“Esun ku Risibí Nan, ta Risibí Ami”
Pa Elder Neil L. Andersen
Di e Quorum di e Diesdos Apòstelnan
Awendia muchanan ta haña nan mes den formashonnan familiar hopi diferente i kompliká. Nos mester ekstendé man na e esunnan ku ta sinti nan so, lagá atras, òf fo’i kurá.
Dios ta stima mucha. E ta stima tur mucha. E Salbador a bisa, “Laga e muchanan bini serka mi: pasobra e reino di shelu ta di esnan manera nan.”1
Awendia muchanan ta haña nan mes den formashonnan familiar hopi diferente i kompliká.
Por ehèmpel, awendia, dòbel di muchanan den Estádos Unídos ta biba ku un mayor so kompará ku 50 aña pasá.2 I tin hopi famia ku ta ménos uní den nan amor pa Dios i disposishon pa warda Su mandamentunan.
Den e konfushon spiritual kresiente aki, e evangelio restourá lo sigui di ta e norma, e ideal, e patronchi di Señor.
“Muchanan tin e derechi di nase den laso di matrimonio, i pa wòrdu kriá pa un tata i mama ku ta honra e promesanan matrimonial ku fidelidat kompleto. …
“Esposo i esposa tin un responsabilidat solemne pa stima i kuida otro i nan yunan. … Mayornan tin un deber sagrado pa kria nan yunan den amor i rektitut, pa proveé pa nan nesesidatnan físiko i spiritual, pa siña nan stima i sirbi otro, [i] pa warda e mandamentunan di Dios.”3
Nos ta rekonosé e hopi mayornan bon, di tur kreensia, rònt mundu kende ku amor ta kuida nan yunan. Ku gratitut nos ta rekonosé e famianan den E Iglesia di Jesucristu di e Santunan di Delaster dia ku tin e kuido di un tata i mama kombertí na e Salbador, ku ta seyá pa outoridat di e saserdosio, i ku ta siñando den nan famia pa stima i konfia nan Tata Selestial i su Yu, Jesucristu.
Roga pa e Hóbennan
Mi súplika awe ta pa e sentenáres di mil muchanan, hóbennan, i hóbennan adulto ku no ta bini for di, pa falta di un mihó tèrmino, “plachi perfekto” di famianan. Mi no ta papia solamente na e hubentut ku a eksperensiá e morto, divorsio, òf fe ku a mengua di nan mayornan, pero tambe di e desena di mil di hobensitunan i hobensitanan rònt mundu ku ta aseptá e evangelio sin un tata òf mama pa bini Iglesia huntu ku nan.4
E hóbennan Santu di Delaster dia aki ta drenta Iglesia ku gran fe. Nan ta spera di krea e famia ideal den nan mes bida den futuro.5 Ku tempu, nan ta bira un parti importante di nos forsa mishonal, nos hóbennan adulto rekto, i esnan ku ta hinka rudia na un altar pa kuminsá nan mes famia.
Sensibilidat
Nos lo sigui siña e Señor Su patronchi pa famianan, pero awor ku mion di miembronan, i e diversidat ku nos tin den e muchanan di Iglesia, nos mester ta hasta mas pensativo i sensitivo. Nos kultura di Iglesia i manera di papia tin biaha ta úniko. E muchanan di Primaria no ta bai stòp di kanta “Las familias pueden ser eternas,”6 pero ora nan kanta, “Cuando papá Vuelve” 7 òf “Allí donde Hay amor”8 no tur mucha lo ta kanta di nan mes famia.
Nos amiga Bette a kompartí un eksperensia na iglesia di tempu e tabatin 10 aña: “Nos maestra tabata kompartí un lès tokante kasamentu den tèmpel. El a puntra ami espesífikamente, ‘Bette, bo mayornan no tabata kasá den tèmpel no?’ [Mi maestra i sobrá di e klas] tabata sa e kontesta.” E maestra su lès a sigui, i Bette a imaginá e pió. El a bisa, “Mi tabata yora hopi anochi. Ora mi a haña problema di kurason dos aña despues mi a pensa ku lo mi muri, mi tabata spantá, pensando ku lo mi ta so pa semper.”
