Famianan Eterno

Pa Presidente Henry B. Eyring

Promé Konsehero den e Promé Presidensha

Nos obligashonnan di saserdosio ta pa pone nos famia i e famianan di esnan rondó di nos na e sentro di nos prekupashon.

Mi ta gradesido di ta huntu ku boso e anochi aki den e reunion general di saserdosio di e Iglesia di JesuCristu di e Santunan di Delaster Dianan. Esaki ta un gran momentu den e historia di Iglesia. Shenti ochentidos aña pasa, na 1834, na Kirtland, Ohio, henter e saserdosio a wòrdu yamá pa reuní huntu ku otro den un skol ku ta midi 4.2 pa 4.2 meter ku tabata trahá di palu. Den e reunion ei ta pará ku e Profeta Jose Smith a bisa: “Boso no sa mas konserniente di e destino di e Iglesia i reino aki, ku un baby sintá riba skochi di su mama. Boso no ta kapt’é. ... Ta solamente un man yen di Saserdosio ku boso ta mira aki awe nochi, pero e Iglesia aki lo yena Nort i Sur Amérika--- e lo yena mundu.” ¹

Miónes di poseedornan di saserdosio, den mas ku 110 pais, ta reuní den e seshon aki. Pudisé e Profeta Jose a mira e tempu aki i e futuro glorioso ku ta [keda] ainda nos dilanti.

Mi mensahe awe nochi ta un intento pa deskribí e futuro ei i kiko nos mester hasi pa ta parti di e plan di alegria ku nos Tata Selestial a prepará pa nos. Promé ku nos a nase, nos a biba den un famia ku nos Tata Selestial ku ta eksaltá i eterno. El a ordená un plan ku ta pone ku nos por avansá i progresá pa bira meskos kuné. El a hasié dor di Su amor pa nos. E propósito di e plan tabata pa laga nos tin e privilegio di biba pa semper manera nos Tata Selestial ta biba. E plan di evangelio aki ta ofresé nos un bida di mortalidat kaminda nos lo wòrdu di tèst. Un promesa a wòrdu duna por medio di e Ekspiashon di JesuCristu, si nos obedesé e leinan i e ordenansanan di saserdosio di e evangelio, nos lo por haña bida eterno, esun di mas grandi den tur Su donnan.

Bida eterno ta e tipo di bida ku Dios nos Tata Eterno ta biba. Dios a bisa ku Su propósito ta pa “trese e inmortalidat i bida eterno di hòmber” (Moises 1:39). E gran propósito di kada poseedor di saserdosio, p’esei, ta pa asistí den e obra di yuda hende krese te [yega] ku bida eterno.

Kada esfuerso di e saserdosio i kada ordenansa di saserdosio tin intenshon pa yuda e yunan di Tata Selestial pa kambia dor di e Ekspiashon di JesuCristu pa bira miembro di unidatnan familiar perfekshoná. E ta sigui ku “e gran obra di kada hòmber ta pa kere e evangelio, pa tene e mandamentunan, i pa krea i perfekshoná un unidat familiar eterno,”² i pa yuda otronan hasi mes un kos.

Ya komo esaki ta bèrdat, tur kos ku nos hasi lo mester tin matrimonio selestial komo su enfoke i propósito. Esei ta nifiká ku nos mester aspirá pa wòrdu seyá na un kompañero eterno den e tèmpel di Dios. Tambe nos mester kurashá otronan pa hasi i warda e konvenionan ku ta mara un kasa i su esposa huntu, ku nan famia, den e bida aki i den e mundu ku ta bini.

Pakiko esaki tin tantu importansha pa kada unu di nos--- hóben òf bieu, diákono òf sumo saserdote, yu òf tata? Ta paso nos obligashon di saserdosio ta pa pone nos famianan i e famianan di esnan rondó di nos na sentro di nos preokupashon. Kada gran desishon lo mester ta basá riba e efekto ku e lo tin riba un famia pa kualifiká pa bida huntu ku Tata Selestial i JesuCristu. No tin nada den nos servisio di saserdosio ku ta mas importante ku esaki.

