Konsehonan Familiar

Pa Elder M. Russel Ballard

Di e Quorum di e Diesdos Apòstelnan

Ora ku mayornan ta prepará i yunan ta skucha i partisipá den e diskushon, e konseho di famia realmente ta funshonando!

Mi rumannan, e ironia di ta mayor ta ku nos tin tendensia di bira bon den dje despues ku nos yunan a krese kaba. Awe tardi mi ta bai kompartí algu ku boso ku mi a deseá ku mi a komprondé mas mihó ora ku ami i Barbara a kuminsá kria nos yunan presioso.

Durante di mi ministerio apostóliko, hopi biaha mi a enfatisá e poder i importansia di konsehonan di Iglesia, inkluyendo konsehonan di mishon, staka, bario i di e konseho ouksiliar.

Mi ta kere ku konsehonan ta e manera mas efektivo pa haña resultadonan berdadero. Adishonalmente, mi sa ku konsehonan ta Señor su manera i ku Ela krea tur kos den universo por medio di un konseho selestial, manera ta wòrdu menshoná den e skritura sagrado.¹

Sinembargo, te awor aki, nunka mi no a papia den un konferensha general over di e konseho di mas básiko i fundamental –i porta esun di mas importante—di tur e konsehonan: E Konseho Familiar.

Semper tabatin mester di Konsehonan Familiar. Nan ta, realmente, eterno. Nos tabata pertenesé na un konseho di famia den e eksistensia pre mortal, kaminda nos tabata biba huntu ku nos mayornan selestial komo nan yunan spiritual.

Un konseho familiar, ora e wòrdu kondusí ku amor i ku atributonan Kristian, lo kombatí e impakto di teknologianan moderno ku hopi biaha ta distraí nos for di pasa algun tempu kualitativo ku un ke otro i tambe tin tendensia di trese maldat te serka den nos kas.

Por fabor kòrda ku konsehonan di famia ta algu diferente for di nochi di hogar ku ta tuma lugá riba djaluna. Nochi di hogar ta focus primeramente riba instrukshon di evangelio i aktividatnan di famia. Konsehonan di famia, di otro un banda, por tuma lugá riba kualke dia di siman, i nan ta primeramente un reunion kaminda mayornan ta skucha—otro i skucha nan yunan.

Ami ta kere ku tin sigur kuater tipo di konsehonan familiar:

Na promé, un konseho general di famia ku ta konstituí di henter famia

Na segundo lugá, un konseho ehekutivo di famia ku ta konstituí di un mama i un tata.

Na di tres lugá, un konseho di famia limitá ku ta konstituí i e mayornan i un yu.

Na di kuater lugá, un konseho di famia kara-kara, ku ta konstituí di un mayor i un yu.

Den tur e situashonnan di konseho familiar aki, aparatonan elektróniko tin ku ta pagá asina ku tur por mira i skucha otro. Durante di konsehonan di famia i na otro momentunan apropiá, lo bo ke tin un makutu pa aparatonan elektróniko asina ku ora e famia ta bini huntu, tur hende—mama i tata inkluso—por depositá nan telefonnan, tablètnan i MP3 playernan den e makutu. Despues, nan por deliberá ku otro sin ku nan lo wòrdu tenta pa respondé un mensahe di Facebook, un sms, un Instagram, un Snapchat, òf alarmanan di email.

Laga mi kompartí brevemente ku boso kon kada unu di e tiponan di konsehonan di famia por traha.

Na promé lugá, e konseho di famia kompletu ta inkluí tur miembronan di famia.

E pamfleta di Iglesia titulá Nos Famia ta bisa, “ E konseho aki por reuní pa diskutí problemanan familiar, trabou i finansiá, traha plannan, sostené i fortifiká [kada ken], i hasi orashon un pa ku otro i pa e union di famia.” ²

E konseho aki lo mester di reuní na un ora otorgá di antemano i ta normalmente mas formal ku kualke otro tipo di konseho di famia.

Lo e mester kuminsá ku un orashon, òf lo e por ta simplemente un ekstenshon natural di kòmbersashonnan ku a kuminsá kaba den otro fondo. Por fabor nota ku un konseho di famia no ta tur biaha tin un kuminsamentu òf kabamentu formal.

