Sea Humilde
Pa Elder Steven E. Snow
Di e Setenta
Humildat ta permití nos di ta mihó mayornan, yunan, kasánan, bisiñanan i amigunan.
Nos ta bendishoná den Iglesia di tin un kolekshon di himnonan ku ta yuda nos alabá pa medio di kantika. Den nos reunionnan di Iglesia, “e himnonan ta invitá e Spiritu di Señor, krea un sentimentu di reverensia, unifiká nos komo miembro, i proveé un manera pa nos por duna nos alabansa na Señor. Algun di e gran sermonnan ta wòrdu prediká pa medio di kanto di e himnonan.”1
Solamente algun luna despues ku Iglesia a wòrdu organisá, Profeta Jose Smith a risibí un revelashon e pa su kasá, Emma. Señor a mand’é pa “hasi un selekshon di himnonan sagrado, manera ku e lo wòrdu indiká na bo, ku ta plasentero p’ami, pa por wòrdu usá den mi iglesia.”2
Emma a traha un kolekshon di himnonan ku a aparesé pa promé biaha den e himnario aki di Kirtland na 1836.3 Tabatin solamente 90 kantika inkluí den e buki fini aki. Hopi di nan tabata himnonan di otro iglesianan Protestant. Por lo ménos 26 di nan tabata komponé pa William W. Phelps, ken despues a prepará i a yuda den imprenta di e himnario. Solamente e letranan a wòrdu skibí; no tabata tin notanan musikal pa kompañá e teksto. E himnario chikitu i humilde aki a demostrá di ta un bendishon grandi pa e promé miembronan di Iglesia.
E lastu edishon di nos himnario na ingles a wòrdu publiká na 1985. Hopi di e selekshonnan ku Emma a skohe hopi aña pasá ainda ta inkluí den nos himnario, manera “Yo se que vive mi Señor” i “Que firmes cimientos.”4
Un di e himnonan ku tabata nobo den e himnario di 1985 ta “Se Humilde”.5 E himno trankilo aki skibi pa Grietje Terburg Rowley, ku a fayesé aña pasa. E la uni na iglesia na 1950 na Hawaii, kaminda e tabata duna lès na un skol. Hermana Rowley a sirbi den e Komité General di Músika i a yuda adaptá e himnonan na vários idioma. E la basa su teksto pa “Se Humilde” riba dos versíkulo di eskritura: Doctrina y Convenios 112:10 i Eter 12:27. E versíkulo den Eter ta bisa ku si hende bini na Dje E lo mustra nan, nan debilidat. E ta duna debilidat na hende pa nan humiliá nan mes; i Su grasia ta sufisiente pa tur hende ku humiliá nan mes dilanti Dje; pasobra si nan humiliá nan mes dilanti Dje, i tin fe den Dje, E lo hasi kosnan suak bira fuerte pa nan.
Meskos ku hopi di e himnonan di Iglesia, “Se Humilde” ta siña nos bèrdatnan puru i simpel. E ta siña nos ku si nos humiliá nos mes, nos orashonnan lo wòrdu kontesta; nos lo disfrutá di pas mental; nos ta sirbi mas efikasmente den nos yamamentunan; i si nos sigui pa ta fiel, nos lo logra yega den presensia di nos Tata Selestial.
E Salbador a siña su siguidónan ku nan mester humiliá nan mes manera muchanan chikitu pa nan por drenta den e reino di shelu.6 Ora nos ta lanta nos propio yunan, nos tin ku yuda nan keda humilde ora nan ta madurando i bira adulto. Nos no por hasi esaki dor di kibra nan spiritu pa medio di falta di amabilidat òf dor di ta muchu duru den nos manera di disipliná. Ora nos ta nutri konfiansa propio i outo-estima, nos tin ku siña nan e kualidatnan di desinteres, bondat, obedensia, falta di orguyo, kortesia i falta di pretenshon. Nos mester pa nan siña gosa di e éksitonan di nan rumannan i amigunan. Presidente Howard W. Hunter a siña nos ku “nos preokupashon genuino mester ta pa e éksito di otronan.”7 Si no ta asina, nos yunan por bira opseshoná ku elogiá nan mes i di ta mihó ku otronan, yalurs i resentimentu pa triunfo di nan kompañeronan. Mi ta agradesido na mi mama ku, ora el a mira ku mi tabata muchu orguyoso di mi mes, e tabata bisa, “mi yu, un tiki di humildat lo hopi bon bo aworakí.”
Pero humildat no ta algu reservá solamente pa siña na mucha. Nos tur mester hasi nos esfuerso pa ta mas humilde. Humildat ta esensial pa gana e bendishonnan di e evangelio. Humildat ta pèrmití nos di tin kurasonnan kibrá ora nos hasi piká of hasi fayonan i ta hasi posibel pa nos arepentí. Humildat ta permití nos di ta mihó mayornan, yunan, kasánan, bisiñanan i amigunan.
Na otro banda, orguyo innesesario por kibra relashonnan familiar, kibra matrimonionan, i destruí amistatnan. Ta spesialmente importante pa kòrda humildat ora nos ta sinti e kontenshon ta krese den nos hogar. Pensa tokante di tur e dolor di kurason ku bo por evitá dor di humiliá bo mes pa bisa, “despensá mi, esei tabata sin konsiderashon di mi parti”; “kiko lo bo ke hasi?” “Mi no tabata pensa” òf “Mi ta hopi orguyoso di bo.” Si e frasenan chikitu aki ta wòrdu usa humildemente, lo tin ménos kontenshon i mas pas den nos hogar.