Laga mi konta bo kiko esaki por nifiká pa un diákono ku ta skuchando awe nochi komo miembro di unidat familiar i komo un miembro di un quorum.

Den su famia, por òf no por tin orashon familiar regularmente òf nochi di hogar frekuentemente. Si su tata, sintiendo e obligashonnan aki, yama su famia huntu pa hasi orashon òf lesa eskritura, e diákono por kore pa tuma parti ku un sonrisa. E por enkurashá su rumannan pa partisipá i elogionan ora nan hasi esaki. E por puntra su tata pa un bendishon ora ku aña nobo di skol ta bai kuminsá òf na otro momento di mester.

E no por tin un tata asina fiel. Pero e mesun deseo di su kurason pa e eksperenshanan ei lo trese e poder di shelu pa esnan rondó di dje, dor di su fe. Nan lo buska pa e bida familiar ku e diákono ke ku henter su kurason.

E maestro den e Saserdosio Aaróniko por mira den su asignashon di orientashon familiar, un oportunidat di yuda Señor kambia e bidanan di un famia. Señor a sugerí esaki den Doctrina y Convenios:

“E maestro su deber ta pa semper kuida e iglesia, i pa ta huntu ku i fortifiká nan;

“I mira pa no tin inikidat den iglesia, tampoko duresa un ku otro, tampoko mentira, kalumnia, ni hasimentu di redu” (DyC 20:53–54).

Meskos, e presbítero den e Saserdosio Aaróniko a wòrdu duná e karga aki:

“E presbítero su deber ta pa prediká, instruí, splika, ekshortá, i batisá, i atministrá e santa sena,

“I bishita e kas di kada miembro, i ekshortá nan pa hasi orashon na bos haltu i den sekreto i atendé tur debernan familiar” (DyC 20: 46–47).

Bo por puntra bo mes, manera ami a hasi ora ku mi tabata un maestro i saserdote hóben, kon ami lo por pa surpasá e retonan ei. Nunka mi no tabata sigur kon mi por a ekshortá na un manera ku lo a move e famia mas serka di bida eterno sin ofendé òf e sali manera krítika. Mi a siña ku e úniko estímulo ku ta kambia kurasonnan ta bini dor di Spiritu Santu. Esei mas ku nunka ta pasa na momentu ku nos kompartí nos testimonio di e Salbador, ku tabata i ta e miembro di famia perfekto. Ora nos enfoká nos amor p’e, harmonia i pas lo krese den e hogarnan ku nos bishita. E Spiritu Santu lo guia nos den nos servisio pa famianan.

E poseedor di saserdosio hóben por, dor di e manera ku e ta hasi orashon, na e manera ku e ta papia, i na e manera ku e ta kurashá e miembronan di e famia, trese e influensha i ehèmpel di e Salbador den nan mente i kurasonnan.

Un lider di saserdosio sabí a mustra mi ku el a kapta esei. El a puntra mi yu hòmber chikitu pa tuma maneho den un orientashon familiar. El a bisa ku e famia por resistí su stimulashonnan, pero el a pensa ku e siñansa simpel i testimonio di un mucha lo por tin mas chèns di penetrá nan kurasonnan duru.

Kiko un elder hóben por hasi pa yuda den e kreashon di famianan eterno? E por ta kasi bai den e kampo mishonal. E por hasi orashon ku tur su kurason ku e por haña, instruí, i batisá famianan. Ainda mi ta kòrda un dia ku un yònkuman ku tipo ku su kasá amoroso i nan dos yunan muhé presioso tabata sintá huntu ku mi i mi kompañero di mishon. E Spiritu Santu a bini i testifiká na nan ku e evangelio di JesuCristu a wòrdu restourá. Nan a kere sufisiente ku nan a hasta puntra si nos por a duna nan dos yu muhé chikitunan un bendishon manera nan a mira wòrdu hasi den un di nos reunionnan sakramental. Ya kaba nan tabatin un deseo pa nan yunan por wòrdu bendishoná, pero nan no a komprondé ainda ku e bendishonnan mas haltu lo por ta posibel solamente den e tèmpelnan di Dios despues ku nan a hasi konvenionan.

