Un Elogio pa Esnan ku ta Salba
Pa Presidente Dieter F. Uchtdorf
Di Dos Konsehero den e Promé Presidensia
Ora nos ta imitá e amor di e Salbador, E sigur lo bendishoná nos i lo laga nos esfuersonan digno prosperá pa salba nos matrimonio i fortalesé nos famianan.
Hopi aña pasa, mi tabata na e tèmpel di Frankfurt na Alemania ora mi a ripará un pareha di edat ta tene man. E kuido kariñoso i afekshon ku nan tabata mustra otro mi a sinti ternura den mi kurason.
Mi no ta kompletamente sigur dikon e esena aki a afektámi asina profundo. Kisas tabata e dulsura di e amor ku e dos personanan aki a kompartí ku otro--un símbolo poderoso di perseveransha i kompromiso. Tabata kla ku e pareha aki tabata huntu pa un tempu hopi largu i ku nan afekshon un pa otro ainda tabata bibu i fuerte.
Un Sosiedat di Kosnan Desechabel
Mi ta kere ku un otro rason ku e esena tierno aki a keda ku mi p’asina tantu tempu ta e kontraste di algun aktitut di awendia. Den asina tantu sosiedat rònt mundu, tur kos ta parse manera di ta desechabel. Asina tin algu ta kuminsá kai fo’i otro of ta gastá--òf hasta ora nos kansa di dje--nos ta bent’é afó i remplas’é ku algu mas nobo of mas briante.
Nos ta hasi esaki ku telefonnan selular, paña, outo--i trágikamente, hasta ku nos relashonnan.
Ounke por tin balor den deshasí di kosnan ku nos no tin mester mas den nos bida, ora yega na kosnan di importansia eterno--nos matrimonio, nos famianan, i nos balornan--un mentalidat di remplasá e original na fabor di algu moderno por trese remordimentu profundo.
Mi ta agradesido ku mi ta pertenesé na un iglesia ku ta balorá matrimonio i famia. Miembronan di e Iglesia di JesuCristu di e Santunan di Delaster dianan ta konosí rònt mundu di tin e mihó matrimonionan i famianan ku bo por enkontrá. Mi ta kere ku esaki ta, pa parti, danki na e presioso bèrdat restourá dor di Jose Smith ku matrimonionan i famianan tin e meta pa ta eterno. Famianan no solamente tei pa laga kosnan bai suave aki na mundu i pa despues deshasí di nan ora nos bai shelu. Mas bien, nan ta e òrdu di shelu. Nan ta un eko di un patronchi selestial i un imitashon di Dios su famia eterno.
Pero un matrimonio i relashonnan familiar fuerte no ta sosodé djis pasó nos ta miembro di Iglesia. Nan ta rekerí trabou konstante i intenshonal. E doktrina di famianan eterno mester inspirá nos pa dediká nos mihó esfuersonan pa salba i enrikesé nos matrimonio i famianan. Mi ta atmirá i aploudí esnan ku ta perseverá i nutri e relashonnan kritiko i eterno aki.
Awe, mi ke papia ku elogio di esnan ku ta salba.
Salba Nos Matrimonionan
Durante e añanan, mi a realisá e ordenansa di seyamentu pa hopi parehanan ku speransa i amor. Nunka mi no a konosé ningun hende, ku ora nan a mira otro over di e altar, nan a pensa ku algun dia nan lo ta divorsiá i ku kurason kibra.
Desafortunadamente, algun ta hasi asina.
Di algun manera, miéntras e dianan ta bai i e koló di amor romántiko ta kambia, tin algun ku poko poko ta stòp di pensa riba otro su felisidat i ta kuminsá nota fayonan chikitu. Den un ambiente asin’aki, algun ta atraé na e konklushon trágiko ku nan kasá no ta sufisiente sabi, sufisiente dibertido e, of sufisiente yòn. I di un manera nan ta haña e idea ku esaki ta duna nan e hustifikashon ku mester kuminsá buska otro kaminda.
Hermanonan, si esaki di un manera ku ta yega serka na deskribí boso, mi ta atvertí boso ku boso ta riba e kaminda ku ta yega na matrimonionan kibrá, hogarnan kibrá, i kurasonnan kibrá. Mi ta roga boso pa stòp aworakí, bira bèk, i bin bèk den e kaminda sigur di integridat i lealtat na e kombenionan. I, di mes, e mesun prinsipionan ta apliká pa nos hermananan stimá.
Awor, djis un palabra pa esnan di nos hermanonan soltero ku ta sigui e desepshon ku nan tin ku haña e “muhé perfekto” promé ku nan por drenta den un relashon serio òf matrimonio.
