Unda e Yabinan i Outoridat di e Saserdosio Ta?
Pa Elder Gary E. Stevenson
Di e Quorum di e Diesdos Apòstelnan
Outoridat i yabinan di Saserdosio ta sende e motor, habri e portanan di shelu, fasilitá poder selestial, i ta drecha e kaminda di kombenio di regreso na nos Tata Selestial.
Segun ku e solo di atardi tabata desaparesé bou di e serunan yena ku sneu, e aire kongelá dje serunan tabata kòrta den nos kara i nanishi, tabata parse di ta pusha nos padilanti pa nos por haña nos outonan i trùknan den e lugá di parker di e hotèl di ski. Aya, den nos outonan kómodo, pronto e kalefakshon lo keinta nos dedenan di man i pia. E sonido di e sneu kongelá zonando ku kada paso ku nos tabata dal a konfirmá ku esaki tabata ekstremadamente friu.
Nos famia a disfrutá un dia dushi na e pistanan di ski, ku awor tabata yegando na un fin ku hopi friu. Yegando na e outo, mi a hinka man den saku di mi yas pa e yabinan despues un otro saku i otro mas. “Unda e yabinan ta?” Tur hende tabata warda ansiosamente pa e yabinan! E bateria tabata kargá, i tur sistema--inkluso e kalefakshon--tabata kla pa bai, pero sin yabi, portanan di lòk ta ninga nos entrada; sin yabi e motor lo no por duna forsa na e vehíkulo.
Na e momentu ei, nos enfoke primordial tabata kon nos lo drenta den nos outo i kalentá nos mes, pero ami no por a laga di pensa--hasta e momentu ei--ku por tin algu di siña aki. Sin e yabinan, e milager di ingenieria aki, tabata un poko mas ku plèstik i metal. Maske e outo tabatin hopi potensial, sin yabi, e no por a kumpli ku su funshon .
Mas mi ta reflehá riba e eksperensha aki, mas profundo e analogia aki a bira pa mi. Mi ta maraviá riba e amor di nos Tata Selestial pa Su yunan. Mi ta asombrá pa e bishita di shelu i e gran vishonnan di eternidat ku Dios a duna Jose Smith. Partikularmente, mi kurason ta yená ku gratitut pa e restourashon di e outoridat i yabinan di saserdosio. Sin e restourashon aki, nos lo ta será pafó di e vehíkulo nesesario pa transportá nos den nos jornada pa bai bèk serka nos mayornan selestial amoroso. E rendimentu di kada ordenansa di salbashon ku ta nifiká nos kaminda di pakto pa regresá na presensha di nos Tata Selestial ta rekerí un gobernashon apropiá pa medio di e yabinan di saserdosio.
Na Mei 1829, Huan Boutista a aparesé na Jose Smith i Oliver Cowdery i a konferi na nan e Saserdosio Aaróniko i a duna nan e yabinan pertenesiente na e saserdosio aki. Djis despues, Pedro, Hakobo i Huan a konferí na nan e Saserdosio di Melkisedek huntu ku nan yabinan.1
Kasi shete aña despues riba un djadumingu den e Tèmpel di Kirtland, djis un siman despues di su dedikashon,“Señor Yehova a aparesé den gloria”na Jose i Oliver, siguí pa aparishonnan di Moises, Elias i Elia, ku a entregá “nan yabinan i dispensashonnan.”2 E outoridat di saserdosio restourá aki i e yabinan tabata pèrdí pa siglonan. Na mesun manera ku nos famia tabata será pafó di e outo komo resultado di un yabi pèrdí, asina tambe tur e yunan di nos Tata Selestial tabata será pafó di e ordenansanan di salbashon di e evangelio di Jesucristu---te ora un restourashon divino a tuma efekto dor di e mensaheronan selestial aki. Nunka mas nos lo tin ku puntra, “Unda e yabinan ta?”
Riba un dia bunita di otoño aña pasá, mi a bishita the mondi pasífiko ku ta keda na e parti nort ost di Pennsylvania, konosí den e eskrituranan komo Harmony, kaminda Huan Boutista a aparesé na Jose Smith i Oliver Cowdery i a restourá e Saserdosio Aaróniko. Tambe mi a para na e rant di e Riu Susquehanna kaminda Jose i Oliver kubrí ku outoridat i e yabinan a wòrdu boutisá. Serka di e riu aki mes, Pedro, Hakobo i Huan a aparesé i restourá e Saserdosio di Melkisedek i su yabinan korespondiente.3
E lugánan aki, meskos ku e promé kas rekonstruí di Jose i Emma, kaminda mayoria di e Buki di Mormon a wòrdu tradusí; e kas serkano di e mayornan di Emma; e sentro di bishitante, inkorporá den un kas di reunion; ta abarká e lugá nobo di Restourashon di Saserdosio, dediká pa Presidente Russell M. Nelson na sèptèmber di aña pasa. Einan, mi a sinti e poder i realidat di e eventonan selestial ku a sosodé na e lugá sagrado aki. E eksperensha aki a lagami reflekshoná, studia i hasi orashon tokante e outoridat di saserdosio i e yabinan di saserdosio, ku a impreshonámi ku e deseo di kompartí ku e hóbennan di Iglesia kon e outoridat i yabinan restourá por bendishoná nan.