Ainda mi ta sinti doló di pensa riba e pareha ei i e yu chikitu nan ei, probablemente a krese bira grandi awor aki, sin e promesa di un famia eterno. Nan mayornan sikiera tabatin un idea chikitu di e bendishon nan ku por tabata disponibel pa nan. Mi speransa ta ku nan, di un manera òf otro, un kaminda por a kaba di haña e oportunidat pa kualifiká pa bira un famia eterno.

Otro eldernan bayendo den kampo mishonal lo bai tin e eksperensha mas kontentu ku mi yu hòmber Matthew tabatin. E i su kompañero a haña un biuda ku 11 yu bibando den sirkunstansha humilde. E tabata ke pa nan loke ku abo ke--- pa tin un famia eterno. Pa mi yu, e tabata parse imposibel òf por lo ménos no probabel na e momento ei.

Mi a bishita e siudat chikitu ei añanan despues ku mi yu a batisá e biuda, i el a invitá mi pa sera konosí ku su famia na misa. Mi tabatin ku warda un basta ratu paso mayoria di su yunan, huntu ku su hopi ñetunan, a bini for di diferente kapianan den e área. Un yu hòmber tabata sirbiendo fielmente den un obispado, hopi di su yunan tabata bendishoná ku konvenionan di tèmpel i e ta seyá den un famia eterno. Ora mi tabata bai for di e ruman kerí aki, ela pone su man rònt di mi kustia (e tabata hopi chikitu, asina ku e por a apénas yega mi kustia) i a bisa, “Por fabor, bisa Mateo pa bini bek na Chile promé ku mi muri.” E la wòrdu duná, dor di e eldernan fiel ei, e antisipashon alegre di esun di mas grandi di e donnan di Dios.

Tin kosnan ku un elder, ora e bini bek for di su mishon, tin ku hasi pa ta firme pa ku su konvenionan pa buska bida eterno pa su mes i pa esnan ku e stima. No tin konvenionan mas importante den tempu i den eternidat ku no ta matrimonio. Boso a tende konsehonan sabio pa hasi matrimonio un prioridat den e promé plannan despues di mishon. E sirbientenan di saserdosio fiel lo hasi esaki ku sabiduria.

Den konsiderashon pa matrimonio, e lo mira ku e ta skohiendo e mayornan di su yunan i e herensia ku nan lo tin. E lo hasi e eskoho ku búskeda sinsero i un konsiderashon den orashon. E lo sigurá su mes ku e persona ku e kasa kuné ta kompartí su idealnan pa ku famia i su konvikshon pa ku Señor su propósito di matrimonio i ku e ta un persona ku e ta dispuesto na konfia su yunan su felisidat na dje.

Presidente N. Eldon Tanner a duna un konseho sabio: “E mayornan ku bo lo tin ku honra mas ku kualke otronan ta e mayornan di bo yunan –ku tin ku bini ainda-. E yunan ei tin derecho riba e mihó mayornan ku ta posibel pa bo duna nan--- mayornan limpi.”³ Puresa lo ta bo protekshon i e protekshon di bo yunan. Bo ta debe nan e bendishon ei.

Awó, tin un par di kasánan i tatanan ku ta skuchando awe nochi. Kiko boso por hasi? Mi speransa ta ku bo deseo a krese pa hasi kambionan nesesario pa abo i bo famia un dia por biba den e reino selestial. Komo un tata ku saserdosio, ku bo kasa na bo banda, bo por toka e kurasonnan di kada miembro di bo famia pa kurashá nan pa wak dilanti pa e dia ei. Lo bo atendé bo reunionnan sakramental ku bo famia, lo bo tene reunionnan familiar kaminda e Spiritu Santu ta invitá, lo bo resa ku bo kasá i famia, i lo bo prepará bo mes pa bai tèmpel ku bo famia. Lo bo move huntu ku nan riba e kaminda ku ta hiba bo na un hogar di famia eterno.