Mi amigu Leif a bishitá iglesia su so. Un biaha, ora e tabata den Primaria, el a wòrdu puntrá pa duna un diskurso kòrtiku. E no tabatin mama òf tata na iglesia pa para banda di dje i yud’é si e lubidá kiko bisa. Leif tabata yen miedu. Na lugá di pasa bèrgwensa, el a djis keda kas for di iglesia pa algun luna.
“Jesus a yama un mucha chikitu serka dje, i a pon’é para meimei di nan …
“I [a bisa] esun ku risibí un mucha asin’aki den mi nòmber ta risibí ami.”9
Kurasonnan Kreyente i Donnan Spiritual
E muchanan i hóbennan aki ta bendishoná ku kurason kreyente i donnan spiritual profundo. Leif a bisa mi, “Mi ta komprondé den un manera básiko ku Dios tabata mi Tata i ku E tabata konosé mi i stima mi.”
Nos amiga Veronique a bisa, “Ora mi a siña e prinsipionan di e evangelio i a studia e Buki di Mormon, tabata manera ku mi tabata kòrda kosnan ku mi tabata sa kaba pero a lubidá.”
Nos amiga Zuleika ta bini di Alegrete, Brasil. Ounke su famia no tabata religioso, na edat di 12 aña, el a kuminsá lesa e Beibel i bishitá iglesianan lokal, buskando pa sa mas tokante Dios. Ku permisio di mala gana di su mayornan, el a studia ku e mishoneronan, haña un testimonio i a wòrdu boutisá. Zuleika a bisa mi, “Durante di e lèsnan, nan a mustra mi un pintura di e Tèmpel di Salt Lake i a konta tokante di e ordenansanan pa seya. For di e momentu ei, mi tabatin e deseo pa un dia drenta den e kas di Señor i tin un famia eterno.”
Maske un mucha su situashon terenal kisas, no ta ideal, un mucha su DNA spiritual ta perfekto, pasobra un hende su identidat ta komo un yu hòmber of yu muher di Dios.
Presidente Thomas S. Monson a bisa: “Yuda Dios Su yunan komprondé loke ta genuino i importante den e bida aki. Yuda nan desaroyá e fortalesa pa skohe e kamindanan ku lo mantené nan sigur riba e ruta pa bida eterno.”10 Laga nos habri nos brasa i kurason un poko mas. E hóbennan aki tin mester di nos tempu i testimonio.
Brandon, ku a uni na Iglesia na Colorado na skol sekundario, a papia ku mi di esnan ku a ekstendé man na dje promé i despues di su boutismo. El a bisa, “Mi tabata den kas di famianan ku tabata biba e evangelio. Esei a mustra mi un norma ku mi a sinti ku mi por tin den mi mes famia.”
Veronique, nasé na Hulanda, a bai skol ku nos yu Kristen tempu nos tabata biba na Alemania. El a nota, “Studiantenan ku tabata miembro di Iglesia tabatin un lus rònt di nan. Mi a yega na realisá ku e lus ei ta bini for di nan fe den Jesucristu i dor di biba Su enseñansanan.”
Mi amigu Max a wòrdu boutisá ku ocho aña. Su tata no tabata miembro di ningun iglesia, i Max por a bai òf keda sin bai iglesia.
Komo un teenager, despues di keda sin bai algun luna, Max a sinti ku e mester bai iglesia bèk i a disidí un djadumingu mainta pa regresá. Pero su desishon a debilitá ora el a yega serka dje porta dilanti di iglesia, i el a bira nervioso.
Aya, pará na porta, tabata e obispu nobo . Max no tabata konosé, i tabatin sigur ku e obispu no tabata konosé. Ora Max a yega serka, e obispu su kara a klara, i el a saka man i a bisa, Max, ta hopi bon pa mira bo!”
“Ora el a bisa e palabranan ei,” Max a bisa, “un sentimentu kaluroso a bini riba mi i mi a sa ku mi a hasi e bon kos.”11
Sa un persona su nòmber por hasi un gran diferensia.
“[Jesus] a manda pa nan yunan chikí wòrdu tresé[na dje]. …
“I … el a tuma [nan], un pa un, i a bendishoná nan, i a pidi e Tata pa nan.
“I ora el a hasi esaki el a yora.”12
Te ainda bo no a ta boutisá
Riba petishon di mayornan, hopi hóben ku stima e evangelio ta warda hopi aña promé nan wòrdu boutisá.