Promé, un komprondementu di e terminologianan aki lo yuda. E saserdosio òf outoridat di saserdosio a wòrdu definí komo “e poder i outoridat di Dios”4 i “e poder mas haltu aki na tera.”5 Yabinan di saserdosio ta wòrdu definí pa nos komprondementu tambe; “Yabinan di Saserdosio ta e outoridat di Dios duná na lidernan di saserdosio pa dirigí, kontrolá i goberná e uso di Su saserdosio na tera.” 6 Yabinan di saserdosio ta kontrolá e ehekushon di e outoridat di saserdosio. Ordenansanan ku ta krea un registro den Iglesia ta rekerí yabinan i no por wòrdu hasi sin outorisashon. Elder Oaks a siña nos ku “finalmente, tur e yabinan di e saserdosio ta den man di nos Señor Jesucristu, di ken e saserdosio ta. E ta esun ku ta determiná kua yabi ta wòrdu delegá na e mortalnan i kon e yabinan aki ta wòrdu usá.”7
Awor pa boso hóbennan, mi a konsiderá tres manera ku boso por “haña e yabinan” òf usa e yabinan di saserdosio i outoridat pa bendishoná boso bida i e bida di otronan.
E Promé ta prepará pa Servisio Misional
Mi rumannan hóben, por ta boso no ta realisá esaki, pero e yabinan di e rekohementu di Israel restourá dor di Moises ta pèrmití e obra misional den nos dispensashon. Tene na kuenta ku e kasi 75.000 misioneronan di tempu kompletu ku ta trahando den e obra bou di direkshon di e yabinan aki. Ku esaki na mente, kòrda ku nunka ta muchu trempan pa prepará boso mes pa sirbi un mishon. Den Para la Fortaleza de la Juventud nos ta lesa, “Hóbennan di e Saserdosio Aaróniko,... traha diligentemente pa prepará boso mes pa representá Señor komo un misionero.8 Hobensitanan tambe prepará, pero “boso no ta bou di e mesun mandato pa sirbi.”9 Sinembargo tur boso preparashonnan, sea bo sirbi komo mishonero di tempu kompletu of no, lo benefisiá boso pa bida largu komo miembro misionero.
E di Dos manera pa “Haña e Yabinan” Ta pa Asistí na Tèmpel
Yabinan di seyamentu dor di e profeta di Tèstamentu Bieu Elia, ta hasi posibel pa e ordenansanan por tuma lugá den e tèmpelnan. Ordenansanan hasí den e tèmpelnan aki ta pèrmití e individuonan i famianan pa regresá den presensia di nos mayornan selestial.
Hóbennan nos ta enkurashá boso pa buska i haña e nòmbernan di boso antepasadonan i hasi e obra di boutismo pa nan den tèmpel. Nos ta nota ku esaki ta tuma lugá kaba den kantidatnan signifikativo i sin presedente rònt mundu! Áreanan pa boutisá den hopi tèmpel ta yená ku hóbennan mainta trempan te lat den anochi. Yabinan ta wòrdu usá pa permití famianan pa seya huntu den ordenansanan sagrado den tèmpel.
Bo por mira e relashon entre e restourashon i e yabinan di saserdosio i bendishonnan? Ora boso ta dediká na e obra aki, mi ta kere ku boso lo haña sa ku Señor tei den e detayenan. Un eksperensiá a demostrá esaki. Resientemente mi a sa di un mama ku regularmente tabata hiba su yunan tèmpel pa hasi boutismo. Riba e dia partikular aki, ora e famia aki tabata kompletá nan boutismonan i tabata saliendo for di e tèmpel, un hòmber a drenta e área di boutisá ku un lista largu di nòmber di su propio famia. Realisando ku no tabata tin niun hende mas den e área di boutisá pa yud’é ku e nòmbernan di su famia, un trahadó di tèmpel a mira e famia ku ta saliendo i a puntra e muchanan si nan lo konsiderá pa bolbe drenta i kambia paña pa yuda ku e boutismonan aki. Nan a aseptá ku smak i a bolbe drenta. Miéntras e muchanan tabata wòrdu boutisá,nan mama skuchando a kuminsá rekonosé e nòmbernan i pronto, pa tur su asombro, a realisá ku e lista di nòmbernan di e hòmber tabata nòmbernan di su antepasadonan tambe. Un miserikòrdia dushi i tierno pa nan.
