Kiko Nos Lo Hasi?

Pa Neill F. Marriott

Segundo konsehero den e Presidensha General di Mujeres Jovenes

Nos ta konstruí e reino dor di kuida otro. Tambe nos ta konstruí e reino ora nos papia i testifika di bèrdat.

Djis despues di e Resurekshon i Asunshon di Jesus, e apòstel Pedro a instruí, “P’esei henter pueblo … mester tin sigur ku e mesun Hesus ku boso a krusifiká, Dios a hasi tantu Señor komo Mesias!” E oyentenan a wòrdu penetrá den nan kurasonnan i a puntra Pedro i e otronan, “Kiko nos mester hasi antó, rumannan?” ¹ I despues di esaki nan a obedesé e siñansanan di Pedro ku alegria.

Mayan ta Pasku di Resurekshon, i mi ta spera ku nos tambe lo wòrdu afektá den nos kurason pa atmití e Salbador, arepentí i obedesé ku goso.

Den e konferensha general aki, nos lo tende guia inspirá duná dor di lidernan di Iglesia, ámbos esnan hòmber i esnan muhé. Sabiendo ku nos kurason lo wòrdu toka dor di nan palabranan, mi ta puntra boso awe nochi, “Muhénan i rumannan, kiko nos lo hasi?”

E presidente general di Sosiedat Di Sokoro, Eliza R. Snow a deklará na e rumannan muhé kasi 150 aña pasa, “Señor a pone responsabilidatnan haltu riba nos.”² Mi ta duna testimonio ku awendia su deklarashon ainda ta bèrdat.

Señor su Iglesia tin mester di muhénan ku ta wòrdu guiá dor di Spiritu ku ta usa nan don úniko pa kuida, pa papia i pa defendé bèrdatnan di evangelio. Nos inspirashon i intuishon ta partinan nesesario pa konstruí e reino di Dios, loke en realidat ta nifiká, hasi nos parti pa trese salbashon na e yunan di Dios.

Konstruyendo e Reino dor di Kuido

Nos ta konstruí e reino ora nos ta kuida otronan. No opstante, e promé yu di Dios ku nos tin ku fortifiká den e evangelio restourá ta nos mes. Emma Smith a bisa, “Mi ta deseá e Spiritu di Dios pa mi konosé i komprondé pa mi mes, asina mi tin kapasidat pa superá kual tradishon òf karakter ku ta, ku ta kita mi pa yega mi eksaltashon.”³ Nos tin mester di desaroyá un fundamentu di fe den e evangelio di e Salbador i bai dilanti, poderá dor di konvenionan di tèmpel, pa ku eksaltashon.

Kiko ta pasa si algun di nos tradishonnan no tin lugá den e evangelio restourá di JesuCristu? Laga e kosnan ei bai por rekerí asistensia emoshonal i kuido di un otro hende, manera a pasa ku mi tambe.

Ora mi a nase, mi mayornan a planta un palu di magnolia patras di kas p’asina ku lo tin magnolianan na mi seremonia di kasamentu, ku lo a bai tuma lugá na e Iglesia Protestante di mi antepasadonan. Pero riba e dia di mi kasamentu, no tabatin ni mayornan na mi banda, ni magnolianan, paso komo un konverso di un aña den Iglesia, mi a biaha bai e siudat di Salt Lake, Utah, pa risibí mi investidura di tèmpel i wòrdu seyá na mi prometido, David.

Ora mi a sali Lousiana i kasi tabata yegando Utah, un sentimentu di soledat a kubri mi. Promé ku e kasamentu, lo mi tabata bai keda serka David su wela di kriansa, ku tabata mihó konosí komo Tanta Carol.

A ta mi awó, un stranhero na Utah, bayendo pa keda den un deskonosí su kas promé ku lo mi a wòrdu seyá – pa eternidat—na un famia ku kasi mi no konosé mes. (Ta bon kos ku mi tabata stima i konfia den mi futuro kasá i Señor!)

Na momentu ku mi tabata pará dilanti Tanta Carol su kas, mi por a kremp den otro. E porta a habri--- Mi tabata pará einan manera un konènchi spant--- i Tanta Carol, sin bisa niun palabra, a ekstendé i tuma mi den su brasa. E, ku no tabatin yu di su mes, tabata sa--- su kurason yená ku kuido tabata s--- ku mi tabatin mester di un lugá pa pertenesé na dje. O, e konsuelo i dulsura di e momento ei! Mi miedu a disparsé, i mi a haña un sensashon di ta ser ankrá na un lugá ku spiritualmente tabata safe pa mi.

Amor ta nifiká traha lugá den bo bida pa otro hende, manera Tanta Carol a hasi pa mi.

Mamanan, na un manera literal ta traha lugá den nan kurpa pa alimentá un baby ku no a nase ainda--- i laga nos spera un lugá den nan kurason ora ku nan ta kria nan--- pero kriansa no ta limitá na haña yu so. Eva a wòrdu yamá “mama” promé ku ela haña yu.⁴ Ami ta kere ku pa “ta mama” ta nifiká pa “duna bida.” Pensa un ratu riba e diferente maneranan pa duna bida. E por ta nifiká duna bida emoshonal pa esnan sin speransa òf bida spiritual pa e esun ku ta duda. Ku yudansa di Spiritu Santu, nos por krea un lugá pa kura emoshonalmente, un lugá pa esun ku ta wòrdu diskriminá, esun ku ta wòrdu rechasá i e esun ku ta un deskonosí. Na e maneranan suave pero tòg poderoso aki, nos ta konstruí e reino di Dios. Rumannan, nos tur a bini e mundu aki ku e don maternal di duna bida i kuido paso esei ta Dios su plan.