Ora ku mayornan ta prepará i yunan ta skucha i partisipá den e diskushon, e konseho di famia enbèrdat ta traha!

No ta importá kon nos situashon partikular di famia ta, ta kritiko pa nos komprondé e sirkunstansha úniko di kada miembro di famia. Anke nos tin mes un DNA, por tin situashonnan i sirkunstanshanan entre nos ku por hasi nos hopi diferente for di otro i den kual lo por rekirí e kolaborashon di kompashon di e konseho familiar.

Por ehèmpel, tur e papiamentu, kompartimentu i amor den mundu lo no por resolvé un problema médiko òf un reto emoshonal ku un òf mas miembronan di famia por ta enfrentando. Na e momentunan aki, e konseho di famia ta bira un lugá di unidat, loyalidat i duna sosten ku kariño ora ku yudansa di afó ta wòrdu buská ku speransa pa haña solushonnan.

Rumannan, espesialmente esnan mayó, por ta mentornan poderoso pa yunan mas yòn si mayornan lo usa e konseho di famia, pa buska nan yudansa i sosten durante momentunan di difikultat i limitashon.

Na e manera aki, un famia ta meskos ku un bario. Ora ku e obispu ta envolví miembronan di konseho di bario, e por resolvé problemanan i alkansá hopi kos bon na maneranan ku e nunka lo por a hasi sin nan yudansa. Na un manera similar, mayornan tin ku envolví tur miembronan di famia den kon pa aktua ku retonan i kontratempu. Na e manera ei, e poder di e konseho di famia ta wòrdu pone na trabou. Ora ku miembronan di konseho ta sinti ku nan ta parti di u desishon, nan ta bira sostenedó i resultadonan positivo i spesífiko lo por wòrdu lográ.

No ta tur konseho di famia ta konsistí di dos mayor i yunan. Bo konseho di famia lo por ta hopi diferente for di mi konseho di famia ora ku nos tabata kriando nos shete yunan. Awe nos konseho di famia ta konsistí di solamente ami i Barbara, a no ser ku nos ta tene un konseho di famia ku ta inkluí nos yunan adulto, nan kasánan, i tin biaha nos ñetunan i bisañetunan.

Esnan ku ta single i tambe studiantenan ku ta biba for di kas por sigui e patronchi di e konseho divino dor di reuní ku amigunan i kompañeronan di kuarto pa konsulta ku otro.

Konsiderá kon e atmósfera den un apartamento lo kambia si kompañeronan di kuarto reuní regularmente pa hasi orashon, skucha, diskutí i plania kosnan huntu.

Tur hende por adaptá un konseho di famia pa tuma bentaha di e patronchi divino aki establesé dor di nos Tata Selestial stimá.

Komo nos a nota promé, di tempu pa tempu un konseho di famia ekstenso lo por ta útil. Un konseho di famia ekstenso por ta konsistí di welanan i yunan adulto ku no ta biba na kas. Hasta si welanan i yunan adulto ta biba leu, nan por partisipá den konsehonan familiar via di telefon, Skype, of Face Time.

Bo por konsiderá pa tene un konseho general di famia riba djadumingu, loke ta e promé dia di siman; famianan por resumí e siman ku a pasa i plania pa e siman ku ta bini. Esaki por ta eksaktamente loke bo famia mester pa yuda hasi e Shabat un eksperensia ku ta enkantá.

E segundo tipo di konseho di famia ta u konseho di famia ehekutivo ku ta envolví solamente e mayornan. Durante di e tempu huntu aki, mayornan por resumí kada yu su nesesidatnan físiko, emoshonal i spiritual i kada unu su progreso.

E konseho di famia ehekutivo tambe ta un bon momentu pa kasánan papia tokante nan relashonnan personal ku otro. Ora ku Elder Harold B. Lee a ehekutá nos seyamentu, el a siña nos un prinsipio ku ami ta pensa tur pareha lo haña útil: “Nunka bai drumi sin hinka rudia huntu, tene man huntu i hasi boso orashonnan. Orashonnan asina ta invitá Tata Selestial pa konsehá nos dor di e poder di e Spiritu.”