Dos siman pasá e Tèmpel di Provo City Center a wòrdu dediká komo e di 150 tèmpel di e Iglesia den funshon mundialmente. Nos ke nota ku tempu Presidente Thomas S. Monson a wòrdu sostené komo Apòstel na 1963, tabatin 12 tèmpel den funshon den Iglesia. Tèmpelnan ta biniendo mas serka di boso. Sin embargo, pa esnan ku distansia of sirkunstansianan no ta permití pa bai tèmpel regularmente, boso mester sòru semper pa mantené bo mes digno pa asistí. Boso por hasi trabou importante pafó di tèmpel ora boso ta buska i manda nòmbernan di boso famia.
Finalmente, Number Tres: Sigui Dilanti ku Fe
E profeta Abraham di Tèstamènt Bieu a risibí e bendishon grandi for di Señor den su dispensashon, tin biaha referí komo e kombenio di Abraham. Míles di aña despues, e bendishonnan di e dispensashon di e evangelio na Abraham a wòrdu restourá. Esaki a sosodé ora e profeta Elias a aparesé na Jose Smith i Oliver Cowdery den e tèmpel di Kirtland.
Pa medio di e restourashon aki, kada un di boso tin akseso na e gran bendishon primintí na Abraham. E bendishonnan aki por ta di boso si boso mantené boso mes fiel i biba dignamente. Den e pamfleta Para la Fortaleza de la Juventud, a duna boso algun instrukshon práktiko pa kon boso por sigui dilanti ku fe. Mi ta resumí algun di e konsehonan aki: “Pa yuda bo bira tur loke Señor ke pa bo bira, kai na rudia tur mainta i anochi den orashon na bo Tata Selestial. …Studia e skrituranan tur dia i apliká lokual bo ta lesa den bo bida. … Purba na ta obediente tur dia. …Den tur sirkunstansha, sigui e enseñansanan di e profetanan. …Sea humilde i ku deseo pa skucha e Spiritu Santu.
E konseho aki ta sigui un promesa ku ta hiba na e promesanan ku ta bini pa medio di e bendishonnan di Abraham: “Ora boso hasi e kosnan aki, Señor lo hasi muchu mas di boso bida ku boso mes lo por hasi. E lo oumentá boso oportunidatnan i ekspandé boso vishon, i fortalesé boso. E lo duna boso e yudansa ku boso tin mester pa enfrentá boso pruebanan i desafionan. Boso haña un testimonio mas fuerte i haña e goso berdadero ora boso yega na konosé boso Tata Selestial i Su Yu Jesucristu, i sinti Nan amor pa boso.”10
Pa resumí: prepará pa servisio mishonal, bai tèmpel, i sigui dilanti ku fe.
Konklushon
Awor laga nos terminá kaminda nos a kuminsá, pegá den e lugá di parker friu puntrando, “Unda e yabinan ta?” Djis pa boso sa, mas lat den e anochi ei mi a haña e yabinan milagrosamente ku a kai for di mi saku riba e seru. Señor a mustra nos ku E lo no laga nos pará den friu sin e yabinan òf outoridat ku ta guia nos pa yega kas sano i salbo serka Dje.
Si boso ta manera ami, boso lo haña boso mes hopi biaha den boso bida diario puntrando, “Unda e yabinan” di outo, ofisina, kas of apartamentu ta? Ora esaki pasa ku mi, mi no por yuda di tin un sonrisa den mi mes, pasobra miéntras mi ta buska e yabinan, mi ta haña mi mes reflekshonando riba e yabinan di e saserdosio restourá i riba Presidente Thomas S. Monson, kual mi ta sostené “komo profeta, vidente, i revelador ”11 i “komo e úniko persona riba tera ku ta poseé i ta outorisá pa ehersé tur e yabinan di saserdosio.” Si, e yabinan ta sano i salbo den e poseshon di profetanan, videntenan i reveladornan. Nan ta konferí, delegá i asigná na otronan, di akuerdo ku e boluntat di Señor, bou di e direkshon di e Presidente di Iglesia.
Mi ta testifiká ku e outoridat di saserdosio i e yabinan di saserdosio ta start e motor, habri e portanan di shelu i fasilitá e podernan di shelu, i drecha e kaminda di konvenio di regreso na nos Tata Selestial amoroso.
Ta mi orashon ku boso e generashon kresiente di hóbennan lo “sigui pa dilanti ku firmesa den Cristu,”12 pa boso por komprondé ku ta boso privilegio sagrado di aktua bou di direkshon di esnan ku tin e yabinan di saserdosio ku lo habri e bendishon, donnan i podernan di shelu pa boso.
Mi ta testifiká di Dios e Tata; di nos Salbador i Redentor, Jesucristu, i di e Spiritu Santu; i di e Restourashon di e Evangelio den e último dianan, den nòmber di Jesucristu, amèn.