Simplemente biba bida por ta hopi bia un eksperensia di humildat. Aksidente i enfermedat, e morto di un ser kerí, problemanan di relashon, hasta problemanan finansiero por hiba nos na nos rudianan. Si e eksperensianan difísil aki no ta nos falta òf pa medio di desishonnan malu i mal eskoho, e tribulashonnan aki ta yena nos ku humildat. Si nos skohe pa ta enfoká spiritualmente i keda humilde i habrí pa siña, nos orashonnan lo bira mas profundo i fe i testimonio lo krese ora nos ta surpasá e tribulashonnan di nos eksistensia mortal. Nos tur ta spera eksaltashon, pero promé ku esei pasa, nos mester perseverá den loke a wòrdu yama e vaye di humildat.8
Hopi aña pasa, nos yu di 15 aña Eric a sufri un sla na su kabes hopi serio. Mir’é den koma pa mas ku un siman a kibra nos kurason. E dòkternan a bisa nos ku nan no tabata sigur di kiko lo bai pasa despues. Opviamente nos tabata felis ora ku el a kuminsá bini bei. Nos a pensa awor ku tur kos lo sali bon, pero nos tabata robes.
Ora e la lanta, e no por a kana òf papia òf duna su mes di kome. Pió ainda, e la pèrdè su memoria di tempu kòrtiku. E por a kòrda kasi tur kos di promé ku e aksidente, pero e no tabatin e abilidat di kòrda eventonan despues, hasta kosnan ku a pasa solamente minütnan promé.
Pa un tempu, nos tabata preokupá ku nos yu ta será den mente di un mucha di 15 aña. Kosnan tabata yega hopi fásil pa nos yu promé ku e aksidente. E tabata atlétiko, popular i tabata bai hopi bon na skol. Promé, su futuro tabata parse briante’ awor nos tabata preokupá ku e lo no tin masha futuro, of sikiera unu ku e por kòrda. Awor e tabata tin ku siña e abilidatnan básiko di nobo. Esaki tabata un tempu ku el a sintié hopi humilde . Tabata un temporada di humildat pa su mayornan tambe.
Honestamente, nos a puntra nos mes kon algu asin’ei por a pasa. Semper nos a hasi nos esfuerso pa hasi e kosnan bon. Bibando e evangelio tabata e prioridat haltu pa nos famia. Nos no por a komprondé kon algu asina doloroso por a pasa ku nos. Nos a bai na nos rudianan asina ku a bira kla ku su rekuperashon lo a tuma lunanan, hasta añanan. Mas difísil ainda tabata e realisashon gradual ku e lo no bira manera e tabata ántes.
Durante e tempu aki, nos a drama hopi lágrima i nos orashonnan a bira ainda mas di kurason i sinsero. Dor di e wowonan di humildat, gradualmente nos a kuminsá wak e milagernan chikitu ku nos yu tabata eksperensiá durante e tempu doloroso aki. E la kuminsá tin progreso gradualmente. Su aktitut i perspektiva tabata hopi positivo.
Awe, nos yu Eric ta kasá ku un kompañero maravioso i nan tin sinku yu bunita. E ta un edukador pashoná i ta kontribuí na su komunidat, i tambe na Iglesia. Mas importante, e ta sigui biba den e mesun spiritu di humildat ku e la haña hopi tempu pasa.
Pero kiko si nos por ta humilde promé ku nos kana den e vaye di humildat? Alma a siña nos:
“Bendishoná ta esnan ku humiliá nan mes sin wòrdu obligá na ta humilde.”
“Si, [nan ta] mas bendishoná ku esnan ku a wòrdu obligá di ta humilde.”9
Mi ta agradesido pa profetanan, manera Alma, ku a siña nos e balor di e gran atributo aki. Spencer W. Kimball, e di 12 Presidente di Iglesia, a bisa: “Kon un persona por bira humilde? Pa ami, e persona mester wòrdu rekordá konstantemente di su dependensia. Dependensia na ken? Na Señor. Kon rekordá nos mes esei? Pa medio di orashon real, konstante, reverente i gradesido.”10
No mester ta un sorpresa ku e himno faborito di Presidente Kimball tabata “Señor Te necesito.”11 Elder Dallin H. Oaks a reportá ku esaki ta e himno di apertura ku ta wòrdu kantá ku mas frekuensia dor di e rumannan den tèmpel durante su promé añanan den e Quorum di e Diesdos Apòstelnan. “Imaginá boso e impakto spiritual di un grupo di Señor su siervonan kantando e himno aki promé ku orashon pa Su guia den kumpli ku e responsabilidatnan enorme ku nan tin.”12
Mi ta testifiká di e importansia di humildat den nos bida. Mi ta gradesido pa e personanan manera Hermana Grietje Rowley ku a skibi e palabranan i músika inspiradó ku ta yuda nos siña e doktrina di evangelio di Jesucristu, ku ta inkluí humildat. Mi ta gradesido ku nos tin un herensia di himnonan, ku ta yuda nos pa adorá pa medio di kanto, i mi ta gradesido pa humildat. Ta mi orashon ku nos tur por esforsá pa humildat den nos bida p’asina nos por bira mihó mayornan, yunan, i siguidonan di e Salbador. Den e nòmber di Jesucristu, amèn.