E di tres tipo di konseho familiar ta konseho famia limitá. Akinan, tur dos e mayornan ta pasa tempu individualmente huntu ku un yu den un situashon sea formal òf informal. Esaki ta un oportunidat pa tene un diskushon tokantetuma desishonnan di antemano over di kosnan manera kiko e lo hasi òf no hasi den futuro. Ora desishonnan asina wòrdu tumá, e lo por ke nota nan pa si nan tin mester e referenshanan den futuro. Si bo yu hòmber òf yu muhé ta mira bo komo si fuera ku bo ta un sostenedó fiel, e reunion di konseho aki por establesé metanan i ophetivonan pa futuro. Esaki tambe ta un momentu pa skucha ku atenshon pa e preokupashonnan serio i retonan ku un mucha por tin ku enfrentá ku kosnan manera falta di konfiansa, abuso,tentamentu, òf temor.

E di kuater tipo di konseho familiar ta konseho di famia ku ta tuma lugá kara-kara, ku ta envolví un mayor i un yu. E tipo di konseho di famia aki generalmente te gewon pasa. Por ehèmpel, e mayor i e yu por tuma bentaha di oportunidatnan informal ora ku ta koriendo den outo òf trahando rònt di kas. Un ekskurshon ku un yu ku sea tata òf mama por proveé un tempu speshal pa konektá ku otro tantu spiritual i emoshonal. Pone esakinan den kalènder for di delantá asina ku e muchanan por antisipá i wak dilanti na un momentu speshal pa pasa tempu nan so ku Mama òf Tata.

Awor, rumannan, tabatin un tempu kaminda e murayanan di nos hogarnan tabata proveé tur defensa nesesario kontra di loke ta stroba i influensianan di afó. Nos tabata lòk nos portanan, sera bentana nan; nos tabata sera kuránan; i nos tabata sinti nos mes safe, sigur i protehá den nos mes un refugio chikitu for di mundu pafó.

E dianan ei a pasa. E murayanan, portanan, hèkinan, i portanan di kurá di nos kasnan no por prevení invashon invisibel di Internet, Wi-fi, e telefònnan selular, e retnan. Nan por penetrá nos kasnan ku solamente un par di klik riba teklado.

Afortunadamente, Señor a proveé un manera pa kontrarestá e invashon di teknologia negativo ku por distraí nos for di pasa tempu kualitativo huntu ku otro. El a hasi esaki dor di proveé e sistema di konseho pa fortalesé, protehá, salbaguardiá, i kuida nos relashonnan di mas presioso.

Muchanan desesperadamente mester di mayornan ku ta dispuesto pa skucha nan, i e konseho familiar por proveé un momento kaminda miembronan di famia por siña komprondé i stima un ke otro.

Alma a instruí, “ Konsulta ku Señor den tur bo aktonan, i E lo guia bo pa bon.”³ Invitá Señor pa ta parti di nos konseho familiar por medio di orashon lo mehorá nos relashonnan ku otro. Nos por, ku Tata Selestial i nos Salbador su yudansa, bira hende ku mas pasenshi, atento, ku ke yuda, pordoná i ku komprenshon sigun nos ta hasi orashon pa yudansa. Ku Nan yudansa, nos por hasi nos hogar un pida shelu riba tera.

Un konseho di famia ku ta hasí sigun e patronchi di e konsehonan di shelu, yená ku amor manera esun di Cristu, i guiá dor di e Spiritu di Señor lo yuda nos pa protehá nos famia for di distraishon ku por roba nos for di tempu presioso ku nos por pasa huntu ku otro i protehá nos for di e maldatnan di mundu.

Kombiná ku orashon, un konseho di famia lo invitá e presensia di e Salbador, manera Ela primintí: “ Paso kaminda dos òf tres ta reuní huntu den mi nòmber, einan ami ta meimei di nan.”⁴ Invitando e Spiritu di Señor pa ta parti di boso konsehonan familiar ta trese bendishonnan indeskriptibel .

Finalmente, por fabor kòrda ku un konseho familiar tené regularmente lo yuda nos rekonosé problemanan di famia delantá i evit’é promé ku e empeorá; nan lo duna kada miembro di e famia un sintimentu di balor i importansha; i mas ku todo nan lo asistí nos pa ta mas eksitoso i felis den nos relashonnan presioso, dentro di e murayanan di nos hogar. Ku nos Tata Selestial lo bendishoná nos famianan sigun nos ta deliberá huntu ku otro ta mi orashon humilde den nòmber di Señor JesuCristu, amèn.