E Lugá Sagrado di Restourashon

Pa Elder Jairo Mazzagardi

Di e Setenta

Palmyra tabata e podium di e Restourashon, kaminda e Tata su stèm lo wòrdu tende despues di kasi dos milenio.

Un bon amigu di mi ku tabata miembro di Iglesia a purba di siña mi e evangelio di famianan eterno. No tabata te ora ku mi a bishitá e Kas Habri di e tèmpel di São Paulo Brasil na òktober di 1978, i a drenta un kamber di seyamentu ku e doktrina di famianan eterno a drenta mi kurason, i pa hopi dianan mi a hasi orashon pa sa si esaki tabata e Iglesia berdadero.

Mi no tabata religioso, pero mi a wòrdu kria dor di mayornan ku si tabata i ami a mira kiko tabata bon den otro religionnan. Na e momento ei den mi bida, mi tabata pensa ku tur religion tabata akseptabel pa Dios.

Despues di mi bishita na tèmpel, mi a buska un kontesta, por medio di orashon, teniendo fe i un konfiansa sigur ku Dios lo bisami kua tabata Su Iglesia riba tera.

Despues di un gran lucha spiritual, finalmente mi a risibí un kontesta klaro. Mi a wòrdu invitá pa wòrdu batisá. Mi boutismo a tuma lugá riba 31 di Òktober 1978, e anochi promé ku un seshon di e dedikashon di e tèmpel di São Paulo.

Mi a realisá mi mes ku Señor tabata konosé i wòri over di mi na momentu ku E a kontestá mi orashonnan.

E siguiente mainta ami i mi kasá a bai São Paulo pa atendé un seshon dedikatorio di tèmpel.

Nos tabata einan, pero mi no tabata sa kon pa apresiá e oportunidat maravioso ei ainda. E siguiente dia nos a atendé un konferensha di área.

Nos a kuminsá nos biahe den Iglesia, i nos a haña bon amigunan ku a yama nos bon bini durante e transishon di bida aki.

E klasnan pa kombersonan nobo ku nos a atendé tur siman den nos reunionnan di Djadumingu tabata ekselente. Nan a yena nos ku sabiduria i a hasi nos deseá ku e siman por pasa bai lihé, asina ku riba Djadumingu nos por haña mas di e alimentu spiritual ei.

Mi kasá tabata wak dilanti ku anhelo pa drenta tèmpel p’asina nos famia por wòrdu seyá pa eternidat. Esei a pasa un aña i shete dia despues di mi boutismo, ku tabata un momentu tremendo. Mi a sinti manera e eternidat a wòrdu dividí na e altar entre loke a bini promé i loke a bini despues di e seyamentu.

Siendo bibá legalmente na e kosta parti ost di Merka pa un par di aña, mi tabata konosí ku algun di e siudatnan, i mayoria di nan tabata chikitu.

Ora mi a lesa òf tende tokante e eventonan ku a kondusí pa ku e Promé Vishon, gran kantidatnan di hende tabata menshoná, loke no tabata tin sentido pa mi.

Preguntanan a kuminsá bini den mi mente. Dikon e Iglesia tabatin ku wòrdu restourá na Merka i no na Brasil òf Italia, e pais di mi antepasadonan?

Unda e kantidatnan di hende ku tabata envolví den e loke a surgi di nobo i den e konfushon di religionnan tabata--- tur di loke a pasa den un lugá asina pasífiko i kalmu?

Mi a puntra hopi hende over di esaki pero no a haña kontesta. Mi a lesa tur kos ku mi ta por na Portugues i despues na Ingles pero mi no a haña nada ku por a kalma mi kurason. Mi a sigui buska.

Na Òktober di 1984, mi a atendé konferensha general komo un konsehero den un presidensha di Estaka. Despues, mi a bai Palmyra, New York, ku gran anhelo di haña kontesta.

Yegando einan, mi a purba di komprondé: Dikon e restourashon tabatin ku pasa akinan, i dikon un buya spiritual asina aki? Di unda tur e hendenan menshoná den e registro di Jose a bini? Dikon einan?

Den e tempu ei, e kontesta di mas rasonabel pa mi tabata paso e Konstitushon di Estadonan Uní tabata garantisá libertat.

E mainta ei mi a bishita e edifisio di Grandin, kaminda e promé edishon di e Buki di Mormon a wòrdu di print. Mi a bai e Arboleda Sagrado, kaminda mi a hasi hopi orashon.

No tabatin kasi niun hende riba e kayanan den e siudat chikitu ei di Palmyra. Unda e gran multitut di hendenan ku Jose a menshoná tabata?

E atardi ei mi a disidí di bai na e kunuku di Peter Whitmer, i ora mi a yega einan mi a haña un hòmber pará na bentana di e kas. E tabatin un brio intenso den su wowonan. Mi a kumind’é i despues mi a kuminsá puntra e mesun preguntanan ei.

El a puntra mi despues, “Bo tin tempu?” Mi a bisa si.

El a splika ku e lagonan Erie i Ontario i mas leu na e banda ost, e riu di Hudson ta situá den e region ei.

