម្លាំងនៃសាសនាចក្រនេះ ។
មនុស្សខ្លះអាចថ្លែងថា « ខ្ញុំពុំគិតថាអាចរស់តាមបទដ្ឋានអ្នកបានទេ » ។
អ្វីៗទាំងអស់ នាំឲ្យមានជាហេតុផល អ្នកត្រូវមក ! សាសនាចក្របង្កើតឡើងដើម្បីបីបាច់មនុស្សមិនគ្រប់លក្ខណ៍ ស្មុគស្មាញ និងអ្នកអស់កម្លាំង ។ វាពេញដោយមនុស្សដែលមានបំណងប្រាថ្នា ក្នុងចិត្តដើម្បីរក្សាបញ្ញត្តិ សូម្បីតែគេពុំធ្លាប់ធ្វើវាក្ដី ។
មនុស្សខ្លះអាចនិយាយថា « ខ្ញុំស្គាល់សមាជិកលាក់ពុតម្នាក់ក្នុងសាសនាចក្រអ្នក ។ ខ្ញុំពុំអាចចូលសាសនាចក្រដែលមានមនុស្សដូចជាម្នាក់ហ្នឹងធ្វើជាសមាជិកឡើយ » ។
បើអ្នកលើកឡើងពីការលាក់ពុត ដូចនរណាម្នាក់ដែលបរាជ័យរស់នៅយ៉ាងគ្រប់លក្ខណ៍ចំពោះអ្វីដែលយើងជឿ នោះយើងទាំងអស់សុទ្ធតែលាក់ពុត ។ គ្មាននរណាម្នាក់ក្នុងចំណោមយើងដូចព្រះគ្រីស្ទទេ ទោះជាយើងដឹងថា យើងគួរតែធ្វើឲ្យដូចក្តី ។ តែយើងមានបំណងអស់ពីចិត្ត ដើម្បីយកឈ្នះកំហុស និងនិន្នាការធ្វើបាប ។ ជាមួយនឹងដួងចិត្ត និងព្រលឹងយើង យើងចង់ប្រែក្លាយកាន់តែប្រសើរ ដោយជំនួយនៃដង្វាយធួនរបស់ព្រះគ្រីស្ទ ។
បើទាំងនេះជាបំណងអ្នក មានកន្លែងសម្រាប់អ្នកក្នុងសាសនាចក្រនេះ ដោយពុំខ្វល់ពីកាលៈទេសៈ ប្រវត្តិផ្ទាល់ខ្លួន ឬភាពរឹងមាំនៃទីបន្ទាល់ទេ ។ សូមមកចូលរួមជាមួយយើង !
សូមមកចូលរួមជាមួយយើង !
ដោយពុំគិតពីភាពមិនគ្រប់លក្ខណ៍នៃមនុស្ស ខ្ញុំជឿជាក់ថា អ្នកនឹងរកឃើញព្រលឹងអស្ចារ្យជាច្រើនក្នុងចំណោមសមាជិកសាសនាចក្រនេះ ដែលផែនដីនេះត្រូវផ្ដល់ ។ សាសនាចក្រនៃព្រះយេស៊ូវគ្រីស្ទ ហាក់ដូចជាទាក់ទាញមនុស្សចិត្តល្អ និងអ្នកចេះខ្វាយខ្វល់ ពួកស្មោះត្រង់ និងពួកឧស្សាហ៍ ។
បើអ្នកចង់រកមនុស្សគ្រប់លក្ខណ៍នៅទីនេះ នោះអ្នកនឹងខកចិត្តហើយ ។ តែបើអ្នករកគោលលទ្ធិពិតនៃព្រះគ្រីស្ទ ជាបន្ទូលនៃព្រះ « ដែលប្រោសព្រលឹងមានរបួសឈឺចាប់ » 9 និងឥទ្ធិពលបន្សុទ្ធចិត្តនៃព្រះវិញ្ញាណបរិសុទ្ធ នោះអ្នកនឹងរកឃើញនៅទីនេះ ។ នៅគ្រានៃសេចក្ដីជំនឿតិច — នៅគ្រាដែលមនុស្សជាច្រើនគិតថា នៅឆ្ងាយពីស្ថានសួគ៌ — នៅទីនេះអ្នកនឹងរកឃើញមនុស្សដែលខ្នះខ្នែងស្គាល់ និងខិតកាន់តែជិតព្រះអង្គសង្គ្រោះដោយការបម្រើព្រះ និងមនុស្សជុំវិញ គឺដូចជារូបអ្នកដែរ ។ សូមមកចូលរួមជាមួយយើង !
