Mañan Señor Lo Hasi Milager entre Boso
Pa Elder Jeffrey R. Holland
Di e Quorum di e Diesdos Apòstelnan
Sigui stima. Sigui purba. Sigui konfia. Sigui kere. Sigui krese. Shelu lo aploudí boso awe, mañan, i semper.
Rumannan, boso tin un idea---boso tin un noshon òf indikashon---di kuantu nos ta stima boso? Durante 10 ora boso ta wak, ku bista fihá riba un kara na e pulpito aki di manera konsekutivo, pero pa e mesun 10 oranan, nos ku ta sinta patras di e pulpito tin nos bista fihá riba boso. Boso ta emoshoná nos te den profundidat di nos alma, sea ku ta 21,000 aki na Sentro di Konferensia, òf multitutnan den sentronan di reunion i kapianan, finalmente mionnan den nan kas rònt mundu, kisas huntu komo famia dilanti di pantaya di un kòmpiuter. Aki boso ta, aya boso ta, ora tras di ora, den boso mihó bistínan di djadumingu, siendo e mihó di boso mes. Boso ta kanta i boso ta hasi orashon. Boso ta skucha i boso ta kere. Boso ta e milager di e Iglesia aki, i nos ta stima boso..
Esaki tabata un konferensia general maravioso. Nos a wòrdu bendishoná pa Presidente Monson su presensia i mensahenan profétiko. Presidente, nos ta stima bo, nos ta gradesí bo, nos ta hasi orashon pa bo, i nos ta sostené bo. Nos ta gradesido di a wòrdu siñá pa bo, bo konseheronan, i asina tantu di nos otro gran lidernan tantu hòmber komo muhé. Nos tabatin músika ekselente. Orashonnan a wòrdu hasí ku supliká pa warda e mandamentunan. Di bèrdat e Spiritu di Señor tabata aki na abundansia . E wikènt aki tabata un inspirá den tur sentido.
Awor, mi ta mira realmente solamente dos problema ku ta enfrentá nos. Un ta e hecho ku ami ta e úniko persona pará entre boso i e eiskrim ku boso tin kla pa kome na klousura di konferensia general. E otro problema ta mustrá den un potrèt ku resientemente mi a mira riba Internet.
Mi ta pidi diskulpa na tur mucha ku awor ta bai skonde bou di sofa, pero e bèrdat ta ku nos niun no ke pa mañan destruí e sentimentunan maravioso ku nos tabatin e wikènt aki. Nos ke tene na e impreshonnan spiritual ku nos a haña i e siñansanan inspirá ku nos a skucha. Pero ta inevitabel ku despues di momentunan spiritual den nos bida, ku nos mester bolbe na nos ambiente mundano unda atrobe nos ta enfrentá sirkunstansianan ku sigur no ta ideal.
Pablo a atvertí nos ora el a skibi, “Kòrda promé aya, tempu boso a haña lus di Dios i mester a sufri tantu asina.” 1 E lucha di aflikshon ku ta bini despues di a wòrdu iluminá por yega den diferente manera, i e por yega na nos tur. Sigur kada mishonero ku a yega di sirbi pronto a realisá ku bida na mishon lo no bai ta refiná manera e atmósfera na sentro di kapasitashon mishonal. Meskos pa nos tambe ku ta bai for di un seshon plasentero na tèmpel òf despues di reunion sakramental spiritual.
Kòrda ku ora Moises a baha for di su eksperensia remarkabel riba Seru di Sinaí, el a haña ku su pueblo a “korumpí nan mes” i a “kita lihé fo’i kaminda.” 2 Nan tabata na pia dje seru, trahando un toro di oro pa adorá, na mes ora ku Yehova, riba tòp dje seru, tabata bisa Moises, “No sirbi niun Dios ku no t’ami” i “No traha imágen di niun otro Dios mi dilanti” i “Boso lo no traha pa boso mes ningun imágen grabá” 3 Moises no tabata kontentu ku e rebaño di Israelitanan ku tabata kana erante e dia ei!
Durante di Su ministerio mortal, Jesus a bai ku Pedro, Santiago, i Juan na e Seru di Transfigurashon, unda e skrituranan ta bisa, “su kara a bria manera solo, i su paña a bira briante manera lus.” 4 E shelu a habri, profetanan antiguo a bini, i Dios e Tata a papia.