Mi rumannan stimá, mi por kòrda boso, si tabatin un muhé perfekto, boso ta kere ku berdaderamente e lo tabatin tantu interes den boso?
Den Dios su plan di felisidat, nos no ta buskando dje tantu ei pa un hende perfekto, pero pa un persona ku kua, durante un bida, nos por uni den esfuerso pa krea un relashon amoroso, duradero i mas perfekto. Esaki ta e meta.
Rumannan, esnan ku salba nan matrimonio ta komprondé ku e proseso aki ta tuma tempu, pasenshi, i, mas ku tur kos, e bendishonnan di e Ekspiashon di JesuCristu. E ta rekerí pa boso ta kariñoso, sin envidia, no buska pa boso mes, no ta provoká fásilmente, no ta pensa maldat, i ta gosa den e bèrdat. Den otro palabranan, e ta rekerí karidat, e amor puru di Cristu. 1
Tur esaki no ta pasa den un instante. Matrimonionan eksitoso ta wòrdu konstruí blòki pa blòki, dia tras dia, durante hinter un bida.
I esei ta bon notisia.
Pasobra no ta importá kon plano boso relashon por ta na e momentu aki, si boso sigui agregá piedranan di amabilidat, kompashon, skucha, sakrifisio, komprenshon, i desinteres, eventualmente un piramit fuerte lo kuminsá krese.
Si ta parse ku esaki ta dura muchu, kòrda: matrimonionan felis mester dura pa semper! Ke men “no kansa den hasi bon, pasobra boso ta poniendo e fundeshi pa un gran matrimonio. I for di e kosnan chikitu ta sali kosnan grandi. 2
Por ta e ta un trabou gradual, pero e no mester ta un sin alegria. De hecho, tumando e rísiko di bisa loke ta opvio, divorsio poko biaha ta sosedé ora e kasánan ta felis.
Pues sea felis!
I hermanonan, sorprendé boso kasá dor di hasi kosnan ku ta hasié felis.
Esnan ku ta salba nan matrimonio ta skohe felisidat. Miéntras ku ta bèrdat ku tin algun depreshonnan króniko ku ta rekerí tratamentu spesialisá, mi ta gusta e palabranan sabio di Abraham Lincoln: “Mayoria di hende ta mesun felis ku nan pone nan mente pa ta felis.” E ta pas bon ku su kompañero di eskritura: “Buska, i lo bo haña.” 3
Si nos buska imperfekshon den nos kasá of iritashon den nos matrimonio, sigur nos lo haña nan, pasobra tur hende tin algun. Na otro un banda, si nos buska e bon, nos lo haña esaki tambe, pasobra tur hende tin bon kualidatnan tambe.
Esnan ku salba matrimonio ta ranka e mala yerba i duna e flornan awa. Nan ta selebrá e aktonan chikitu di grasia ku ta sende e sentimentunan tierno di karidat. Esnan ku ta salba matrimonio ta salba futuro generashonnan.
Hermanonan, kòrda di kon boso a bira enamorá.
Traha kada dia pa hasi boso matrimonio mas fuerte i mas felis.
Mi amigunan stimá, laga nos hasi nos esfuerso pa ta kontá den esnan ku alma sagrado i felis ku a salba nan matrimonio.
Salba Nos Famianan
Awe tambe mi ke papia ku elogio na esnan ku ta salba nan relashon ku nan famianan. Kada famia mester di salbashon.
Ounke ta maravioso ku e Iglesia aki ta konosí pa su famianan fuerte, nos por sinti hopi biaha ku esaki ta apliká na kada Santu di Delaster dia, ku eksepshon di nos. Pero e realidat ta ku no tin famia perfekto.
Kada famia tin momentunan inkómodo.
Manera ora boso mayornan pidi bo pa saka un “selfie” di nan, òf ora bo tanta grandi insistí ku ainda bo ta soltero pasobra boso ta piki pieu muchu òf boso suegro ta pensa ku su punto di bista polítiko ta e punto di bista di e evangelio, of ora boso tata regla un portrèt di famia ku tur hende bistí manera aktornan di su pelíkula faborito.
I abo tin mag di bisti e disfras di Chewbacca[personahe di e pelíkula “Star Wars”].
Famianan ta asina.
Nos por kompartí e mesun gèn, pero nos no ta mesun kos.
En bes di trata na fòrsa tur hende den nos malchi, nos por skohe pa selebrá e diferenshanan aki i apresiá nan pa agregá rikesa i sorpresa konstante den nos bida.
Tin biaha, sin embargo, miembronan di nos famia ta hasi eskoho òf hasi kosnan ku ta deskonsiderá, doloroso, òf inmoral. Kiko nos tin ku hasi den e kasonan aki?
