E ta Pidi Nos pa Ta Su Mannan

Pa Cheryl A. Esplin

Promé Konsehero den e Presidensia General di Primaria

Servisio berdadero Christian ta desinteresá i ta enfoká riba otronan.

“Stima un na otro; manera mi a stima boso.”¹ E palabranan aki, kantá pa e koro remarkabel aki, a wòrdu bisá pa Jesus oranan promé ku Su gran sakrifisio ekspiatorio---un sakrifisio ku Elder Jeffrey R. Holland a deskribí komo “e manifestashon mas mahestuoso di amor puro hamas demostrá den historia di e mundu aki.”²

Jesus no solamente a siña nos pa stima, pero El a biba lokual El a siña. Durante Su ministerio, Jesus “a bai rònt hasiendo bon”³ i a supliká tur pa sigui Su ehèmpel.”⁴ El a siña, “Pasobra esun ku ke salba su bida, lo pèrd’é, ma esun ku pèrdè su bida pa mi motibu, lo salb’é.”⁵

Presidente Thomas S. Monson, ku a komprondé i biba e atmonishon pa stima, a bisa: “Mi ta kere ku e Salbador ta bisando nos ku si a ménos ku nos pèrdè nos mes den servisio na otronan, nos propio bida lo tin poko propósito. Esnan ku ta biba únikamente pa nan mes na fin nan lo marchitá i … pèrdè nan bida, miéntras ku esnan ku ta pèrdè nan mes den servisio na otronan ta krese i floresé---i en efekto ta salba nan bida.”⁶

Servisio berdadero Christian ta desinteresá i ta enfoká riba otronan. Un muhé ku tabata kuida su kasá inválido a splika, “No pensa di bo tarea komo un karga; pensa di dje komo un oportunidat pa siña kiko amor ta realmente.”⁷

Papiando na un devoshonal di BYU, Hermana Sondra D. Heaston a puntra: “Kiko si realmente nos por mira den otro su kurason? Nos lo komprondé otro mihó? Dor di sinti loke nan ta sinti, mira loke nan ta mira, i skucha loke nan ta skucha, nos lo hasi i tuma, e tempu pa sirbi otronan, i nos lo trata nan diferente? Nos lo trata nan ku mas pasenshi, mas ternura, i mas toleransia?

Hermana Heaston a kompartí un eksperensia di e tempu ku e tabata sirbi na un kampamentu di Mujeres Jovenes. El a bisa:

“Un di nos … . diskursantenan di devoshonal … a siña nos tokante di ‘bira.’ Un di su deklarashonnan … . tabata, ‘Bira un persona ku ta saka man pa konosé i sirbi otronan---pensa mas riba otronan ku na nos mes.’

Kombersashon entre un hobensita i un lider ta difísil ora ta wak den un spil.

“Pa demostrá esaki, el a yama un dje hobensitanan i a pidié pa para ku kara p’e. [E] e ora ei el a saka un spil i a pon’é entre nan dos p’asina e, [esun ku ta papia], ta mirando den e spil miéntras e tabata purba papia ku e hobensita. No ta un sorpresa, ku e no tabata un kombersashon sinsero. Esaki tabata un lès práktiko ku a ilustrá kon difísil ta pa komuniká ku i sirbi otronan si nos ta muchu prekupá pa nos mes i ta mira solamente nos mes i nos nesesidatnan. Despues[e] a pone e spil un kantu, a saka un kozein di bentana, i a pon’é entre nan dos su kara. …Nos por a mira ku e hobensita a bira [su] punto di interes i ku servisio berdadero ta rekerí ku nos ta enfoká riba e nesesidatnan i emoshonnan di otronan. Hopi biaha nos ta asina prekupá tokante nos mes i nos bida okupá--- ora nos ta enfoká riba nos mes miéntras nos ta purba buska oportunidatnan pa sirbi----ku nos no ta enfoká ku klaridat riba esnan ku nos ta sirbiendo.”⁸

Kombersashon entre un hobensita i un lider ta fásil ora ta wak dor di un bentana

Presidente Monson a kòrda nos hopi biaha ku nos ta “rondoná pa esnan den nesesidat di nos atenshon, nos ánimo, nos sosten, nos konsuelo, nos bondat---sea nan ta miembronan di famia,amigu,konosí, òf strañero.” El a bisa, “Nos ta Señor su mannan aki na mundu, ku e mandato pa sirbi i yuda Su yunan. E ta dependé di kada un di nos.”⁹

Muchanan ta wòrdu invitá pa sirbi i ta Señor su mannan

Aña pasá den yanüari, e revistanan Friend i Liahonaa invitá muchanan rònt mundu pa sigui e konseho di Presidente Monson---pa ta Señor su mannan. Muchanan a wòrdu invitá pa duna servisio---grandi i chikitu. Despues nan a wòrdu animá pa marka nan man riba pida papel, kòrt’é afó, skibi riba dje e servisio ku nan a hasi, i mand’é pa e revistanan. Hopi di boso ku ta skuchando awe nochi por ta algun di e míles di muchanan ku a hasi un obra di servisio amoroso i a mand’é aden.¹⁰

Muchanan ta registrá aktonan di servisio riba mannan di papel

Míles di mucha ta manda un registro di nan akto di servisio pa e revistanan

Ora muchanan siña kon pa stima i sirbi otronan ora nan ta yòn, nan ta pone un patronchi di servisio pa e resto di nan bida. Hopi biaha muchanan ta siña nos ku mustra amor i servisio no tin mester di ta grandi i impreshonante pa ta importante i pa hasi un diferensia.