Den e kuminsamentu di e añanan di 1800, e hendenan a disidí di traha un kanal pa nabegashonnan ku lo pasa dor di e region ei, ekstendiendo mas ku 480 kilometer (300 mia) pa yega e riu di Hudson. E tabata un gran esfuerso pa e tempu ei, i nan por a konta solamente riba labor humano i riba forsa di bestia.

Palmyra tabata un sentro pa algun di e konstrukshon ei. Kontratistanan tabatin mester di hendenan kapasitá, téknikonan, famianan i nan amigunan. Hopi hende a kuminsá bini for di siudatnan den bisindario, lugánan mas leu, manera Irlanda, pa traha riba e kanal.

Esei tabata un momentu asina sagrado i spiritual paso finalmente mi a haña e gran kantidat di hendenan. Nan a trese nan kustumbernan i nan kreenshanan. Ora e hòmber a menshoná nan kreenshanan, mi mente a wòrdu iluminá i e wowonan di mi spiritu a wòrdu habrí dor di Dios.

Na e momentu ei, mi a komprondé kon e man di Dios, nos Tata, den Su sabidoria inmenso, a prepará den Su plan un lugá pa trese e hóben José Smith, poniendo e meimei di e konfushon religioso ei, paso einan, na e Sero di Cumorah, e planchinan presioso di e Buki di Mormon tabata skondí.

Esaki tabata e podium di e Restourashon, kaminda e Tata su stèm lo wòrdu tendé despues di kasi dos milenio, den un vishon tremendo, papiando ku e mucha José Smith, ora ku el a bai na e Arboleda Sagrado pa hasi orashon i a tende: “Esaki ta mi Yu Stimá. Tendé!”¹

Einan el a mira dos Personahenan, kual ferbor i gloria ta desafiá tur deskripshon. Si, Dios a revelá Su mes na hòmber atrobe. E skuridat ku tabata kubri tera a kuminsá disparsé.

E profesianan pa loke ta konserní e Restourashon a kuminsá wòrdu kumplí. “I mi a mira un otro angel bula meimei di shelu, teniendo e evangelio eterno pa prediká na nan ku ta biba riba tera, i na tur nashon, i famia, i lenga, i hende.”²

Den algun aña kòrtiku, Jose a wòrdu guia na e registronan di profesianan, konvenionan i ordenansanan lagá atras dor di profetanan ansiano, nos Buki di Mormon stimá.

E Iglesia di JesuCristu no lo por a wòrdu restourá sin e evangelio eterno, revelá den e buki di Mormon komo un otro tèstamènt di JesuCristu, hasta e Yu di Dios, e Karné di Dios, ku a kita e pikanan di mundu.

Cristu a bisa Su pueblo na Yerusalèm,

“I otro karnénan mi tin, ku no ta di e kurá aki.”³

“Ami ta e bon wardadó, i mi konosé mi karnénan, i ta konosé pa esnan dimi.”⁴

Ora mi tabata saliendo for di e kunuku di Whitmer, mi no ta kòrda si mi a yama ayó. Solamente mi ta kòrda awa ku tabata kore libramente for di mi wowonan. E solo tabata baha den un shelu ku tabata hopi bunita.

Den mi kurason un goso i pas inmenso a kalma mi alma. Mi tabata yen di gratitut.

Awor mi a komprondé klaramente dikon. Atrobe Señor a duna mi sabiduria i lus.

Durante di mi biahe pa kas, skrituranan a sigui bini na mente: e promesanan hasí na Tata Abraham ku den su desendientenan tur famianan di tera lo wòrdu bendishoná.⁵

I ta pa esaki, tèmpelnan lo wòrdu trahá asina ku e poder divino por wòrdu konferí riba hòmber atrobe na tera asina ku famianan lo por wòrdu uní, no te ora morto parti nan pero pa henter eternidat.

“I lo sosodé den e delaster dianan, ku e seru di Señor su kas lo wòrdu establesé na kabes di e seru, i lo wòrdu eksaltá mas haltu ku e seritu; i tur nashon lo basha bai e.”⁶

Si bosnan ku ta tende mi tin kualke preguntanan den boso kurason, no pèrdè kurashi!

Mi ta invitá boso pa sigui e ehèmpel di e Profeta Jose Smith ora ku el a lesa den Jakobo 1:5,“Si kualke di boso falta sabiduria, lag’é pidi Dios, ku ta duna na tur hende sin límite.”

Loke a pasa na Cumorah tabata un parti importante di e Restourashon, manera Jose Smith a risibí e planchanan ku tabata kontené e Buki di Mormon. E buki aki ta yuda nos pa yega mas serka di Cristu ku kualke otro buki riba tera.⁷

Mi ta duna testimonio ku Señor a lanta profetanan, videntenan i reveladónan pa guia Su reino den e delaster dianan aki i den Su plan eterno, famianan ta intenshoná pa ta huntu pa semper. E ta preokupá pa Su yunan i ta kontesta nos orashonnan.

Dor di Su gran amor, JesuCristu a ekspiá pa nos pikánan. E ta e Salbador di mundu. Di esaki mi ta duna testimonio den e nòmber sagrado di JesuCristu, amèn.