Despues di un eksperensia asina dibino, kiko Jesus a haña ora el a baha for dje seru? Awèl, promé El a haña un argumento entre Su disípulonan i nan enemigunan tokante un bendishon duná na un mucha hòmber yòn ku no tabatin e resultado sperá. Despues El a purba di kombensé e Diesdos---a resultá sin éksito---ku pronto E lo wòrdu entregá na e gobernantenan ku lo mat’é. Despues un hende a kòrd’é ku e mester paga belasting, kual El a paga dirèkt. Despues E mester a skual algun de hermanonan pasó nan tabata diskutí ken lo ta mas importante den Su Reino. Tur esaki a pone ku na dado momentu El a bisa, “Esta un generashon sin fe, … kuantu tempu mas mi tin ku keda huntu ku boso?” 5 E tabatin okashon di hasi e pregunta ei mas ku un biaha durante Su ministerio. No ta straño ku El a deseá pa ta so riba tòp dje serunan pa hasi orashon.
Realisando ku nos tur tin ku baha for di nos eksperensianan spiritual pa atendé ku asuntunan regular di bida, pèrmití mi ofresé estímulo aki awor ku konferensia general ta kaba.
Promé, si den e dianan benidero boso no ta mira solamente e limitashon den esnan rònt di boso, pero boso bida mes no ta segun e mensahenan ku boso a skucha e wikènt aki, no pèrdè kurashi. E evangelio, Iglesia, i e reunionnan semi anual aki ta intenshoná pa duna speransa i inspirashon, no desánimo. Solamente e atversario, e enemigu di nos tur, lo purba na kombensé nos ku e prinsipionan tresé dilanti den konferensia ta irealístiko i depresivo, ku hende no ta mehorá realmente, i ku niun hende no ta progresá realmente. I dikon Lucifer ta duna e bisa e palabranan aki na nos? Pasobra e sa ku e no por mehorá, e no por progresá, i ku durante eternidat e nunka lo no tin un futuro briante. E ta un hòmber miserabel ku ta mará na limitashonnan eterno, i e ke pa nos tambe ta miserabel. No kere esaki. Ku e don di e Ekspiashon i e forsa di shelu pa yuda nos, nos por mehorá, i e kos great di e evangelio ta ku nos ta haña bendishon pa a purba,ounke ku nos no ta logra semper.
Ora tabatin un kontroversia den e Iglesia di ántes tokante ken tabatin derechi riba bendishonnan di shelu i ken no, Señor a deklará na Profeta José Smith ku e donnan di Dios ta duná na benefisio di esnan ku ta stim’é i ta warda Su mandamentunan, i esnan ku ta buska pa hasi asina. 6 Esta agradesido nos tur ta pa e provishon duná ...i ta buska pa hasi esaki. Esei tabata un salbabida pasobra tin biaha esei ta tur loke nos por ofresé! Nos ta sinti konsuelo den e hecho ku si Dios ke rekompensá solamente esnan ku ta perfektamente fiel, E lo no tabatin tantu hende riba Su lista di rekompensa.
Por fabor kòrda mañan, i tur otro dianan despues, ku Señor ta bendishoná esnan ku ke mehorá, ku ta aseptá e nesesidat di mandamentunan, i ta purba di warda nan, ku ta apresiá e birtutnan Cristian i ta purba pa haña nan. Si boso ta tambaliá den e búskeda ei, meskos tur hende tambe; e Salbador tei pa yuda boso sigui. Si boso kai, konvoká tur Su forsa. Sklama manera Alma, “ O Jesus, ... tene miserikòrdia di mi.” 7 E lo yuda boso pa lanta atrobe. E lo yuda boso arepentí, drecha tur kos ku tin pa drecha, i sigui dilanti. Pronto boso lo tin e éksito ku boso ta buska.
“Loke bosonan ta deseá di Mi, asina lo pasa ku boso,” Señor a deklará.
“... Pone bo konfiansa e Spiritu ei ku ta guia hende pa hasi bon---- s, pa [loke ta] hustu, pa kana ku humildat, i pa husga rektamente....