Emily su mayornan a divorsiá tempu e tabata un mucha, e no a haña permiso pa wòrdu boutisá te ora e tabatin 15 aña. Nos amiga Emily ta papia positivo di un lider di Mujeres Jovenes ku “semper a ekstendé su man i a yuda fortalesé [su] testimonio.”13
Colton i Preston ta teenagernan ku ta biba na Utah. Nan mayornan ta divorsiá, i nan no a haña permiso pa wòrdu boutisá. Ounke nan no por pasa e santa sena, nan ta trese e pan kada siman. I ounke nan no por drenta tèmpel pa hasi boutismo huntu ku e hóbennan di nan bario ku ta bai tèmpel, e dos rumannan ta haña nòmbernan di famia na e porta na banda [di e tèmpel] na e sentro di historia di famia. E influensia mas grandi pa yuda nos hóbennan sinti nan mes inkluí ta otro hóbennan rekto.
Elder Joseph Ssengooba
Mi ta sera ku e ehèmpel di un amigu nobo, un persona ku mi a konosé algun siman pasá durante e bishitá na Mishon Zambia Lusaka.
Elder Joseph Sengooba ta di Uganda. Su tata a muri tempu e tabatin shete aña. Ku nuebe aña, ku mama i famianan ku no por a sòru p’e, e tabata riba su mes. Na e edat di 12, el a konosé e mishoneronan i a wòrdu boutisá.
Joseph a konta mi di su promé dia na iglesia. “Despues di reunion sakramental, mi a pensa ku tabata ora pa bai kas, pero e mishoneronan a introdusí mi na Joshua Walusimbi. Joshua a bisa mi ku e tabata bai bira mi amigu, i el a duna mi un Children’s Songbook ya asina mi no tin ku bai Primaria man bashí. Den Primaria Joshua a pone un stul mas, presis banda di esun di dje. E presidente di Primaria a invitá mi [bai] dilanti i a pidi henter Primaria pa kanta ‘Soy un hijo de Dios’ pa mi. Mi a sinti mi hopi spesial.”
E presidente di rama a hiba Joseph na e famia Pierre Mungoza, i esei a bira su hogar pa e siguiente kuater añanan.
Ocho aña despues ora Elder Joseph Sengooba a kuminsá su mishon, pa su gran sorpresa su entrenadó tabata Elder Joshua Walusimbi, e mucha hòmber ku a lag’é sintié bon biní riba su promé dia na Primaria. Su presidente di mishon? E ta Presidente Leif Erickson, e mucha hòmber chikitu ku ke a keda leu for di Primaria pasó e tabatin miedu pa duna un diskurso. Dios ta stima Su yunan.
E Muchanan a Bini Koriendo
Ora mi kasá Kathy i ami tabata na Afrika algun siman pasá, nos a bishitá Mubji-Mayi, Repúblika Demokrátiko di Congo. Pasobra e kapiya no tabata sufisiente grandi pa e 2,000 miembronan, nos a reuní pafó bou di daknan di plèstik wantá na palunan di bambu. Ora e reunion a kuminsá, nos por a mira dosena di muchanan mirando nos, subiendo na e baranan banda pafó dje kurá di heru ku ta rondoná e propiedat. Kathy a susurá, “Neil, bo ta kere ku bo ke invitá e muchanan pa bini paden?” Mi a aserká e presidente di distrito, Kalonji na e podio i a puntr’é si e ke yama e muchanan pafó dje kurá bon biní i pa bini i djòin nos.
Pa mi sorpresa, riba Presidente Kalonji su invitashon, e muchanan no solamente a bini, pero[nan] a bini koriendo---mas di 50, kisas 100 mucha---algun ku pañanan kibrá i pia bou pero tur ku sonrisanan bunita i karanan eksitante.
Mi tabata profundamente konmoví pa e eksperensia aki i a mir’é komo un simbolismo di nos nesesidat pa ekstendé man na e hóbennan ku ta sinti nan so, lagá patras, òf fo’i kurá. Laga nos pensa riba nan, yama nan bon biní, brasa nan, i hasi tur kos ku nos por pa fortalesé nan amor pa e Salbador. Jesus a bisa, “Esun ku risibí un mucha asin’aki den mi nòmber, ta risibí Ami.”14 Den e nòmber di Jesucristu, amèn.