Pa sigui Su plan i bira un konstruktor di e reino ta rekerí sakrifisio sin interes propio. Elder Orson F. Whitney a skibi: “Tur loke nos sufri i tur loke nos soportá, espesialmente ora nos soport’é ku pasenshi, … ta purifiká nos kurasonnan… i hasi nos mas mansu i karitibo,… i ta dor di … difikultat i pruebanan, nos ta gana e edukashon … ku lo hasi nos mas manera nos Tata i Mama na shelu.”⁵ Ta e aflikshonnan purifikadó aki ta trese nos mas serka di Cristu, ku por kura nos i utilisá nos den e trabou di salbashon.

Konstruí e Reino dor di papia i testifika

Un manera tambe ku nos ta konstruí e reino ta pasa na momentu ku nos papia i duna testimonio di bèrdatnan. Nos ta sigui Señor su patronchi. E ta papia i instruí nos ku poder i outoridat di Dios. Rumannan, nos tambe por. Muhénan en general gusta papia i reuní ku otro! Na e momentu ku nos traha huntu ku e outoridat di saserdosio delegá na nos, nos papiá i reunion ku otro, ta krese i bira enseñansa i guia den evangelio.

Ruman Julie B. Beck, presidente general anterior di Sosiedat di Sokoro, ta siña: “E abilidat pa kualifiká, risibí i aktua sigun revelashon personal ta e habilidat di mas importante ku por wòrdu atkerí den e bida aki. … E ta rekerí un enfoke konsiente.”⁶

Revelashon personal di e Spiritu Santu lo inspirá nos pa siña, papia i aktua sigun bèrdat eterno---e Salbador su bèrdat. Mas nos sigui Cristu, mas lo nos sinti Su amor i direkshon; mas nos sinti Su amor i direkshon, mas lo nos ke papia instruí bèrdat manera E tabata hasi, hasta ora nos enkontrá oposishon.

Algun aña pasa, mi a hasi orashon pa haña e palabranan pa defendé maternidat ora ku mi a haña un yamada di telefon anónimo.

E persona na telefon a puntra, “Ta abo ta Neill Marriott, e mama di un famia grandi?”

Mi a kontesta ku alegria, “Si!” sperando di tende algu manera, “Awèl, esei ta bon!”

Pero no! Nunka lo mi lubidá su kontesta sigun su stèm tabata krak dor di telefon: “Mi ta sumamente ofendé ku abo lo trese yunan riba e planeta super poblá aki!”

“O,” Mi a murmurá, “Mi ta komprondé kiko bo kermen.”

Ela hou, “No--- bo no ta komprondé!”

Ami a lamentá, “Awèl, porta no.”

El a kuminsá ataká mi over di mi desishon loko di ta un mama. Sigun e ta sigui, mi a kuminsá hasi orashon pa yudansa, i un pensamentu suave a bini na mente: “Kiko Señor lo a bis’é?” Na e momento ei mi a sinti ku mi tabata para riba tera firme i mi a haña kurashi ora mi a pensa riba JesuCristu.

Mi a respondé, “Mi ta kontentu di ta un mama, i mi ta primintí bo ku lo mi hasi tur kos den mi poder pa kria mi yunan di tal forma ku nan lo hasi e mundu aki un lugá mas mihó.”

El a respondé, “Awèl, mi ta spera ku bo ta hasi esei!” i despues ela sera e telefon.

E no tabata algu grandi--- despues di todo, mi tabata para safe den mi mes kushina! Pero na mi manera chikitu, mi tabatin e posibilidat di papia na defensa di famia, mamanan i edukadónan dor di dos kos: (1) mi a komprondé i ta kere den Dios su doktrina di famia, i (2) mi a hasi orashon pa haña palabranan pa ekspresá e bèrdatnan aki.

Siendo distinto i diferente for di mundu lo trese algun krítika, pero nos mester ankra nos mes na prinsipionan eterno i duna testimonio di nan, no opstante mundu su kontesta.

Ora nos puntra nos mes, “Kiko lo nos hasi?” laga nos meditá riba e pregunta aki: “Kiko nos Salbador ta hasi kontinuamente?” E ta kuida. E ta krea. E ta enkurashá kresementu i bondat. Muhénan i rumannan, nos por hasi e kosnan aki! Muchanan di Primaria, tin un hende den boso famia ku mester di boso amor i kariño? Bo ta konstruí e reino tambe dor di kuida otro.

E Salbador su kreashon di tera, bou di direkshon di Su Tata, tabata un akto poderoso di kuido. Ela proveé un lugá pa nos por krese i desaroyá fe den Su poder ekspiatorio. Fe den JesuCristu i Su Ekspiashon ta e lugá apsoluto di kura i speransa, kresementu i propósito. Tur hende mester di un lugá di pertenensia spiritual i físiko. Nos hende muhé di tur edat, por krea esaki; e ta hasta un lugá sagrado.

Nos gran responsabilidat ta pa bira muhénan ku ta sigui e Salbador, kuida ku inspirashon i biba bèrdat sin temor. Na momentu ku nos pidi nos Tata den Shelu pa hasi nos, konstruktornan di Su reino, Su poder lo kore dor di nos i lo nos sa kon pa kuida, i na final bira manera nos Mayornan Selestial. Den nòmber di JesuCristu, amèn.