Un maestra di Primaria a duna e siguiente ehèmpel. “Awe,” el a bisa, “nos klas di sinku i seis aña a traha kadenanan di amor. Kada mucha a pinta imágennan riba repinan di papel: un di nan mes, un di Jesus, i algun di miembronan di nan famia i sernan kerí. Nos a leim e repinan den sírkulonan ku ta pasa den otro pa forma un kadena ku nos a transofrmá den kadenanan di amor. Segun nan tabata pinta, e muchanan tabata papia di nan famia.

“Heather a bisa, ‘mi no ta pensa ku mi ruman muhé ta stima mi. Semper nos ta pleita. … i ta hasta odia mi mes. Mi tabatin un mal bida.’ I el a pone su kabes den su mannan.

Mi a pensa tokante su sirkunstansianan familiar i a sinti ku enbèrdat e por tabatin un bida difísil. Pero despues ku Heather a bisa esaki, Anna, patras na kabamentu di e mesa, a respondé, ‘Heather, mi ta poniendo abo den mi kadena entre ami i Jesus pasobra E ta stima mi i ami ta stima bo.’

“Ora Anna a bisa esei, Heather a gatia bou dje mesa pa yega serka Anna i a dun’é un fuerte abraso.

“Na fin di e lès, ora su wela a bin busk’é, Heather a bisa, ‘Bo sa Wela? Jesus ta stima mi.’”

Ora nos ta saka man den amor i servisio hasta den e maneranan di mas chikitu, kurasonnan ta wòrdu kambiá i suavisá ora otronan ta sinti e amor di Señor.

Sinembargo, tin biaha, pa motibu di kantidat grandi di hende rònt di nos ku mester di yudansa i alivio di problema, por parse difísil pa satisfasé e hopi di e nesesidatnan urgente.

Rumannan, algun di boso ku ta skuchando por sinti ku boso ta hasi tur kos posibel pa yuda boso miembronan di famia ku ta den nesesidat. Kòrda, ku den e tareanan rutinario i hopi biaha laf aki, boso ta “den servisio di boso Dios.”¹¹

Otro di boso por sinti un bashí ku por wòrdu yená ora boso wak den boso besindario òf komunidat pa oportunidatnan pa yuda aliviá un otro su karga.

Nos tur por hasi algun servisio den nos bida diario. Nos ta biba den un mundu konfliktivo. Nos ta duna servisio ora nos no ta kritiká, ora nos ninga di hasi redu, ora nos stòp di husga, ora nos hari, ora nos bisa danki, i ora nos tin pasenshi i ta amabel.

Otro tipo di servisio ta tuma tempu, planiamentu adelantá, i èkstra energia. Pero nan ta bal la pena kada esfuerso di nos. Kisas nos por kuminsá hasi nos mes e preguntanan aki:

Ken mi konosé den mi serkania ku mi por yuda awe?
Ki tempu i rekursonan mi tin?
“Kon mi por usa mi talentonan i habilidatnan pa bendishoná otronan?
Kiko nos por hasi komo famia?

Presidente Dieter F. Uchtdorf a siña:

“Boso mester hasi … loke e disípulonan di Cristu a hasi den tur dispensashon: bini huntu, usa tur rekurso disponibel, buska e inspirashon di e Spiritu Santu, puntra Señor pa Su konfirmashon, i despues prepará i bai traha.

“Mi ta duna boso un promesa,” el a bisa. “Si boso sigui e patronchi aki, boso lo risibí guia spesífiko pa e ken, kiko, ki oraiundapa yuda na Señor su manera.”¹²

Ki ora ku mi ta puntra kon lo ta ora e Salbador bini atrobe, mi ta pensa di Su bishita na e Nefitanan ora El a puntra:

“Boso tin algun entre boso ku ta malu? Tresenan aki. Boso tin kualke ku ta mankaron, òf siegu, òf koho, òf lam,òf leproso, òf ku ta seku, òf ku ta surdu, òf aflihí di kualke kos? Tresenan aki i ami lo kuranan, pasobra mi tin kompashon riba boso; mi kurason ta yen di miserikòrdia. …

“… [E Salbador ] a kura nan tur.”¹³

Pa awor, E ta pidi nos pa ta Su mannan.

Mi a yega di sa ku ta e amor di Dios i di próhimo ta duna nifikashon na bida. Laga ku nos por sigui nos Salbador su ehèmpel i Su mandato pa yega na otronan ku amor.

Mi ta testifiká di e realidat di Presidente Henry B. Eyring su promesa “ku si [nos lo] usa [nos] donnan pa sirbi un otro persona, [nos lo] sinti e amor di Señor pa e persona aki. Tambe [nos lo] sinti su amor pa [nos].”¹⁴ Den e nòmber di JesuCristu, amèn.