“...[E ora ei] kualkier kos ku boso deseá di Mi [den] hustisia… lo boso risibí.”8
Mi ta gusta e doktrina aki! E ta bisa kada biaha atrobe ku nos lo wòrdu bendishoná pa nos deseo pa hasi bon, hasta miéntras nos ta purba di hasié. I e ta kòrda nos ku pa kualifiká pa e bendishonnan aki, nos mester ta sigur ku nos no ta ninga nan na otronan: nos tin ku trata otronan hustamente, nunka malu; nunka inhustu; nos mester kana ku humildat, nunka ku arogansia, nunka ku orguyo; nos tin ku husga rektamente, nunka ku outo-hustifikando, nunka inhustu
Rumannan, e promé i gran mandamentu di tur eternidat ta pa stima Dios ku henter nos kurason, poder, mente, i forsa, pero e bèrdat mas grandi i esun promé di eternidat ta ku Dios ta stima nos ku henter Su kurason, poder, mente, i forsa. E amor aki ta e piedra fundamental di eternidat, i e mester ta e piedra fundamental di nos bida diario. Enbèrdat ta solamente ku tal siguransa poderoso profundo den nos alma nos por tin e konfiansa pa sigui kere, sigui purba di mehorá, sigui buska pordon pa nos pikánan, i sigui ekstendé e grasia ei na nos próhimo.
Presidente George Q. Cannon na un okashon a siña: “No ta importá kon grave e prueba, kon profundo e angustia òf kon grandi e aflikshon, Dios lo no bandoná nos nunka. E no a hasié, i lo no hasié nunka. E no por hasié. No ta Su karakter pa [hasi asina]. ... E lo keda[semper] huntu ku nos. Nos por pasa dor di fòrnu kayente, awanan profundo; pero nos lo no wòrdu destruí ni dominá. Nos lo sali for di e pruebanan i difikultatnan aki mihó i mas puru ku nan. 9
Ku e deboshon mahestuoso di shelu komo e gran konstansia den nos bida, manifestá puru i perfektamente den nos bida, morto, i Ekspiashon di Señor Jesucristu, nos por skapa e konsekuensianan di tantu piká i estupides---di nos mes òf di otronan---den kua forma ku nan por yega na nos den kurso di bida diario. Si nos duna nos kurason na Dios i hasi e mihó ku nos por pa biba e evangelio, e ora ei mañan i tur otro dianan al fin lo bira mas magnífiko, hasta ora nos no ta rekonosé komo tal. Dikon? Pasobra nos Tata Selestial ke asina! E ke bendishoná nos i E ke pa nos tin goso den triunfá. Un bida di rekompensa, abundante, i eterno ta e ophetivo prinsipal di Su plan miserikordioso pa Su yunan! Ta un plan pre dediká riba e bèrdat “ku tur kos ta traha huntu pa bon na tur ku ta stima Dios. 10 Asina ku, sigui stima. Sigui konfia. Sigui kere. Sigui krese. Shelu lo sigui animá boso awe, mañan, i semper.
“Ta sa boso no sa, tende boso no a tende?” Isaias a sklama
“[Dios] ta duna animo na esun ku ta desmayá; i na esnan debil e ta hasi fuerte. …
“...Esnan ku konfia den [Dje] ta haña forsa kada biaha; nan lo bula altu manera águila. {nb...
“Pasobra ...Señor ...Dios lo kohe bo man i bisa bo, no tene miedu; Mi ta yuda bo.” 11
Rumannan, mi ta roga ku un Tata na Shelu amoroso bendishoná nos mañan pa kòrda kon nos a sinti awe. Bendishoná nos pa nos por hasi esfuerso ku pasenshi i persistensia na e idealnan ku nos a skucha wòrdu proklamá e wikènt di konferensia aki, sabiendo ku Su amor dibino i yudansa sin faya lo ta ku nos hasta ora nos ta lucha---no, lo ta ku nos spesialmente ora nos ta lucha.
Si e normanan di Evangelio ta parse haltu i e mehoramentu personal nesesario den e dianan futuro ta parse for di alkanse, kòrda Yozue su enkurashamentu na su pueblo ora nan tabata enfrentá un futuro intimidante. El a bisa, “Purifiká boso mes, pasobra mañan Señor lo hasi milager entre boso.” 12 Mi ta deklará e mes un promesa. Ta e promesa di e konferensia aki. E ta e promesa di e Iglesia aki. E ta e promesa di E k u ta hasi e milagernan, ku E mes ta, “Maravioso, Konsehero, E Dios poderoso, ...E Prínsipe di Pas.” 13 Di Dje mi ta testifiká. Di Dje mi ta un testigu. I di Dje e konferensia aki ta para komo un tèstamènt di Su obra ku ta sigui den e delaster dia grandi aki. Den e nòmber di Jesucristu, amèn.