No tin un solushon ku ta kubri kada situashon. Esnan ku ta salba nan famianan ta eksitoso pasobra nan ta buska konseho serka nan kasá i famia, nan ta buska e boluntat di Señor, i ta skucha na e susuronan di e Spiritu Santo. Nan sa ku loke ta bon pa un famia kisas no ta bon pa un otro.
Sin embargo, tin un kos ku ta bon den tur kaso.
Den e Buki di Mormon nos ta siña di un grupo di hende ku a deskubrí e sekreto di felisidat. Pa generashonnan, “no tabatin kontenshon. ...I sigur no tabatin hendenan mas kontentu bou di tur hende ku a wòrdu kreá dor di e mannan di Dios.” Kon nan a hasié? “Pa motibu di e amor di Dios ku tabata biba den e kurasonnan di e hendenan.” 4
Kualke sea e problema ku bo famia tin, kualke sea kos e ku bo mester hasi pa solushoná nan, e komienso di e fin di un solushon ta karidat, e amor puru di Cristu. Sin e amor aki, hasta famianan ku ta parse perfekto tin konflikto. Ku n’e, hasta famianan ku hopi desafio ta logra.
“Karidat no ta faya nunka.” 5
Esei ta un realidat pa salba matrimonionan! Esei ta un realidat pa salba famianan!
Pone Orguyo un Banda
E enemigu grandi di karidat ta orguyo. Orguyo ta un di e rasonnan mas grandi pa kua tin konflikto den matrimonionan i famianan. Orguyo ta mal beis, poko amabel, i e ta envidia. Orguyo ta eksagerá su propio forsa i ta ignorá virtut den otronan. Orguyo ta egoista i ta provoká fásilmente. Orguyo ta asumí intentonan maligno kaminda no tin ningun i ta skonde su propio debilidatnan tras di pretenshonnan falsu. Orguyo ta síniko, pesimista, tin rabia, i ta sin pasenshi. Di bèrdat, si karidat ta e amor puru di Cristu, e ora ei orguyo ta e karakter definí di Satanas.
Orguyo por ta un fayo humano komun. Pero e no ta parti di nos herensia spiritual, i e no tin lugá bou di esnan ku ta karga e saserdosio di Dios.
Bida ta kòrtiku rumannan. Lamentonan por dura un bida kompleto--algun lo tin reperkushonnan ku lo dura te den eternidat.
E manera ku boso ta trata boso kasá of yunan òf mayornan of rumannan por influensiá generashonnan benidero. Ki herensia boso ke laga pa boso posteridat? Unu di duresa, vengansa, rabia, miedu òf isolashon? Of unu di amor, humildat, pordon, kompashon i kresementu spiritual, i union?
Nos tur tin ku kòrda, “Huisio ta sin miserikòrdia pa esun ku no a demostrá miserikòrdia.” 6
Pa bienestar di boso relashon familiar, pa bienestar di boso alma, por fabor sea miserikordioso pasobra “miserikòrdia ta triunfá riba tur huisio.” 7
Pone orguyo un banda.
Pidi pordon sinsero na boso yunan, boso kasá, boso famia, of boso amistatnan no ta un señal di debilidat pero di fortalesa. Ser korekto ta mas importante pa boso ku fomentá un ambiente di nutrishon, sanashon, i amor?
Konstruí brùgnan; no destruí nan.
Hasta ora boso no tin falta--kisas espesialmente ora boso no tin falta--laga amor vense orguyo.
Si boso hasi esaki, kual sea e atversidat ku boso ta pasando aden lo pasa, i pa motibu ku e amor di Dios den boso kurason, e kontenshon lo kaba. E prinsipionan di salba relashonnan ta apliká pa nos tur, sin tene kuenta si nos ta kasá, divorsiá, viudo, òf soltero. Nos tur por ta salbadónan di famianan fuerte.
E Amor di Mas Grandi
Rumannan, laga nos sigui e ehèmpel di esun ku ta salba nos. E Salbador a gana “nos alma ku amor.” 8 JesuCristu ta nos Maestro. Su obra ta nos obra. Ta un obra salbadó, i e ta kuminsá den nos kasnan.
Amor den e kreashon di e plan di salbashon ta desinteresá i ta buska e bienestar di otronan. Esei ta e amor ku nos Tata Selestial tin pa nos.
Ora nos ta imitá e amor di e Salbador, E sigur lo bendishoná i prosperá nos esfuersonan hustu pa salba nos matrimonionan i reforsá nos famianan.
Ku Señor bendishoná boso den boso esfuersonan inkansabel i hustu pa boso ta kontá huntu ku esnan ku ta salba. Esaki ta mi orashon den e nòmber di JesuCristu, amèn.