តើអ្នកនឹងដកថយដែរឬ ?
ខ្ញុំនឹកឃើញពីគ្រាដែលព្រះអង្គសង្គ្រោះត្រូវគេបោះបង់ចោល ។ 10 ព្រះយេស៊ូវបានសួរពួកសិស្សទាំងដប់ពីររូបថា ៖
« តើអ្នកនឹងដកថយដែរឬ ?
« ស៊ីម៉ូន ពេត្រុសឆ្លើយថា ព្រះអម្ចាស់អើយ តើយើងខ្ញុំនឹងទៅឯណាវិញ ? គឺទ្រង់ហើយដែលមានព្រះបន្ទូលជីវិតដ៏អស់កល្បជានិច្ច » ។ 11
មានពេលដែលយើងត្រូវឆ្លើយនឹងសំណួរដដែលៗ ។ តើយើងនឹងដកថយដែរឬ ? ឬ តើយើងនឹងធ្វើដូចជាពេត្រុស ដែលកាន់ខ្ជាប់នឹងព្រះបន្ទូលនៃជីវិតដ៏អស់កល្បឬ ?
បើអ្នកស្វែងរកសេចក្ដីពិត អត្ថន័យ និងមាគ៌ាបំប្លែងសេចក្ដីជំនឿទៅជាទង្វើ បើសិនអ្នករកកន្លែងនៃម្ចាស់ការ ៖ សូមមកចូលរួមជាមួយយើង !
បើអ្នកបានទុកសេចក្ដីជំនឿដែលអ្នកធ្លាប់ឱបក្រសោប ៖ សូមត្រឡប់មកវិញ ។ សូមមកចូលរួមជាមួយយើង !
បើអ្នកត្រូវល្បួងឲ្យចុះចាញ់ ៖ សូមនៅបន្តិចទៀតចុះ ។ មានកន្លែងសម្រាប់អ្នកនៅទីនេះ ។
ខ្ញុំសូមអង្វរអ្នកដែលឮ ឬអានពាក្យទាំងនេះ ៖ សូមមកចូលរួមជាមួយយើង ។ ចូរមកស្ដាប់ការហៅនៃព្រះគ្រីស្ទដ៏ទន់ភ្លន់ ។ ចូរលីឈើឆ្កាងរបស់អ្នក ហើយដើរតាមទ្រង់ ។ 12
សូមមកចូលរួមជាមួយយើង ! ត្បិតទីនេះ អ្នកនឹងរកឃើញអ្វីដែលថ្លៃថ្លាលើសជាងតម្លៃទៅទៀត ។
ខ្ញុំសូមថ្លែងទីបន្ទាល់ថា នៅទីនេះនឹងរកឃើញបន្ទូលនៃជីវិតអស់កល្ប ការសន្យានៃការប្រោសលោះ និងមាគ៌ាឆ្ពោះទៅភាពសុខសាន្ត និងសុភមង្គល ។
ខ្ញុំសូមអធិស្ឋានដោយស្មោះថា ការស្វែងរកសេចក្ដីពិតរបស់អ្នកនឹងដិតដាមក្នុងចិត្តនូវបំណងដើម្បីមក ហើយចូលរួមជាមួយយើង ។ ក្នុងព្រះនាមដ៏ពិសិដ្ឋនៃព្រះយេស៊ូវគ្រីស្ទ អាម៉ែន ។