Lo bo trata bo kasá i yunan manera Tata Selestial a trata bo. Lobo sigui e ehèmpel i direkshon di e Salbador pa guia bo famia den Su kaminda.

“Niun poder òf influensia por òf tin ku wòrdu mantené dor di virtut di e saserdosio. Solamente dor di persuashon, dor di pasenshi den sufrimentu, dor di gentilesa i ta mansu, i dor di amor sinsero;

“Dor di amabilidat, i sabiduria puro, ku lo engrandese e alma sin hipokresia, i sin mentira---

“Korigiendo na ora ku gravedat, ora wòrdu move dor di Spiritu Santu; i despues mustrando un oumentu di amor pa esun ku abo a korigí, pa e no mirabo komo su enemigu” (DyC 121:41–43).

Señor a bisa tatanan ku tin saserdosio ki sorto di kasá nan mester ta. Ela bisa, “Lo bo stima bo kasá ku tur bo kurason, i lo bo pega na dje i niun otro” (DyC 42:22). Ora ku Señor ta papia ku tur dos, e hòmber i e muhé, E ta manda, “Lo bo no kometé adulterio, ... ni hasi nada manera esaki” (DyC 59:6).

Pa hóbennan, Señor a pone un standard. “Yunan, obedesé bo mayornan den tur kos: paso esaki ta plasentero den bista di Señor” (Kolosensenan 3:20) i “honra bo tata i bo mama” (Eksodo 20:12).

Ora ku Señor ta papia ku tur hende di e famia, Su konseho ta pa stima i sostené un ke otro.

E ta puntra nos pa “aspirá pa perfekshoná e bida nan di kada [miembro di e famia]; [pa] fortifiká esnan suak; rekonkista esnan stimá ku a pèrdè kaminda, i tin plaser den nan forsa spiritual nobo.” ⁴

Señor tambe ta puntra nos pa nos hasi tur loke nos por pa yuda esnan di nos famia ku a fayesé pa nan por ta huntu ku nos den nos hogar eterno.

E lider di e grupo di sumo saserdotenan a traha ku diligensia pa yuda hende haña nan antepasadonan i bai ku nòmbernan tèmpel pa salba esnan ku a fayesé anteriormente. Lo bai tin gratitut den e mundu ku ta bini na e sumo saserdotenan ei, i na esnan ku a ofresé e ordenansanan, paso nan no a lubidá nan famia ku ta wardando den mundu di spiritu.

Profetanan a bisa: “E obra di Señor di mas importante ku nunka lo bo hasi lo ta e obra ku bo ta hasi dentro di e murayanan di bo mes hogar. Orientashon familiar, obra di obispado, i otro debernan di Iglesia tur ta importante, pero e obra di mas importante ta dentro di e murayanan di bo hogar.”⁵

Den nos hogar i den bo servisio di saserdosio, e balor mas grandi lo ta den e aktonan chikitu ku ta yuda nos i esnan ku nos stima traha pa yega bida eterno. E aktonan ei por parse chikitu den e bida aki, pero nan ta trese bendishonnan sin fin den eternidat.

Ora nos ta fiel den nos servisio pa yuda Tata Selestial su yunan pa yega kas serka Dje, nos lo kualifiká pa e saludo ku nos tur ke tende asina tantu ora nos kaba nos ministerio terenal. Esaki ta e palabranan: “Bon hasí, bo ta un kriá bon i fiel; bo tabata fiel den maneho di un tiki sèn, p’esei mi ta duna bo responsabilidat riba kantidat grandi: drenta bin kompartí den mi alegria” (Mateo 25:21).

Entre e “hopi kosnan” ta e promesa di posteridat sin fin. Mi orashon ta ku nos tur por kualifiká i yuda otro pa e bendishon haltu ei den e hogar di nos Tata i Su Yu Stimá, JesuCristu. Den e nòmber sagrado di JesuCristu, amèn.